ಜೀವನದಲ್ಲಿ ಯಶಸ್ಸು, ನೆಮ್ಮದಿ ಹಾಗೂ ಸಂಬಂಧಗಳ ನಿರ್ವಹಣೆಗೆ ಸಂಬಂಧಿಸಿದಂತೆ ಪ್ರಾಚೀನ ಭಾರತದ ಶ್ರೇಷ್ಠ ಅರ್ಥಶಾಸ್ತ್ರಜ್ಞ ಮತ್ತು ನೀತಿಜ್ಞ ಆಚಾರ್ಯ ಚಾಣಕ್ಯರು ಹೇಳಿರುವ ವಿಷಯಗಳು ಇಂದಿಗೂ ಪ್ರಸ್ತುತ. ಕಷ್ಟದಲ್ಲಿರುವವರಿಗೆ ಸಹಾಯ ಮಾಡುವುದು ಮಾನವೀಯ ಧರ್ಮ ಹೌದಾದರೂ, ಎಲ್ಲರಿಗೂ ಕುರುಡಾಗಿ ಸಹಾಯ ಮಾಡುವುದು ಒಳಿತಲ್ಲ ಎಂದು ಚಾಣಕ್ಯರು ಎಚ್ಚರಿಸಿದ್ದಾರೆ. ಚಾಣಕ್ಯ ನೀತಿಯ ಪ್ರಕಾರ, ಕೆಲವೊಂದು ಸ್ವಭಾವದ ಜನರಿಗೆ ಸಹಾಯ ಹಸ್ತ ಚಾಚಿದರೆ ನಮಗೇ ಸಂಕಷ್ಟ ಎದುರಾಗುವ ಸಾಧ್ಯತೆ ಇರುತ್ತದೆ. ಹಾಗಾದರೆ ಯಾವ ರೀತಿಯ ಜನರಿಗೆ ಸಹಾಯ ಮಾಡಬಾರದು? ಇಲ್ಲಿದೆ ಸಂಪೂರ್ಣ ವಿವರ.
ಪದೇ ಪದೇ ತಪ್ಪು ಮಾಡುವವರು:
ಒಮ್ಮೆ ಅಥವಾ ಅರಿವಿಲ್ಲದೆ ತಪ್ಪು ಮಾಡಿದವರಿಗೆ ಸಹಾಯ ಮಾಡುವುದು ಸರಿ. ಆದರೆ ತಪ್ಪು ಮಾಡುತ್ತಲೇ ಸಾಗುವ ಹಾಗೂ ಅದರಿಂದ ಪಾಠ ಕಲಿಯದ ವ್ಯಕ್ತಿಗಳಿಗೆ ಮತ್ತೆ ಮತ್ತೆ ಸಹಾಯ ಮಾಡಬಾರದು. ತಮ್ಮ ನಡವಳಿಕೆಯನ್ನು ತಿದ್ದಿಕೊಳ್ಳದ ಇಂತಹ ಜನರಿಗೆ ಪದೇ ಪದೇ ಅವಕಾಶ ಅಥವಾ ಬೆಂಬಲ ನೀಡುವುದರಿಂದ ಯಾವುದೇ ಪ್ರಯೋಜನವಾಗುವುದಿಲ್ಲ ಎಂದು ಚಾಣಕ್ಯರು ಹೇಳುತ್ತಾರೆ.
ವಂಚಕರು ಹಾಗೂ ಮೋಸಗಾರರು:
ಮೋಸ ಮಾಡುವ ಸ್ವಭಾವದವರಿಗೆ ಅಥವಾ ನಂಬಿಕೆಗೆ ದ್ರೋಹ ಬಗೆಯುವವರಿಗೆ ಎಂದಿಗೂ ಕುರುಡಾಗಿ ಸಹಾಯ ಮಾಡಬೇಡಿ. ಇಂತಹ ಜನರಿಗೆ ಮಾಡುವ ನೆರವು ಕೊನೆಗೆ ನಿಮಗೇ ತಿರುಗುಬಾಣವಾಗುವ ಸಾಧ್ಯತೆ ಹೆಚ್ಚಿರುತ್ತದೆ.
ಕೃತಜ್ಞತೆ ಇಲ್ಲದ ಮನುಷ್ಯರು:
ಕೃತಘ್ನರು (ಮಾಡಿದ ಉಪಕಾರವನ್ನು ಮರೆಯುವವರು) ಅತ್ಯಂತ ಅಪಾಯಕಾರಿ. ನಾವು ಎಷ್ಟೇ ಕಷ್ಟಪಟ್ಟು ಸಹಾಯ ಮಾಡಿದರೂ ಅಂತಹವರು ಕೃತಜ್ಞತೆ ತೋರಿಸುವುದಿಲ್ಲ. ಇಂತಹವರ ಜೀವನದಲ್ಲಿ ನಮ್ಮ ಯಾವುದೇ ಪಾತ್ರ ಇರಬಾರದು ಹಾಗೂ ಇವರಿಂದ ಅಂತರ ಕಾಯ್ದುಕೊಳ್ಳುವುದೇ ಉತ್ತಮ.
ಸಮಯ ಮತ್ತು ಹಣ ವ್ಯರ್ಥ ಮಾಡಬೇಡಿ:
ತಿದ್ದಿಕೊಳ್ಳದ ಹಾಗೂ ದುರುದ್ದೇಶಪೂರಿತ ಜನರಿಗಾಗಿ ನಿಮ್ಮ ಅಮೂಲ್ಯವಾದ ಸಮಯ, ಹಣ ಮತ್ತು ಶಕ್ತಿಯನ್ನು ಪದೇ ಪದೇ ವ್ಯಯಿಸುವುದು ಬುದ್ಧಿವಂತಿಕೆಯಲ್ಲ. ಇದರಿಂದ ನಿಮ್ಮ ಸಂಪನ್ಮೂಲಗಳು ಪೋಲಾಗುವುದಲ್ಲದೆ ಮಾನಸಿಕ ಶಾಂತಿಯೂ ಹಾಳಾಗುತ್ತದೆ.
