₹20 ರ ಭೇಲ್ ಪುರಿ ತಿಂದ ಗ್ರಾಹಕನಿಗೆ ಕಾದಿತ್ತು ಶಾಕ್: ಪ್ಯಾಕೆಟ್ ಬಿಚ್ಚಿದ್ರೆ ಸಿಕ್ತು ಬ್ಯಾಂಕ್ ಸ್ಟೇಟ್‌ಮೆಂಟ್!

ಸುದ್ದಿಒನ್,ಮೇ.23: ರಸ್ತೆ ಬದಿಯ ಗಾಡಿಗಳಲ್ಲಿ ಚುರುಮುರಿ, ಭೇಲ್ ಪುರಿ ತಿನ್ನುವುದು ಭಾರತೀಯರಿಗೆ ಹೊಸದೇನಲ್ಲ. ಆದರೆ, ಗ್ರಾಹಕರೊಬ್ಬರು ಕೇವಲ 20 ರೂಪಾಯಿ ನೀಡಿ ಕೊಂಡುಕೊಂಡ ಭೇಲ್ ಪುರಿ ಪ್ಯಾಕೆಟ್ ಈಗ ದೇಶಾದ್ಯಂತ ಭಾರಿ ಚರ್ಚೆಗೆ ಕಾರಣವಾಗಿದೆ. ಭೇಲ್ ಪುರಿ ಕಟ್ಟಿಕೊಟ್ಟಿದ್ದ ಕಾಗದ ಬೇರೇನೂ ಅಲ್ಲ, ಅದು ಯೂನಿಯನ್ ಬ್ಯಾಂಕ್ ಆಫ್ ಇಂಡಿಯಾ (Union Bank of India) ಗ್ರಾಹಕರೊಬ್ಬರ ವೈಯಕ್ತಿಕ ಬ್ಯಾಂಕ್ ಖಾತೆಯ ವಿವರಗಳಾಗಿದ್ದವು.

ಟ್ವಿಟರ್ (X) ಬಳಕೆದಾರರಾದ ಸುಧಾಂಶು ಅಂಭೋರೆ ಎಂಬುವವರು ಈ ಘಟನೆಯನ್ನು ಹಂಚಿಕೊಂಡಿದ್ದು, “ಭಾರತದಲ್ಲಿ ಪ್ರೈವೆಸಿ (ಗೌಪ್ಯತೆ) ಎಂಬುದು ಕೇವಲ ಒಂದು ಜೋಕ್ ಆಗಿದೆ” ಎಂದು ಆಕ್ರೋಶ ಹೊರಹಾಕಿದ್ದಾರೆ.

ವೈರಲ್ ಪೋಸ್ಟ್‌ನಲ್ಲಿ ಏನಿದೆ?
ಸುಧಾಂಶು ಅವರು ಹಂಚಿಕೊಂಡಿರುವ ಪೋಸ್ಟ್ ಪ್ರಕಾರ, ಅವರು ₹20 ನೀಡಿ ತಿಂದ ಭೇಲ್ ಪುರಿಯನ್ನು 2 ಪುಟಗಳ ಬ್ಯಾಂಕ್ ಸ್ಟೇಟ್‌ಮೆಂಟ್‌ನಲ್ಲಿ ಸುತ್ತಿ ನೀಡಲಾಗಿತ್ತು. ಆ ಕಾಗದದಲ್ಲಿ ಗ್ರಾಹಕರ ಹೆಸರು, ಖಾತೆ ಸಂಖ್ಯೆ (Account Number) ಮತ್ತು ಅವರ ಬ್ಯಾಂಕಿಂಗ್ ವ್ಯವಹಾರಗಳ (Transaction History) ಸಂಪೂರ್ಣ ಮಾಹಿತಿ ಸ್ಪಷ್ಟವಾಗಿ ಕಾಣಿಸುತ್ತಿತ್ತು. ಅತ್ಯಂತ ರಹಸ್ಯವಾಗಿರಬೇಕಾದ ಬ್ಯಾಂಕ್ ವಿವರಗಳು ಹೀಗೆ ರಸ್ತೆ ಬದಿಯಲ್ಲಿ ಸಿಗುತ್ತಿರುವುದು ನೆಟ್ಟಿಗರನ್ನು ಆತಂಕಕ್ಕೀಡು ಮಾಡಿದೆ.

ನೆಟ್ಟಿಗರ ಮಿಶ್ರ ಪ್ರತಿಕ್ರಿಯೆ ಮತ್ತು ಜೋಕ್‌ಗಳು

ಒಬ್ಬ ಬಳಕೆದಾರರು ತಮಾಷೆ ಮಾಡುತ್ತಾ, ಈ ಹಿಂದೆ ವೈದ್ಯಕೀಯ ವರದಿಗಳು (Medical Reports) ಕೂಡ ಹೀಗೆ ಸಿಕ್ಕಿರುವ ಉದಾಹರಣೆಗಳಿವೆ. ಬಹುಶಃ ನಾವು ನಮ್ಮ ದೇಶದ ಗುಪ್ತಚರ ಸಂಸ್ಥೆಯಾದ ‘ರಾ’ (RAW) ಏಜೆಂಟ್‌ಗಳಾಗಿ ಈ ಭೇಲ್ ಪುರಿ ಮಾರುವವರನ್ನು ನೇಮಿಸಿಕೊಳ್ಳಬೇಕು ಎಂದು ಬರೆದಿದ್ದಾರೆ.
ಮತ್ತೊಬ್ಬರು ತಮ್ಮ ಅನುಭವ ಹಂಚಿಕೊಳ್ಳುತ್ತಾ, “ನಾನು ಗೂಗಲ್‌ನಲ್ಲಿ ಏನೋ ಹುಡುಕುತ್ತಿದ್ದಾಗ ಯೂನಿಯನ್ ಬ್ಯಾಂಕ್‌ನ ಇಡೀ ವಲಯದ ಉದ್ಯೋಗಿಗಳ ಕಳೆದ ಕೆಲವು ವರ್ಷಗಳ ಸಂಬಳದ ವಿವರ ಸಿಕ್ಕಿತ್ತು ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.

ಯಾರೋ ಮಾಡಿದ ಸಣ್ಣ ನಿರ್ಲಕ್ಷ್ಯ, ಇಂದು ಒಬ್ಬರ ವೈಯಕ್ತಿಕ ಹಣಕಾಸಿನ ವಿವರಗಳನ್ನು ಇಡೀ ರಸ್ತೆಗೆ ತಂದು ನಿಲ್ಲಿಸಿದೆ. ಎಟಿಎಂ ಸ್ಲಿಪ್‌ಗಳು ಮತ್ತು ಬ್ಯಾಂಕ್ ಸ್ಟೇಟ್‌ಮೆಂಟ್‌ಗಳನ್ನು ಎಲ್ಲೆಂದರಲ್ಲಿ ಬಿಸಾಡುವ ಮುನ್ನ ನಾವೆಲ್ಲರೂ ಎಚ್ಚರಿಕೆಯಿಂದ ಇರಬೇಕು ಎಂಬುದಕ್ಕೆ ಈ ಘಟನೆಯೇ ಸಾಕ್ಷಿ.