ಫ್ರಿಡ್ಜ್‌ನಲ್ಲಿ ನೀರು ತುಂಬುವ ಸಮಸ್ಯೆಗೆ ಇಲ್ಲಿದೆ 6 ಪರಿಣಾಮಕಾರಿ ಸಲಹೆಗಳು

ಮಳೆಗಾಲದಲ್ಲಿ ಅಥವಾ ವಾತಾವರಣದಲ್ಲಿ ತೇವಾಂಶ ಹೆಚ್ಚಿದ್ದಾಗ ಅನೇಕ ಮನೆಗಳಲ್ಲಿ ಫ್ರಿಡ್ಜ್ (ರೆಫ್ರಿಜರೇಟರ್) ಒಳಭಾಗದಲ್ಲಿ ನೀರು ಸಂಗ್ರಹವಾಗುವ ಸಮಸ್ಯೆ ಎದುರಾಗುತ್ತದೆ. ತರಕಾರಿ ಇಡುವ ಟ್ರೇನಲ್ಲಿ ಅಥವಾ ಫ್ರಿಡ್ಜ್‌ನ ಹಿಂಭಾಗದ ಗೋಡೆಯ ಮೇಲೆ ನೀರಿನ ಹನಿಗಳು ಕಾಣಿಸಿಕೊಳ್ಳುತ್ತವೆ. ಈ ಸಮಸ್ಯೆಗೆ ಮೆಕ್ಯಾನಿಕ್ ಅಥವಾ ಟೆಕ್ನಿಷಿಯನ್ ಕರೆಯುವ ಅಗತ್ಯವಿಲ್ಲದೆ, ಮನೆಯಲ್ಲೇ ಸರಳವಾಗಿ ಪರಿಹಾರ ಕಂಡುಕೊಳ್ಳಬಹುದು.

ಫ್ರಿಡ್ಜ್ ಒಳಗೆ ನೀರು ಜಮೆಯಾಗಲು ಕಾರಣವೇನು?

ಮಳೆಗಾಲದಲ್ಲಿ ವಾತಾವರಣದ ಗಾಳಿಯಲ್ಲಿ ತೇವಾಂಶ (ಆರ್ದ್ರತೆ) ಹೆಚ್ಚಾಗಿರುತ್ತದೆ. ಇಂತಹ ಸಮಯದಲ್ಲಿ ಫ್ರಿಡ್ಜ್ ಬಾಗಿಲನ್ನು ಪದೇ ಪದೇ ತೆರೆದಾಗ, ಹೊರಗಿನ ತೇವಾಂಶವುಳ್ಳ ಬಿಸಿ ಗಾಳಿ ಫ್ರಿಡ್ಜ್ ಒಳಗೆ ಪ್ರವೇಶಿಸುತ್ತದೆ. ಈ ಗಾಳಿಯು ಫ್ರಿಡ್ಜ್‌ನ ತಂಪಾದ ಮೇಲ್ಮೈಗೆ ತಾಗಿದಾಗ ನೀರಿನ ಹನಿಗಳಾಗಿ (Condensation) ಮಾರ್ಪಟ್ಟು, ಕ್ರಮೇಣ ಫ್ರಿಡ್ಜ್‌ನ ಕೆಳಭಾಗದಲ್ಲಿ ನೀರಾಗಿ ಸಂಗ್ರಹವಾಗುತ್ತದೆ.

ಸಮಸ್ಯೆ ಸರಿಪಡಿಸಲು 6 ಪ್ರಮುಖ ಸಲಹೆಗಳು:

ತಾಪಮಾನ (Temperature) ಸರಿಯಾಗಿ ಹೊಂದಿಸಿ:

ಮಳೆಗಾಲದಲ್ಲಿ ಹೊರಗಿನ ವಾತಾವರಣ ಅತಿಯಾದ ಬಿಸಿಯಾಗಿರುವುದಿಲ್ಲ. ಆದ್ದರಿಂದ ಫ್ರಿಡ್ಜ್ ತಾಪಮಾನವನ್ನು 3 ರಿಂದ 5 ಡಿಗ್ರಿ ಸೆಲ್ಸಿಯಸ್ ನಡುವೆ ಇರಿಸಿ. ನೋಬ್ ಇದ್ದರೆ ಅದನ್ನು 3 ಅಥವಾ 4 ಕ್ಕೆ ಹೊಂದಿಸಿ. ತೀರಾ ಕಡಿಮೆ ತಾಪಮಾನಕ್ಕೆ ಇಟ್ಟರೆ ಒಳಗೆ ನೀರಿನ ಹನಿಗಳು ಹೆಚ್ಚಾಗುತ್ತವೆ.

ಬಾಗಿಲನ್ನು ಪದೇ ಪದೇ ತೆರೆಯಬೇಡಿ:

ಪ್ರತಿ ಬಾರಿ ಬಾಗಿಲು ತೆರೆದಾಗಲೂ ಹೊರಗಿನ ತೇವಾಂಶ ಒಳಗೆ ಹೋಗುತ್ತದೆ. ಆದ್ದರಿಂದ ಅಗತ್ಯವಿದ್ದಾಗ ಮಾತ್ರ ಬಾಗಿಲು ತೆಗೆದು ತಕ್ಷಣ ಮುಚ್ಚಿ.

ಡೋರ್ ರಬ್ಬರ್ (ಗ್ಯಾಸ್ಕೆಟ್) ಪರಿಶೀಲಿಸಿ:

ಫ್ರಿಡ್ಜ್ ಬಾಗಿಲಂಚಿನಲ್ಲಿರುವ ರಬ್ಬರ್ (ಗ್ಯಾಸ್ಕೆಟ್) ಸಡಿಲವಾಗಿದೆಯೇ, ಹರಿದಿದೆಯೇ ಅಥವಾ ಕೊಳಕಾಗಿದೆಯೇ ಎಂದು ಪರೀಕ್ಷಿಸಿ. ಗ್ಯಾಸ್ಕೆಟ್ ಸರಿಯಾಗಿ ಕೂರದಿದ್ದರೆ ಹೊರಗಿನ ಗಾಳಿ ಒಳಗೆ ಹೋಗುತ್ತಿರುತ್ತದೆ. ಅದನ್ನು ಕಾಲಕಾಲಕ್ಕೆ ಸ್ವಚ್ಛಗೊಳಿಸಿ ಅಥವಾ ಹಾಳಾಗಿದ್ದರೆ ಬದಲಾಯಿಸಿ.

ಡ್ರೈನ್ ಹೋಲ್ (ನೀರು ಹೋಗುವ ರಂಧ್ರ) ಸ್ವಚ್ಛಗೊಳಿಸಿ:

ಫ್ರಿಡ್ಜ್‌ನ ಒಳಗೆ ಹರಿಯುವ ನೀರು ಹೊರಹೋಗಲು ಸಣ್ಣ ರಂಧ್ರವನ್ನು ಕೊಡಲಾಗಿರುತ್ತದೆ. ಧೂಳು ಅಥವಾ ಆಹಾರದ ಚೂರುಗಳಿಂದ ಈ ರಂಧ್ರ ಮುಚ್ಚಿಹೋದರೆ ನೀರು ಹೊರಗೆ ಹೋಗದೆ ಒಳಗೇ ಸಂಗ್ರಹವಾಗುತ್ತದೆ. ಇದನ್ನು ಸಣ್ಣ ತಂತಿ ಅಥವಾ ಬ್ರಷ್ ಬಳಸಿ ಸ್ವಚ್ಛಗೊಳಿಸಿ.

ಅತಿಯಾಗಿ ಸಾಮಗ್ರಿಗಳನ್ನು ತುಂಬಬೇಡಿ:

ಫ್ರಿಡ್ಜ್ ಒಳಗೆ ಸಾಮಗ್ರಿಗಳನ್ನು ಗಿಡಿದು ತುಂಬಿದರೆ ತಂಪಾದ ಗಾಳಿಯ ಸಂಚಾರ (Airflow) ಸರಿಯಾಗಿ ಆಗುವುದಿಲ್ಲ. ಇದರಿಂದ ತೇವಾಂಶ ಹೆಚ್ಚಾಗಿ ನೀರು ಸಂಗ್ರಹವಾಗಲು ಪ್ರಾರಂಭವಾಗುತ್ತದೆ.

ಬಿಸಿ ಆಹಾರವನ್ನು ನೇರವಾಗಿ ಫ್ರಿಡ್ಜ್‌ನಲ್ಲಿ ಇಡಬೇಡಿ:

ಬಿಸಿ ಆಹಾರ ಅಥವಾ ಹಾಲನ್ನು ತಕ್ಷಣ ಫ್ರಿಡ್ಜ್ ಒಳಗೆ ಇಡಬಾರದು. ಬಿಸಿ ಆಹಾರದಿಂದ ಬರುವ ಹಾವಿ (ಆವಿ) ತಂಪಾದ ಗಾಳಿಗೆ ತಾಗಿ ನೀರಿನ ಹನಿಗಳಾಗಿ ಮಾರ್ಪಡುತ್ತದೆ. ಆಹಾರ ಸಾಮಾನ್ಯ ತಾಪಮಾನಕ್ಕೆ ಬಂದ ನಂತರವೇ ಫ್ರಿಡ್ಜ್‌ನಲ್ಲಿಡಿ.

ಟೆಕ್ನಿಷಿಯನ್ ಸಹಾಯ ಯಾವಾಗ ಬೇಕು?

ಮೇಲೆ ತಿಳಿಸಿದ ಎಲ್ಲಾ ಉಪಾಯಗಳನ್ನು ಅನುಸರಿಸಿದ ನಂತರವೂ ಫ್ರಿಡ್ಜ್‌ನಲ್ಲಿ ನೀರು ನಿಲ್ಲುವ ಸಮಸ್ಯೆ ಮುಂದುವರಿದರೆ, ಅದು ಕೂಲಿಂಗ್ ಸಿಸ್ಟಮ್, ಥರ್ಮೋಸ್ಟಾಟ್ ಅಥವಾ ಆಟೋಮ್ಯಾಟಿಕ್ ಡಿಫ್ರಾಸ್ಟ್ ಸೆನ್ಸಾರ್‌ನ ದೋಷವಾಗಿರಬಹುದು. ಅಂತಹ ಸಂದರ್ಭದಲ್ಲಿ ನೀವೇ ಸರಿಪಡಿಸಲು ಹೋಗದೆ ಅಧಿಕೃತ ಸೇವಾ ಕೇಂದ್ರದ (Service Center) ತಂತ್ರಜ್ಞರನ್ನು ಸಂಪರ್ಕಿಸುವುದು ಸೂಕ್ತ.