ದೆಹಲಿ: 2027ರ ಬೋರ್ಡ್ ಪರೀಕ್ಷೆಗಳಿಗೆ ಸಂಬಂಧಿಸಿದಂತೆ ವಿದ್ಯಾರ್ಥಿಗಳ ನೋಂದಣಿ ಮಾಹಿತಿ ಹಾಗೂ ಅಭ್ಯರ್ಥಿಗಳ ಪಟ್ಟಿ (LOC) ಸಲ್ಲಿಸುವ ಮುನ್ನ ಎಲ್ಲಾ ವಿವರಗಳನ್ನು ಕೂಲಂಕಷವಾಗಿ ಪರಿಶೀಲಿಸುವಂತೆ ಕೇಂದ್ರೀಯ ಪ್ರೌಢ ಶಿಕ್ಷಣ ಮಂಡಳಿ (CBSE) ತನ್ನ ಸಂಯೋಜಿತ ಶಾಲೆಗಳಿಗೆ ಕಟ್ಟುನಿಟ್ಟಿನ ನಿರ್ದೇಶನ ನೀಡಿದೆ. ಹಿಂದಿನ ಪರೀಕ್ಷಾ ಅವಧಿಗಳಲ್ಲಿ ಪದೇ ಪದೇ ಕಂಡುಬಂದ ತಪ್ಪುಗಳು ಹಾಗೂ ವಿಳಂಬವನ್ನು ತಪ್ಪಿಸಲು ಈ ಕ್ರಮ ಕೈಗೊಳ್ಳಲಾಗಿದೆ.
ಸೆಪ್ಟೆಂಬರ್ 10ರಂದು ಹೊರಡಿಸಲಾದ ಸುತ್ತೋಲೆಯಲ್ಲಿ, 9 ಮತ್ತು 11ನೇ ತರಗತಿಗಳ ನೋಂದಣಿ ಪ್ರಕ್ರಿಯೆ ಹಾಗೂ 10 ಮತ್ತು 12ನೇ ತರಗತಿಗಳ ‘ಎಲ್ಒಸಿ’ (List of Candidates) ಸಲ್ಲಿಕೆ ಪ್ರಕ್ರಿಯೆ ಶೀಘ್ರದಲ್ಲೇ ಆರಂಭವಾಗಲಿದೆ ಎಂದು ಮಂಡಳಿ ತಿಳಿಸಿದೆ. ನಿಗದಿತ ಸಮಯದೊಳಗೆ ವಿದ್ಯಾರ್ಥಿಗಳು ಮತ್ತು ವಿಷಯಗಳಿಗೆ ಸಂಬಂಧಿಸಿದ ಎಲ್ಲಾ ಮಾಹಿತಿಯನ್ನು ನಿಖರವಾಗಿ ಸಲ್ಲಿಸುವುದನ್ನು ಶಾಲೆಗಳು ಖಚಿತಪಡಿಸಿಕೊಳ್ಳಬೇಕು ಎಂದು ತಾಕೀತು ಮಾಡಿದೆ.
ಪರಿಶೀಲಿಸಬೇಕಾದ ಪ್ರಮುಖ ವಿವರಗಳು
ಶಾಲಾ ದಾಖಲಾತಿ ರಿಜಿಸ್ಟರ್ನಲ್ಲಿರುವಂತೆ ವಿದ್ಯಾರ್ಥಿಯ ಪೂರ್ಣ ಹೆಸರು ಮತ್ತು ಸರಿಯಾದ ಕಾಗುಣಿತ (Spelling).
ಜನ್ಮದಿನಾಂಕ, ಲಿಂಗ ಮತ್ತು ಪ್ರವರ್ಗ (Category).
ಪೋಷಕರು ಅಥವಾ ಪಾಲಕರ ಪೂರ್ಣ ಹೆಸರು.
ವಿದ್ಯಾರ್ಥಿಯ ಅಧ್ಯಯನ ಯೋಜನೆಗೆ ಅನುಗುಣವಾಗಿ ನಿಖರವಾದ ವಿಷಯವಾರು (Subject-wise) ನೋಂದಣಿ.
ನಿಗದಿತ ಮಾದರಿಯಲ್ಲಿ ವಿದ್ಯಾರ್ಥಿಗಳ ಭಾವಚಿತ್ರ ಹಾಗೂ ಸಹಿ.
ಸಲ್ಲಿಸಿದ ಮಾಹಿತಿಯಲ್ಲಿ ಯಾವುದೇ ದೋಷಗಳಿದ್ದರೆ ಮುಂದಿನ ದಿನಗಳಲ್ಲಿ ಪರೀಕ್ಷಾ ಪ್ರಕ್ರಿಯೆಯಲ್ಲಿ ಗಂಭೀರ ಸಮಸ್ಯೆಗಳು ಎದುರಾಗಬಹುದು ಎಂದು ಮಂಡಳಿ ಎಚ್ಚರಿಸಿದೆ.
ಹಿಂದಿನ ತಪ್ಪುಗಳನ್ನು ಉಲ್ಲೇಖಿಸಿದ ಮಂಡಳಿ:
ಇತ್ತೀಚಿನ ವರ್ಷಗಳಲ್ಲಿ ಶಾಲೆಗಳು ಸಲ್ಲಿಸಿದ ತಪ್ಪು ಮಾಹಿತಿಯಿಂದಾಗಿ ಪರೀಕ್ಷಾ ಪ್ರಕ್ರಿಯೆಯಲ್ಲಿ ಅನಗತ್ಯ ವಿಳಂಬ ಮತ್ತು ಆಡಳಿತಾತ್ಮಕ ತೊಡಕುಗಳು ಉಂಟಾಗಿವೆ ಎಂದು ಸಿಬಿಎಸ್ಇ ಅಸಮಾಧಾನ ವ್ಯಕ್ತಪಡಿಸಿದೆ. ತಪ್ಪು ವಿಷಯ ಸಂಕೇತಗಳನ್ನು (Subject codes) ನಮೂದಿಸಿ ನಂತರ ತಿದ್ದುಪಡಿಗೆ ಕೋರುವುದು, ವಿದ್ಯಾರ್ಥಿ ಅಥವಾ ಪೋಷಕರ ವಿವರಗಳಲ್ಲಿ ತಪ್ಪುಗಳು, ಹಾಗೂ ನಿಗದಿತ ಸಮಯದೊಳಗೆ ಎಲ್ಒಸಿ ಸಲ್ಲಿಸದಿರುವುದು ಪ್ರಮುಖ ಸಮಸ್ಯೆಗಳಾಗಿ ಪರಿಣಮಿಸಿವೆ. ಪದೇ ಪದೇ ಎಚ್ಚರಿಸಿದರೂ ಇಂತಹ ದೋಷಗಳು ಮರುಕಳಿಸುತ್ತಿದ್ದು, ಇದು ಪರೀಕ್ಷಾ ವೇಳಾಪಟ್ಟಿಯ ಮೇಲೆ ಪರಿಣಾಮ ಬೀರುವುದರ ಜೊತೆಗೆ ವಿದ್ಯಾರ್ಥಿಗಳಿಗೂ ತೊಂದರೆ ಉಂಟುಮಾಡುತ್ತಿದೆ ಎಂದು ಮಂಡಳಿ ಹೇಳಿದೆ.
ಸಿಬಿಎಸ್ಇ ಪರೀಕ್ಷಾ ನಿಯಂತ್ರಕರಾದ ಡಾ. ಸಂಯಮ್ ಭಾರದ್ವಾಜ್ ಅವರು ಈ ಸುತ್ತೋಲೆಯನ್ನು ಹೊರಡಿಸಿದ್ದು, ಕೇಂದ್ರೀಯ ವಿದ್ಯಾಲಯ ಸಂಘಟನೆ, ನವೋದಯ ವಿದ್ಯಾಲಯ ಸಮಿತಿ, ಏಕಲವ್ಯ ಮಾದರಿ ವಸತಿ ಶಾಲೆಗಳು ಹಾಗೂ ಸೈನಿಕ ಶಾಲೆಗಳು ಸೇರಿದಂತೆ ಎಲ್ಲಾ ಶಿಕ್ಷಣ ಸಂಸ್ಥೆಗಳ ಮುಖ್ಯಸ್ಥರಿಗೆ ರವಾನಿಸಿದ್ದಾರೆ. ನೋಂದಣಿ ಮತ್ತು ಎಲ್ಒಸಿ ಸಲ್ಲಿಕೆಯ ನಿಖರವಾದ ದಿನಾಂಕವನ್ನು ಶೀಘ್ರದಲ್ಲೇ ಪ್ರಕಟಿಸುವುದಾಗಿ ಮಂಡಳಿ ತಿಳಿಸಿದೆ.
