ಆಚಾರ್ಯ ಚಾಣಕ್ಯರ ನೀತಿ ಸೂತ್ರಗಳು ಇಂದಿಗೂ ಪ್ರಸ್ತುತ ಹಾಗೂ ದೈನಂದಿನ ಜೀವನಕ್ಕೆ ದಾರಿದೀಪವಾಗಿವೆ. ಮಾನವ ಸಂಬಂಧಗಳು, ಸ್ನೇಹ, ಪ್ರೀತಿ ಮತ್ತು ವ್ಯವಹಾರಗಳಲ್ಲಿ ವ್ಯಕ್ತಿಯು ಹೇಗೆ ನಡೆದುಕೊಳ್ಳಬೇಕು ಎಂಬುದರ ಬಗ್ಗೆ ಚಾಣಕ್ಯರು ಸ್ಪಷ್ಟವಾಗಿ ತಿಳಿಸಿದ್ದಾರೆ. ಚಾಣಕ್ಯ ನೀತಿಯ ಪ್ರಕಾರ, ಯಾವುದೇ ಸಂಬಂಧಕ್ಕೆ ಪ್ರೀತಿ ಎಷ್ಟು ಮುಖ್ಯವೋ, ನಂಬಿಕೆ ಅಷ್ಟೇ ಬಲವಾದ ಅಡಿಪಾಯವಾಗಿದೆ. ಒಂದು ವೇಳೆ ಆ ನಂಬಿಕೆಗೆ ಧಕ್ಕೆಯುಂಟಾದರೆ ಆ ಸಂಬಂಧದ ಗತಿಯೇನು ಎಂಬುದನ್ನು ಚಾಣಕ್ಯರು ಹೀಗೆ ವಿವರಿಸಿದ್ದಾರೆ:
ಒಡೆದ ಕನ್ನಡಿಯಂತೆ ನಂಬಿಕೆ
ಚಾಣಕ್ಯರ ಪ್ರಕಾರ, ನಂಬಿಕೆ ಕಳೆದುಕೊಂಡ ಜಾಗದಲ್ಲಿ ಏನೂ ಉಳಿಯುವುದಿಲ್ಲ. ಅದು ಒಡೆದ ಕನ್ನಡಿಯ ಸಮಾನ. ಒಡೆದ ಕನ್ನಡಿಯನ್ನು ಎಷ್ಟೇ ಜೋಡಿಸಿ ಅಂಟಿಸಿದರೂ ಅದರಲ್ಲಿ ಬಿರುಕುಗಳು ಉಳಿಯುತ್ತವೆಯೇ ಹೊರತು ಮೊದಲಿನಂತೆ ಸ್ಪಷ್ಟ ಪ್ರತಿಬಿಂಬ ಕಾಣಲು ಸಾಧ್ಯವಿಲ್ಲ. ಅದೇ ರೀತಿ, ಒಮ್ಮೆ ಮುರಿದ ನಂಬಿಕೆಯನ್ನು ಮರಳಿ ಪಡೆಯುವುದು ಅಸಾಧ್ಯ.
ನಂಬಿಕೆ ಇಲ್ಲದಿದ್ದರೆ ಪ್ರೀತಿಗೂ ಬೆಲೆಯಿಲ್ಲ
ಯಾವುದೇ ಸಂಬಂಧದಲ್ಲಿ ಅಪಾರ ಪ್ರೀತಿಯಿದ್ದರೂ, ಅಲ್ಲಿ ಪರಸ್ಪರ ನಂಬಿಕೆಯ ಕೊರತೆಯಿದ್ದರೆ ಆ ಪ್ರೀತಿಗೆ ಯಾವುದೇ ಮೌಲ್ಯವಿರುವುದಿಲ್ಲ. ಆದ್ದರಿಂದ ಪ್ರತಿಯೊಬ್ಬರೂ ತಮ್ಮ ಸಂಗಾತಿ ಅಥವಾ ಆಪ್ತರ ನಂಬಿಕೆಯನ್ನು ಉಳಿಸಿಕೊಳ್ಳುವಲ್ಲಿ ಅತ್ಯಂತ ಜಾಗರೂಕರಾಗಿರಬೇಕು.
ಹಳೆಯ ಬಾಂಧವ್ಯ ಮರುಕಳಿಸುವುದು ಕಷ್ಟ
ಒಬ್ಬ ವ್ಯಕ್ತಿಯ ಮೇಲೆ ಒಮ್ಮೆ ನಂಬಿಕೆ ನಶಿಸಿಹೋದರೆ, ಆ ವ್ಯಕ್ತಿಯೊಂದಿಗೆ ಮತ್ತೆ ಮೊದಲಿನಂತೆಯೇ ಬಾಂಧವ್ಯವನ್ನು ಮುಂದುವರಿಸುವುದು ಅತಿಯಾದ ಕಷ್ಟದ ಕೆಲಸ. ಮನಸ್ಸಿನಲ್ಲಿ ಸದಾ ಒಂದು ಹಿಂಜರಿಕೆ ಅಥವಾ ಅಂತರ ಉಳಿದೇ ಇರುತ್ತದೆ.
ಸಣ್ಣ ಮಾತುಗಳೂ ಅನುಮಾನಕ್ಕೆ ಕಾರಣ
ನಂಬಿಕೆ ಇಲ್ಲದ ಜಾಗದಲ್ಲಿ ಸಣ್ಣ ಪುಟ್ಟ ಮಾತುಗಳು ಅಥವಾ ಸಣ್ಣ ತಪ್ಪುಗಳೂ ದೊಡ್ಡ ಮಟ್ಟದ ಸಂಶಯಕ್ಕೆ ಕಾರಣವಾಗುತ್ತವೆ. ಇದು ಸಂಬಂಧದಲ್ಲಿ ನಿರಂತರ ಕಲಹ, ಅಶಾಂತಿಯನ್ನು ಸೃಷ್ಟಿಸುತ್ತದೆ. ಆದ್ದರಿಂದ ನಂಬಿಕೆಯು ಜೀವಂತವಾಗಿರುವಾಗಲೇ ಅದನ್ನು ಜತನದಿಂದ ಕಾಪಾಡಿಕೊಳ್ಳಬೇಕು.
ಜೊತೆಯಲ್ಲಿದ್ದರೂ ದೂರವೇ ಮನಸ್ಸುಗಳು!
ಸಂಬಂಧವೊಂದರ ಉಳಿವಿಗೆ ಪ್ರೀತಿಯಷ್ಟೇ ನಂಬಿಕೆಯೂ ಅನಿವಾರ್ಯ. ನಂಬಿಕೆ ಕಳೆದುಹೋದಾಗ ಜನರು ದೈಹಿಕವಾಗಿ ಜೊತೆಯಲ್ಲೇ ಇದ್ದರೂ, ಅವರ ಮನಸ್ಸುಗಳು ಮಾತ್ರ ನೂರಾರು ಮೈಲಿಗಳಷ್ಟು ದೂರ ಉಳಿದುಬಿಡುತ್ತವೆ.
