ಪೋಷಕರೇ ಗಮನಿಸಿ: ಮಕ್ಕಳಿಗೆ ಬಾಲ್ಯದಲ್ಲೇ ಈ 5 ಹಣಕಾಸಿನ ಪಾಠ ಕಲಿಸಿ!

ಮಕ್ಕಳಿಗೆ ಬಾಲ್ಯದಲ್ಲಿ ಸಿಗುವ ತರಬೇತಿ ಮತ್ತು ಕಲಿಯುವ ಅಭ್ಯಾಸಗಳು ಅವರ ಭವಿಷ್ಯದ ಮೇಲೆ ಆಳವಾದ ಪ್ರಭಾವ ಬೀರುತ್ತವೆ. ಅದರಲ್ಲೂ ವಿಶೇಷವಾಗಿ ಹಣ ಗಳಿಸುವುದು ಹೇಗೆ, ಅದನ್ನು ಸರಿಯಾದ ರೀತಿಯಲ್ಲಿ ನಿರ್ವಹಿಸುವುದು ಹೇಗೆ ಎಂಬುದನ್ನು ಪೋಷಕರು ಬಾಲ್ಯದಲ್ಲೇ ಕಲಿಸುವುದು ಅತ್ಯಗತ್ಯ ಎನ್ನುತ್ತಾರೆ ತಜ್ಞರು.

ಮಕ್ಕಳಿಗೆ ಚಿಕ್ಕಂದಿನಿಂದಲೇ ಹಣದ ಮೌಲ್ಯ ತಿಳಿಸುವುದು ಅತ್ಯಂತ ಪ್ರಮುಖವಾದ ವಿಷಯ. ಹಣ ಗಳಿಸಲು ಪಡುವ ಶ್ರಮ ಹಾಗೂ ಅದನ್ನು ಜಾಗರೂಕತೆಯಿಂದ ಖರ್ಚು ಮಾಡುವ ಅಗತ್ಯವನ್ನು ಮಕ್ಕಳು ಅರ್ಥಮಾಡಿಕೊಂಡರೆ, ಭವಿಷ್ಯದಲ್ಲಿ ಅವರು ಜವಾಬ್ದಾರಿಯುತ ಪ್ರಜೆಗಳಾಗಿ ಬೆಳೆಯುತ್ತಾರೆ. ಕೆಲವು ಸರಳ ಅಭ್ಯಾಸಗಳ ಮೂಲಕ ಮಕ್ಕಳಲ್ಲಿ ಆರ್ಥಿಕ ಶಿಸ್ತನ್ನು ಹೇಗೆ ಬೆಳೆಸಬಹುದು ಎಂಬುದನ್ನು ಇಲ್ಲಿ ನೋಡೋಣ.

1. ಉಳಿತಾಯದ ಅಭ್ಯಾಸ ಕಲಿಸಿ
ಮಕ್ಕಳಿಗೆ ನೀಡುವ ‘ಪಾಕೆಟ್ ಮನಿ’ ಅಥವಾ ಇತರ ಸಂದರ್ಭಗಳಲ್ಲಿ ಸಿಗುವ ಹಣದಲ್ಲಿ ಸ್ವಲ್ಪ ಭಾಗವನ್ನು ಕಡ್ಡಾಯವಾಗಿ ಉಳಿತಾಯ ಮಾಡಲು ಪ್ರೋತ್ಸಾಹಿಸಿ. ಇದಕ್ಕಾಗಿ ‘ಪಿಗ್ಗಿ ಬ್ಯಾಂಕ್’ (Piggiy Bank) ಅಥವಾ ಬ್ಯಾಂಕ್ ಖಾತೆಯನ್ನು ಬಳಸಬಹುದು. ತಮಗೆ ಇಷ್ಟವಾದ ವಸ್ತುವನ್ನು ಖರೀದಿಸಲು ಕೆಲವು ದಿನಗಳ ಕಾಲ ಹಣ ಉಳಿಸುವುದರಿಂದ ಮಕ್ಕಳಲ್ಲಿ ಸಹನೆ ಮತ್ತು ಯೋಜನಾಬದ್ಧತೆ ಬೆಳೆಯುತ್ತದೆ. ಬಾಲ್ಯದಲ್ಲೇ ಉಳಿತಾಯದ ಅಭ್ಯಾಸ ಬೆಳೆದರೆ ದೊಡ್ಡವರಾದ ಮೇಲೂ ಉತ್ತಮ ಆರ್ಥಿಕ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಸಾಧ್ಯವಾಗುತ್ತದೆ.

2. ‘ಅಗತ್ಯ’ ಮತ್ತು ‘ಆಸೆ’ಗಳ ನಡುವಿನ ವ್ಯತ್ಯಾಸ ತಿಳಿಸಿ
ಆಟಿಕೆಗಳು, ಗ್ಯಾಡ್ಜೆಟ್ಗಳು ಅಥವಾ ಇತರ ವಸ್ತುಗಳನ್ನು ಕೇಳುವುದು ಮಕ್ಕಳ ಸಹಜ ಗುಣ. ಆದರೆ ಅವರು ಕೇಳಿದ್ದನ್ನೆಲ್ಲ ತಕ್ಷಣವೇ ಕೊಡಿಸುವುದರಿಂದ ಅವರಿಗೆ ಹಣದ ಮೌಲ್ಯ ಅರ್ಥವಾಗುವುದಿಲ್ಲ. ಒಂದು ವಸ್ತು ಅವರಿಗೆ ನಿಜವಾಗಿಯೂ ಅಗತ್ಯವಿದೆಯೇ ಅಥವಾ ಅದು ಕೇವಲ ಆಸೆಯೇ ಎಂಬುದನ್ನು ಅವರೊಂದಿಗೆ ಚರ್ಚಿಸಿ. ಅಗತ್ಯ ಖರ್ಚುಗಳು ಮತ್ತು ಅನಗತ್ಯ ಆಸೆಗಳ ನಡುವಿನ ವ್ಯತ್ಯಾಸವನ್ನು ವಿವರವಾಗಿ ತಿಳಿಸಿಕೊಡುವುದರಿಂದ ಮಕ್ಕಳಲ್ಲಿ ಸರಿಯಾದ ಆಲೋಚನಾ ಶಕ್ತಿ ಬೆಳೆಯುತ್ತದೆ.

3. ಮನೆಯ ಬಜೆಟ್ ನಿರ್ವಹಣೆಯಲ್ಲಿ ತೊಡಗಿಸಿಕೊಳ್ಳಿ
ಮನೆಯ ಮಾಸಿಕ ಖರ್ಚುಗಳು ಹೇಗಿರುತ್ತವೆ? ಕರೆಂಟ್ ಬಿಲ್, ಆಹಾರ, ಪ್ರಯಾಣ ಮುಂತಾದವುಗಳಿಗೆ ಹಣವನ್ನು ಹೇಗೆ ವಿನಿಯೋಗಿಸಲಾಗುತ್ತದೆ ಎಂಬುದನ್ನು ಮಕ್ಕಳ ವಯಸ್ಸಿಗೆ ತಕ್ಕಂತೆ ಸರಳವಾಗಿ ವಿವರಿಸಿ. ಇದರಿಂದ ಹಣಕ್ಕೆ ಒಂದು ಮಿತಿ ಇದೆ ಎಂಬ ಸತ್ಯ ಅವರಿಗೆ ಅರ್ಥವಾಗುತ್ತದೆ ಮತ್ತು ಕುಟುಂಬದ ಆರ್ಥಿಕ ಪರಿಸ್ಥಿತಿಯ ಬಗ್ಗೆ ಅವರಲ್ಲಿ ಜವಾಬ್ದಾರಿಯ ಭಾವನೆ ಮೂಡುತ್ತದೆ.

4. ಕಷ್ಟಪಟ್ಟು ದುಡಿಯುವುದರ ಮಹತ್ವ ತಿಳಿಸಿ
ಹಣ ಎಲ್ಲಿಂದ ಬರುತ್ತದೆ, ಅದನ್ನು ಗಳಿಸಲು ಪೋಷಕರು ಎಷ್ಟು ಕಷ್ಟಪಡುತ್ತಾರೆ ಎಂಬುದನ್ನು ಮಕ್ಕಳಿಗೆ ತಿಳಿಸಬೇಕು. ಮನೆಯಲ್ಲಿ ಸಣ್ಣಪುಟ್ಟ ಜವಾಬ್ದಾರಿಗಳನ್ನು ನೀಡಿ, ಅದನ್ನು ಪೂರ್ಣಗೊಳಿಸಿದಾಗ ಪ್ರೋತ್ಸಾಹದಾಯಕವಾಗಿ ಸಣ್ಣ ಮೊತ್ತವನ್ನು ನೀಡುವುದರಿಂದ ಶ್ರಮಕ್ಕೆ ತಕ್ಕ ಪ್ರತಿಫಲ ಸಿಗುತ್ತದೆ ಎಂಬುದು ಅವರಿಗೆ ಅರ್ಥವಾಗುತ್ತದೆ. ಆದರೆ ನೆನಪಿಡಿ, ಪ್ರತಿಯೊಂದು ಕೆಲಸಕ್ಕೂ ಹಣ ಕೊಡುವ ಬದಲು ಶ್ರಮ ಮತ್ತು ಜವಾಬ್ದಾರಿಯ ನಡುವಿನ ಸಂಬಂಧವನ್ನು ಅವರಿಗೆ ಸ್ಪಷ್ಟಪಡಿಸುವುದು ಮುಖ್ಯ.

5. ದಾನ ಹಾಗೂ ಸಹಾಯ ಮಾಡುವ ಗುಣ ಬೆಳೆಸಿ
ಹಣ ಎಂದರೆ ಕೇವಲ ಖರ್ಚು ಮಾಡುವುದು ಅಥವಾ ಉಳಿಸುವುದು ಮಾತ್ರವಲ್ಲ, ಕಷ್ಟದಲ್ಲಿರುವವರಿಗೆ ನೆರವಾಗಲು ಕೂಡ ಅದನ್ನು ಬಳಸಬಹುದು ಎಂಬುದನ್ನು ಮಕ್ಕಳಿಗೆ ಹೇಳಿಕೊಡಿ. ಹಬ್ಬಗಳು ಅಥವಾ ವಿಶೇಷ ದಿನಗಳಲ್ಲಿ ತಮ್ಮ ಹಣದ ಒಂದು ಭಾಗವನ್ನು ಇತರರಿಗೆ ಸಹಾಯ ಮಾಡಲು ಬಳಸುವಂತೆ ಪ್ರೇರೇಪಿಸಿ. ಇದರಿಂದ ಮಕ್ಕಳಲ್ಲಿ ಸಾಮಾಜಿಕ ಜವಾಬ್ದಾರಿ ಮತ್ತು ಮಾನವೀಯ ಮೌಲ್ಯಗಳು ಹೆಚ್ಚಾಗುತ್ತವೆ.

ನೆನಪಿಡಿ: ಮಕ್ಕಳ ಮೇಲಿನ ಎಲ್ಲಕ್ಕಿಂತ ದೊಡ್ಡ ಪ್ರಭಾವ ಎಂದರೆ ಪೋಷಕರ ನಡೆನುಡಿ. ಮಕ್ಕಳು ಯಾವಾಗಲೂ ದೊಡ್ಡವರನ್ನು ಅನುಕರಿಸುತ್ತಾರೆ. ಹಾಗಾಗಿ ಹಣದ ವಿಚಾರದಲ್ಲಿ ಪೋಷಕರು ಕೂಡ ಶಿಸ್ತು ಮತ್ತು ಜಾಗರೂಕತೆಯಿಂದ ನಡೆದುಕೊಳ್ಳುವುದು ಅತ್ಯಗತ್ಯ.