ವಿಶ್ವ ಶ್ವಾಸಕೋಶ ಕ್ಯಾನ್ಸರ್ ದಿನ: ಧೂಮಪಾನ ಮಾತ್ರವಲ್ಲ, ಈ ದೈನಂದಿನ ಅಭ್ಯಾಸಗಳೂ ಶ್ವಾಸಕೋಶದ ಆರೋಗ್ಯಕ್ಕೆ ಮಾರಕ!

ಬೆಂಗಳೂರು.ಜುಲೈ.31: ಇಂದಿನ ಆಧುನಿಕ ಜೀವನಶೈಲಿಯಲ್ಲಿ ಅನೇಕರು ಶ್ವಾಸಕೋಶಕ್ಕೆ ಸಂಬಂಧಿಸಿದ ನಾನಾ ರೀತಿಯ ಆರೋಗ್ಯ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ. ಶ್ವಾಸಕೋಶದ ಕಾಯಿಲೆಗಳು ಮತ್ತು ಶ್ವಾಸಕೋಶದ ಕ್ಯಾನ್ಸರ್‌ಗೆ ಧೂಮಪಾನವೇ ಅತ್ಯಂತ ದೊಡ್ಡ ಕಾರಣ ಎಂದು ಪರಿಗಣಿಸಲಾಗಿದೆ. ನಮ್ಮ ದೇಹಕ್ಕೆ ಆಮ್ಲಜನಕವನ್ನು ಪೂರೈಸಿ, ಕಾರ್ಬನ್ ಡೈಆಕ್ಸೈಡ್ ಅನ್ನು ಹೊರಹಾಕುವ ಪ್ರಮುಖ ಕೆಲಸವನ್ನು ಮಾಡುವ ಶ್ವಾಸಕೋಶಗಳ ಆರೈಕೆಯತ್ತ ಬಹುತೇಕರು ಗಮನ ಹರಿಸುವುದಿಲ್ಲ. ಇದು ಭವಿಷ್ಯದಲ್ಲಿ ಗಂಭೀರ ರೋಗಗಳಿಗೆ ದಾರಿ ಮಾಡಿಕೊಡುತ್ತದೆ.

ಆಗಸ್ಟ್ 1 ‘ವಿಶ್ವ ಶ್ವಾಸಕೋಶ ಕ್ಯಾನ್ಸರ್ ದಿನ’ದ (World Lung Cancer Day) ಈ ಸಂದರ್ಭದಲ್ಲಿ ಶ್ವಾಸಕೋಶದ ಆರೋಗ್ಯದ ಬಗ್ಗೆ ಜಾಗೃತರಾಗಿರುವುದು ಅತ್ಯಗತ್ಯ. ಕೇವಲ ಧೂಮಪಾನ ಮಾಡುವವರಿಗೆ ಮಾತ್ರವಲ್ಲ, ನಮ್ಮ ದಿನನಿತ್ಯದ ಕೆಲವು ತಪ್ಪು ಅಭ್ಯಾಸಗಳೂ ಶ್ವಾಸಕೋಶವನ್ನು ಸೈಲೆಂಟ್ ಆಗಿ ಹಾಳುಮಾಡಬಹುದು. ಹೀಗಾಗಿ ಶ್ವಾಸಕೋಶವನ್ನು ಆರೋಗ್ಯವಾಗಿಡಲು ಅಗತ್ಯ ಜಾಗೃತಿ ವಹಿಸುವುದು ಮುಖ್ಯವಾಗಿದೆ.

ಧೂಮಪಾನದ ಹೊರತಾಗಿ ಶ್ವಾಸಕೋಶಕ್ಕೆ ಹಾನಿ ಮಾಡುವ ಅಭ್ಯಾಸಗಳು:

ನ್ಯಾಷನಲ್ ಹಾರ್ಟ್, ಲಂಗ್ ಅಂಡ್ ಬ್ಲಡ್ ಇನ್‌ಸ್ಟಿಟ್ಯೂಟ್ (NHLBI) ಪ್ರಕಾರ, ಧೂಮಪಾನದ ಹೊರತಾಗಿಯೂ ಕೆಲವು ದೈನಂದಿನ ಅಭ್ಯಾಸಗಳು ಶ್ವಾಸಕೋಶದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತವೆ:

ಪ್ಯಾಸಿವ್ ಸ್ಮೋಕಿಂಗ್ (Passive Smoking): ಸಿಗರೇಟ್ ಅಥವಾ ಬೀಡಿ ಸೇದುವವರ ಪಕ್ಕದಲ್ಲಿದ್ದು, ಆ ಹೊಗೆಯನ್ನು ಸೇವಿಸುವುದರಿಂದ ಶ್ವಾಸಕೋಶದ ಕಾಯಿಲೆಗಳ ಅಪಾಯ ಹೆಚ್ಚಾಗುತ್ತದೆ.

ವಾಯು ಮಾಲಿನ್ಯ: ಹೆಚ್ಚು ಮಾಲಿನ್ಯವಿರುವ ಪ್ರದೇಶಗಳಲ್ಲಿ ದೀರ್ಘಕಾಲ ಇರುವುದು ಮತ್ತು ಮನೆಯೊಳಗಿನ ಕಲುಷಿತ ಗಾಳಿಯೂ ಶ್ವಾಸಕೋಶದ ಮೇಲೆ ಪ್ರಭಾವ ಬೀರುತ್ತದೆ.

ಉತ್ತಮ ಗಾಳಿ-ಬೆಳಕಿನ ಕೊರತೆ: ಸರಿಯಾದ ಗಾಳಿಯಾಡದ ಮನೆಗಳು ಹಾಗೂ ಅಡುಗೆ ಮಾಡುವಾಗ ಬರುವ ಹೊಗೆ ಹೊರಗೆ ಹೋಗಲು ವ್ಯವಸ್ಥೆ ಇಲ್ಲದಿರುವುದು ಶ್ವಾಸಕೋಶಕ್ಕೆ ಹಾನಿಕರ.

ರಾಸಾಯನಿಕಗಳ ಬಳಕೆ: ತೀವ್ರ ಪ್ರಮಾಣದ ಕೆಮಿಕಲ್ ಹೊಂದಿರುವ ಕ್ಲೀನಿಂಗ್ ಪ್ರಾಡಕ್ಟ್‌ಗಳು ಮತ್ತು ಏರೋಸಾಲ್ ಸ್ಪ್ರೇಗಳನ್ನು ಹೆಚ್ಚು ಬಳಸುವುದು ಅಪಾಯಕಾರಿ.

ಮಾಸ್ಕ್ ಧರಿಸದಿರುವುದು: ಧೂಳು ಅಥವಾ ರಾಸಾಯನಿಕವಿರುವ ಸ್ಥಳಗಳಲ್ಲಿ ಮಾಸ್ಕ್ ಧರಿಸದೇ ಕೆಲಸ ಮಾಡುವುದರಿಂದ ರೋಗಗಳ ಅಪಾಯ ಹೆಚ್ಚುತ್ತದೆ.

ದೈಹಿಕ ಚಟುವಟಿಕೆಯ ಕೊರತೆ: ದೈಹಿಕ ಶ್ರಮ ಇಲ್ಲದಿರುವುದರಿಂದ ಶ್ವಾಸಕೋಶಗಳು ತಮ್ಮ ಪೂರ್ಣ ಸಾಮರ್ಥ್ಯದಲ್ಲಿ ಕೆಲಸ ಮಾಡಲು ಸಾಧ್ಯವಾಗುವುದಿಲ್ಲ.

ಶ್ವಾಸಕೋಶವನ್ನು ಆರೋಗ್ಯವಾಗಿಡಲು ಏನು ಮಾಡಬೇಕು?

ಧೂಮಪಾನದಿಂದ ಸಂಪೂರ್ಣವಾಗಿ ದೂರವಿರಿ ಮತ್ತು ಇತರರು ಬಿಡುವ ಹೊಗೆಯಿಂದಲೂ ತಪ್ಪಿಸಿಕೊಳ್ಳಿ.

ಧೂಳು, ಹೊಗೆ ಮತ್ತು ಹೆಚ್ಚಿನ ಮಾಲಿನ್ಯವಿರುವ ಸ್ಥಳಗಳಿಗೆ ಹೋಗುವುದನ್ನು ತಪ್ಪಿಸಿ. ಅನಿವಾರ್ಯವಿದ್ದರೆ ಕಡ್ಡಾಯವಾಗಿ ಮಾಸ್ಕ್ ಧರಿಸಿ.

ಮನೆಯೊಳಗೆ ಶುದ್ಧ ಗಾಳಿ ಇರುವಂತೆ ನೋಡಿಕೊಳ್ಳಿ ಮತ್ತು ಹೊಗೆಯನ್ನುಂಟುಮಾಡುವ ವಸ್ತುಗಳ ಬಳಕೆಯನ್ನು ಕಡಿಮೆ ಮಾಡಿ.

ದಿನವೂ ಸ್ವಲ್ಪ ಸಮಯ ನಡಿಗೆ, ಸೈಕ್ಲಿಂಗ್ ಅಥವಾ ಇತರ ದೈಹಿಕ ಚಟುವಟಿಕೆಗಳನ್ನು ಮಾಡಿ.

ಪೌಷ್ಟಿಕ ಆಹಾರ ಸೇವಿಸಿ ಹಾಗೂ ದಿನಕ್ಕೆ ಅಗತ್ಯವಿರುವಷ್ಟು ನೀರು ಕುಡಿಯಿರಿ.

ವೈದ್ಯರನ್ನು ಯಾವಾಗ ಸಂಪರ್ಕಿಸಬೇಕು?

ಕೆಳಗಿನ ಲಕ್ಷಣಗಳು ಕಂಡುಬಂದರೆ ತಕ್ಷಣವೇ ವೈದ್ಯರನ್ನು ಸಂಪರ್ಕಿಸಿ:

ನಿರಂತರ ಕೆಮ್ಮು ಇರುವುದು

ಉಸಿರಾಟದ ತೊಂದರೆ ಅಥವಾ ಉಸಿರಾಡುವಾಗ ಶಬ್ದ ಬರುವುದು

ಎದೆ ನೋವು ಕಾಣಿಸಿಕೊಳ್ಳುವುದು

ಕೆಮ್ಮಿದಾಗ ರಕ್ತ ಬೀಳುವುದು

ಪದೇ ಪದೇ ಶ್ವಾಸಕೋಶದ ಸೋಂಕು (Infection) ತಗಲುವುದು

ಕಾರಣವಿಲ್ಲದೆ ಸುಸ್ತು ಮತ್ತು ಉಸಿರು ಗಟ್ಟುವುದು

ಈ ರೀತಿಯ ಲಕ್ಷಣಗಳು ಕಂಡುಬಂದಾಗ ನಿರ್ಲಕ್ಷಿಸದೇ ತಕ್ಷಣವೇ ಪರೀಕ್ಷೆ ಮಾಡಿಸಿಕೊಳ್ಳುವುದರಿಂದ ರೋಗವನ್ನು ಆರಂಭಿಕ ಹಂತದಲ್ಲೇ ಪತ್ತೆಹಚ್ಚಿ ಸೂಕ್ತ ಚಿಕಿತ್ಸೆ ಪಡೆಯಬಹುದು.