ಚಿತ್ರದುರ್ಗ. ಮೇ.13: ಚಿತ್ರದುರ್ಗ ತಾಲ್ಲೂಕಿನ ಗುಡ್ಡದ ರಂಗವ್ವನಹಳ್ಳಿಯ ಸಮೀಪದ ಶಿವಗಂಗೋತ್ರಿ ಕ್ಯಾಂಪಸ್ನ ಚಿತ್ರದುರ್ಗ ವೈದ್ಯಕೀಯ ಕಾಲೇಜು ಮತ್ತು ಸಂಶೋಧನಾ ಸಂಸ್ಥೆಯಲ್ಲಿ ಸೋಮವಾರ ಅನಸ್ತೇಶಿಯಾ ವೈದ್ಯಕೀಯ ವಿಭಾಗದಲ್ಲಿ ಯುದ್ಧದ ಸಂದರ್ಭದಲ್ಲಿ ತೆಗೆದುಕೊಳ್ಳುವ ಆರೋಗ್ಯದ ಮುನ್ನೆಚ್ಚರಿಕೆ ಕುರಿತಾದ ಕಾರ್ಯಾಗಾರ ನಡೆಯಿತು.
ಚಿತ್ರದುರ್ಗ ವೈದ್ಯಕೀಯ ಕಾಲೇಜು ಮತ್ತು ಸಂಶೋಧನಾ ಸಂಸ್ಥೆಯ ನಿರ್ದೇಶಕ ಡಾ.ಬಿ.ವೈ.ಯುವರಾಜ್ ಅವರ ಅಧ್ಯಕ್ಷತೆಯಲ್ಲಿ ನಡೆದ ಕಾರ್ಯಾಗಾರದಲ್ಲಿ ”Trauma Care & Basic Life Support” ಕುರಿತು ಸವಿಸ್ತಾರವಾಗಿ ವಿಷಯಗಳನ್ನು ಮಂಡಿಸಲಾಯಿತು.
ಯುದ್ಧದ ಸಂದರ್ಭದಲ್ಲಿ ಹಿಂಸಾಚಾರಕ್ಕಿಂತ ಹೆಚ್ಚಾಗಿ ಆಹಾರ, ವಸತಿ, ನೀರು, ಬಟ್ಟೆ ಮತ್ತು ನೈರ್ಮಲ್ಯದಂತಹ ದೈನಂದಿನ ಸೌಲಭ್ಯಗಳ ಕೊರತೆಯೇ ಆರೋಗ್ಯದ ಮೇಲೆ ಗರಿಷ್ಟ ಹಾನಿಯನ್ನುಂಟು ಮಾಡುತ್ತದೆ. ಯುದ್ಧಗಳು ದೇಶದ ಅಭಿವೃದ್ಧಿಯಲ್ಲಿ ಹಿನ್ನಡೆಗೆ ಕಾರಣವಾಗುತ್ತವೆ ಮತ್ತು ಆರೋಗ್ಯ ಸಮಾನತೆಯಲ್ಲಿ ಯಾವುದೇ ಪ್ರಗತಿಯನ್ನು ನಿರಾಕರಿಸುತ್ತವೆ ಎಂದು ಕಾರ್ಯಾಗಾರದಲ್ಲಿ ಚರ್ಚಿಸಲಾಯಿತು.
ರಾಷ್ಟ್ರಗಳು ಪರಸ್ಪರ ಕದನ ವಿರಾಮಕ್ಕೆ ಒಪ್ಪಿಗೆ ನೀಡಿದ ನಂತರ ಭಾರತ ಮತ್ತು ಪಾಕಿಸ್ತಾನದ ನಡುವೆ ಪೂರ್ಣ ಪ್ರಮಾಣದ ಯುದ್ಧದ ಸಾಧ್ಯತೆ ಕಡಿಮೆಯಾಗಿದೆ ಎಂದು ತೋರುತ್ತದೆಯಾದರೂ ಆರೋಗ್ಯ ವ್ಯವಸ್ಥೆಗಳ ಸನ್ನದ್ಧತೆಯ ಬಗ್ಗೆ ಯೋಚಿಸಲು ಇದು ಒಂದು ಪ್ರಮುಖ ಅವಕಾಶವಾಗಿರಬಹುದು ಮತ್ತು ಅಂತಹ ಅನಿಶ್ಚಿತ ಸಂದರ್ಭಗಳನ್ನು ನಿರ್ವಹಿಸಲು ವೈದ್ಯರು ಹೇಗೆ ಉತ್ತಮವಾಗಿ ತರಬೇತಿ ಪಡೆಯಬೇಕು ಎಂಬ ಅಂಶವನ್ನೂ ಚರ್ಚಿಸಲಾಯಿತು.
ಮಾನವ ಆರೋಗ್ಯದ ಮೇಲೆ ಯುದ್ಧದ ಪರಿಣಾಮಗಳು: ಪ್ರಪಂಚದಾದ್ಯಂತ ಸುದೀರ್ಘ ಯುದ್ಧಗಳ ಸರಣಿಯು ಮಾನವ ಆರೋಗ್ಯದ ಮೇಲೆ ಯುದ್ಧಗಳ ದೂರಗಾಮಿ ಪರಿಣಾಮಗಳನ್ನು ಎತ್ತಿ ತೋರಿಸಿದೆ. ಹಿಂಸಾಚಾರಕ್ಕಿಂತ ಹೆಚ್ಚಾಗಿ ಆಹಾರ, ವಸತಿ, ನೀರು, ಬಟ್ಟೆ ಮತ್ತು ನೈರ್ಮಲ್ಯದಂತಹ ದೈನಂದಿನ ಸೌಲಭ್ಯಗಳ ಕೊರತೆಯೇ ಆರೋಗ್ಯದ ಮೇಲೆ ಹೆಚ್ಚಿನ ಹಾನಿಯನ್ನುಂಟು ಮಾಡುತ್ತದೆ. ಆರೋಗ್ಯ ಸೇವೆಯಲ್ಲಿ ಅಡ್ಡಿ ಸಂವಹನ ಕಡಿತ, ಸಾರಿಗೆ ಸ್ಥಗಿತ, ವೈದ್ಯಕೀಯ ಸರಬರಾಜು ಕಡಿತವಾಗಲಿದೆ. ಮಕ್ಕಳು, ಗರ್ಭಿಣಿಯರು ಮತ್ತು ವೃದ್ಧರು ಹೆಚ್ಚಾಗಿ ತೊಂದರೆ ಅನುಭವಿಸುತ್ತಾರೆ. ರಾಸಾಯನಿಕ ಯುದ್ಧದ ಪರಿಸರದ ಪರಿಣಾಮಗಳ ಬಗ್ಗೆ ಹಿರೋಷಿಮಾ-ನಾಗಾಸಾಕಿ ಬಾಂಬ್ ದಾಳಿಯ ನಂತರ ಅನೇಕ ತಲೆಮಾರುಗಳಲ್ಲಿ ಕಂಡುಬರುವ ಅನುವಂಶಿಕ ರೂಪಾಂತರಗಳ ಬಗ್ಗೆ ನಮ್ಮೆಲ್ಲರಿಗೂ ಚೆನ್ನಾಗಿ ತಿಳಿದಿದೆ.
ಕಾರ್ಯಾಗಾರದಲ್ಲಿ ಚಿತ್ರದುರ್ಗ ವೈದ್ಯಕೀಯ ಕಾಲೇಜು ಮತ್ತು ಸಂಶೋಧನಾ ಸಂಸ್ಥೆಯ ಅನಸ್ತೇಶಿಯಾ ವಿಭಾಗದ ಸಹಾಯಕ ಪ್ರಾಧ್ಯಾಪಕರಾದ ಡಾ.ಜಿ.ಹೆಚ್.ಮೇಘ, ಡಾ.ಪರಮಾನಂದ ರೆಡ್ಡಿ, ಬೋಧಕ ಸಿಬ್ಬಂದಿಗಳು ಮತ್ತು ಮೊದಲ ಮತ್ತು ಎರಡನೇ ವರ್ಷದ ಎಂಬಿಬಿಎಸ್ ವಿದ್ಯಾರ್ಥಿಗಳು ಇದ್ದರು.
