ಆಚಾರ್ಯ ಚಾಣಕ್ಯರ ನೀತಿಶಾಸ್ತ್ರ ಇಂದಿಗೂ ಪ್ರಸ್ತುತ ಹಾಗೂ ಜನಪ್ರಿಯ. ಜೀವನದ ಪ್ರತಿಯೊಂದು ಹಂತದಲ್ಲೂ ಹೇಗೆ ಮುನ್ನಡೆಯಬೇಕು, ಕುಟುಂಬದಲ್ಲಿ ನೆಮ್ಮದಿ ಮತ್ತು ಸಾಮರಸ್ಯವನ್ನು ಹೇಗೆ ಕಾಪಾಡಿಕೊಳ್ಳಬೇಕು ಎಂಬುದರ ಬಗ್ಗೆ ಚಾಣಕ್ಯರು ಹಲವು ಉಪಯುಕ್ತ ಸಲಹೆಗಳನ್ನು ನೀಡಿದ್ದಾರೆ.
ಸಾಮಾನ್ಯವಾಗಿ ದಾಂಪತ್ಯ ಜೀವನದಲ್ಲಿ ಸಣ್ಣಪುಟ್ಟ ಜಗಳಗಳು, ಭಿನ್ನಾಭಿಪ್ರಾಯಗಳು ಸಹಜ. ಆದರೆ, ಕೆಲವೊಮ್ಮೆ ಇಂತಹ ಕಲಹಗಳಿಗೆ ಹೊರಗಿನವರ ಪ್ರಭಾವವೇ ಮುಖ್ಯ ಕಾರಣವಾಗುತ್ತದೆ. ಚಾಣಕ್ಯ ನೀತಿಯ ಪ್ರಕಾರ, ಪತ್ನಿಯ ಸುತ್ತಮುತ್ತ ಇರುವ ಕೆಲ ರೀತಿಯ ಸ್ನೇಹಿತರಿಂದ ವೈವಾಹಿಕ ಜೀವನ ಹಾಗೂ ಕುಟುಂಬದ ಶಾಂತಿ ಹಾಳಾಗುವ ಅಪಾಯವಿರುತ್ತದೆ. ಅಂತಹವರ ಕುರಿತು ಎಚ್ಚರಿಕೆ ವಹಿಸುವುದು ಅತ್ಯಗತ್ಯ.
ಯಾವ ರೀತಿಯ ಸ್ನೇಹಿತರಿಂದ ದೂರವಿರಬೇಕು?
ಕೆಟ್ಟ ಅಭ್ಯಾಸಗಳಿರುವವರು:
ಕೆಟ್ಟ ನಡತೆ ಅಥವಾ ದುಶ್ಚಟಗಳನ್ನು ಹೊಂದಿರುವ ಸ್ನೇಹಿತರಿಂದ ಸದಾ ಅಂತರ ಕಾಯ್ದುಕೊಳ್ಳುವುದು ಒಳ್ಳೆಯದು. ಇಂತಹವರ ಒಡನಾಟದಿಂದ ಕುಟುಂಬದಲ್ಲಿ ಅನಗತ್ಯ ತೊಂದರೆಗಳು ಮತ್ತು ಕೆಟ್ಟ ಪ್ರಭಾವಗಳು ಉಂಟಾಗಬಹುದು.
ಕುಟುಂಬ ಸಂಬಂಧಗಳ ಮೌಲ್ಯ ತಿಳಿಯದವರು:
ಕುಟುಂಬದ ಗೌರವ, ಮರ್ಯಾದೆ ಹಾಗೂ ಭಾವನಾತ್ಮಕ ಸಂಬಂಧಗಳನ್ನು ಅರ್ಥಮಾಡಿಕೊಳ್ಳದ ವ್ಯಕ್ತಿಗಳಿಂದ ದೂರವಿರಬೇಕು. ಇಂತಹವರ ಸಲಹೆ ಅಥವಾ ಮಧ್ಯಸ್ಥಿಕೆ ಕುಟುಂಬದಲ್ಲಿ ಹೊಸ ಸಮಸ್ಯೆಗಳನ್ನು ಹುಟ್ಟುಹಾಕಬಹುದು.
ಅತಿಯಾಗಿ ಜಂಬ ಕೊಚ್ಚಿಕೊಳ್ಳುವವರು:
ಯಾವಾಗಲೂ ತಮ್ಮ ಆಸ್ತಿ, ಅಂತಸ್ತು ಹಾಗೂ ಸಂಪತ್ತಿನ ಬಗ್ಗೆಯೇ ಬಡಾಯಿ ಕೊಚ್ಚಿಕೊಳ್ಳುವವರ ಸಹವಾಸ ಒಳ್ಳೆಯದಲ್ಲ. ಜೊತೆಗೆ, ಕುಟುಂಬದ ಆಂತರಿಕ ಆಸ್ತಿ ಮತ್ತು ಆರ್ಥಿಕ ವಿಚಾರಗಳನ್ನು ಇಂತಹವರ ಮುಂದೆ ಹಂಚಿಕೊಳ್ಳಬಾರದು.
ಹೋಲಿಕೆ ಮಾಡುವ ಹಾಗೂ ದುರಾಸೆ ಹೊಂದಿರುವವರು:
ಇತರರ ಜೀವನಶೈಲಿಯನ್ನು ನೋಡಿ ಸದಾ ತಮ್ಮನ್ನು ಹೋಲಿಸಿಕೊಳ್ಳುವ ಮತ್ತು ಅನಗತ್ಯ ಆಸೆ-ಆಕಾಂಕ್ಷೆಗಳನ್ನು ಹೊತ್ತಿರುವ ಸ್ನೇಹಿತರಿಂದ ದಾಂಪತ್ಯದಲ್ಲಿ ಅಸಮಾಧಾನ ಮೂಡುತ್ತದೆ. ಇದು ಗಂಡ-ಹೆಂಡತಿಯ ನಡುವೆ ಅತೃಪ್ತಿ ಮತ್ತು ಭಿನ್ನಾಭಿಪ್ರಾಯಕ್ಕೆ ದಾರಿಮಾಡಿಕೊಡುತ್ತದೆ.
