ನ್ಯೂಯಾರ್ಕ್ : ಮುಂದಿನ ಕೆಲವೇ ವರ್ಷಗಳಲ್ಲಿ ಜಾಗತಿಕ ತಾಪಮಾನದ ಏರಿಕೆಯು 1.5 ಡಿಗ್ರಿ ಸೆಲ್ಸಿಯಸ್ ಮಿತಿಯನ್ನು ದಾಟುವ ಸಾಧ್ಯತೆಯಿದೆ ಎಂದು ವಿಶ್ವಸಂಸ್ಥೆಯ ಪರಿಸರ ಕಾರ್ಯಕ್ರಮ (ಯುಎನ್ಇಪಿ) ಬಿಡುಗಡೆ ಮಾಡಿರುವ ನೂತನ ವರದಿ ಎಚ್ಚರಿಸಿದೆ. ತಾಪಮಾನದ ಈ ಹೆಚ್ಚಳವು ಹವಾಮಾನ ವೈಪರೀತ್ಯ, ಜೀವವೈವಿಧ್ಯದ ನಾಶ ಹಾಗೂ ಸಣ್ಣ ದ್ವೀಪ ರಾಷ್ಟ್ರಗಳು ನೀರಿನಲ್ಲಿ ಮುಳುಗಡೆಯಾಗುವ ಅಪಾಯವನ್ನು ತೀವ್ರಗೊಳಿಸಲಿದೆ ಎಂದು ತಿಳಿಸಲಾಗಿದೆ.
ಬುಧವಾರ ಬಿಡುಗಡೆಯಾದ “ಲಿಮಿಟಿಂಗ್ ಓವರ್ಶೂಟ್” (Limiting Overshoot) ಎಂಬ ವರದಿಯಲ್ಲಿ, ಹಸಿರುಮನೆ ಅನಿಲಗಳ (Greenhouse gases) ಹೊರಸೂಸುವಿಕೆಯನ್ನು ತಕ್ಷಣದಿಂದಲೇ ಗಣನೀಯವಾಗಿ ಕಡಿತಗೊಳಿಸುವಂತೆ ಒತ್ತಿಹೇಳಲಾಗಿದೆ. ತಾಪಮಾನ 1.5 ಡಿಗ್ರಿ ಮೀರಿದ ನಂತರ, ಹೆಚ್ಚಾಗುವ ಪ್ರತಿಯೊಂದು ಡಿಗ್ರಿ ಅಂಶವೂ ಪರಿಸರದ ಮೇಲೆ ಭಾರಿ ದುಷ್ಪರಿಣಾಮ ಬೀರಲಿದೆ. ಕರಾವಳಿ ತಗ್ಗು ಪ್ರದೇಶದ ನಗರಗಳು ಮತ್ತು ಸಣ್ಣ ದ್ವೀಪ ದೇಶಗಳು ಮುಳುಗುವ ಭೀತಿ ಎದುರಿಸುತ್ತಿವೆ ಎಂದು ವರದಿ ಹೇಳಿದೆ.
ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಆಂಟೋನಿಯೊ ಗುಟೆರಸ್ ಮಾತನಾಡಿ, “ಈ ಬೇಸಿಗೆಯ ಅತಿಯಾದ ಶಾಖ, ಕಾಡ್ಗಿಚ್ಚು ಮತ್ತು ಮಾರಕ ಪ್ರವಾಹಗಳು ಭವಿಷ್ಯದಲ್ಲಿ ಎದುರಾಗಬಹುದಾದ ಅಪಾಯದ ಮುನ್ಸೂಚನೆಗಳಾಗಿವೆ. ತಾಪಮಾನ 1.5 ಡಿಗ್ರಿ ಮೀರಿದರೂ, ಆ ಅವಧಿಯನ್ನು ಆದಷ್ಟು ಕಡಿಮೆ ಮತ್ತು ಸೀಮಿತವಾಗಿರಿಸಲು ನಾವು ಜಾಗತಿಕ ಮಟ್ಟದಲ್ಲಿ ಬಲವಾದ ಇಚ್ಛಾಶಕ್ತಿಯೊಂದಿಗೆ ಕಾರ್ಯನಿರ್ವಹಿಸಬೇಕು,” ಎಂದು ತಿಳಿಸಿದ್ದಾರೆ.
ವರದಿಯ ಪ್ರಕಾರ, ತಾಪಮಾನ ಹೆಚ್ಚಳದ ತೀವ್ರತೆಯನ್ನು ತಗ್ಗಿಸಲು “ಓವರ್ಶೂಟ್, ಪೀಕ್ ಮತ್ತು ಡಿಕ್ಲೈನ್” (ಏರಿಕೆ, ಗರಿಷ್ಠ ಮಟ್ಟ ತಲುಪುವಿಕೆ ಮತ್ತು ನಂತರ ಇಳಿಕೆ) ವಿಧಾನವನ್ನು ಅತ್ಯುತ್ತಮ ಪರ್ಯಾಯವಾಗಿ ಸೂಚಿಸಲಾಗಿದೆ. ಮಿಥೇನ್ ಸೇರಿದಂತೆ ಹಸಿರುಮನೆ ಅನಿಲಗಳ ಹೊರಸೂಸುವಿಕೆಯನ್ನು ತಕ್ಷಣವೇ ನಿಯಂತ್ರಿಸುವುದು.
‘ನೆಟ್-ಜೀರೋ’ ಗುರಿ ತಲುಪುವುದು.
ಅರಣ್ಯೀಕರಣ ಮತ್ತು ವಾತಾವರಣದಿಂದ ಇಂಗಾಲವನ್ನು ಹೀರಿಕೊಳ್ಳುವ ತಂತ್ರಜ್ಞಾನಗಳ (ಕಾರ್ಬನ್ ಡೈಆಕ್ಸೈಡ್ ರಿಮೂವಲ್ – CDR) ಮೂಲಕ ದೀರ್ಘಾವಧಿಯಲ್ಲಿ ತಾಪಮಾನವನ್ನು ಮರಳಿ ಇಳಿಸುವುದು.
ಯುಎನ್ಇಪಿ ಕಾರ್ಯನಿರ್ವಾಹಕ ನಿರ್ದೇಶಕಿ ಇಂಗರ್ ಆಂಡರ್ಸನ್ ಮಾತನಾಡಿ, “ಹವಾಮಾನ ಬದಲಾವಣೆಯ ವಿರುದ್ಧ ಹೋರಾಡಲು ಇದು ಸೂಕ್ತ ಸಮಯ. ಹಸಿರುಮನೆ ಅನಿಲಗಳನ್ನು ಕಡಿತಗೊಳಿಸಿ, ಜಾಗತಿಕ ಹವಾಮಾನ ಬದಲಾವಣೆಗೆ ಹೊಂದಿಕೊಳ್ಳುವ ಸಾಮರ್ಥ್ಯವನ್ನು ಹೆಚ್ಚಿಸಿಕೊಳ್ಳುವ ಮೂಲಕ ತಾಪಮಾನ 1.5 ಡಿಗ್ರಿ ದಾಟುವ ಸಮಯವನ್ನು ಕಡಿಮೆ ಮಾಡಬೇಕಿದೆ,” ಎಂದು ಎಚ್ಚರಿಸಿದ್ದಾರೆ.
