ನಕಲಿ ಔಷಧ ಹಾವಳಿಗೆ ಬ್ರೇಕ್ ; ವ್ಯಾಕ್ಸಿನ್, ಆಂಟಿಬಯೋಟಿಕ್, ಕ್ಯಾನ್ಸರ್  ಔಷಧಗಳಿಗೆ ಕ್ಯೂಆರ್ ಕೋಡ್ ಕಡ್ಡಾಯ!

ದೆಹಲಿ.ಜೂನ್.25: ದೇಶದಲ್ಲಿ ನಕಲಿ ಔಷಧಗಳ ಹಾವಳಿಗೆ ಕಡಿವಾಣ ಹಾಕಲು ಮತ್ತು ಔಷಧ ಸುರಕ್ಷತೆಯನ್ನು ಬಲಪಡಿಸಲು ಕೇಂದ್ರ ಸರ್ಕಾರ ಮಹತ್ವದ ನಿರ್ಧಾರ ಕೈಗೊಂಡಿದೆ. ಲಸಿಕೆಗಳು, ಆ್ಯಂಟಿಬಯೋಟಿಕ್‌ಗಳು, ಕ್ಯಾನ್ಸರ್ ವಿರೋಧಿ ಔಷಧಗಳು ಹಾಗೂ ಸೈಕೋಟ್ರೋಪಿಕ್ ಸೇರಿದಂತೆ ಪ್ರಮುಖ ಜೀವರಕ್ಷಕ ಔಷಧಗಳ ಪ್ಯಾಕೇಜಿಂಗ್ ಮೇಲೆ ಬಾರ್‌ಕೋಡ್ ಅಥವಾ ಕ್ವಿಕ್ ರೆಸ್ಪಾನ್ಸ್ (QR) ಕೋಡ್‌ಗಳನ್ನು ಕಡ್ಡಾಯಗೊಳಿಸಲಾಗಿದೆ.

ಈ ಕುರಿತು ಮಾಹಿತಿ ನೀಡಿರುವ ಕೇಂದ್ರ ಆರೋಗ್ಯ ಸಚಿವಾಲಯವು, ದೇಶದ ಫಾರ್ಮಾಸ್ಯುಟಿಕಲ್ಸ್ ಟ್ರ್ಯಾಕ್-ಆಂಡ್-ಟ್ರೇಸ್ ವ್ಯವಸ್ಥೆಯನ್ನು ವಿಸ್ತರಿಸುವ ನಿಟ್ಟಿನಲ್ಲಿ 1945ರ ಔಷಧ ನಿಯಮಗಳಿಗೆ ತಿದ್ದುಪಡಿ ತಂದು ಅಧಿಸೂಚನೆ ಹೊರಡಿಸಿದೆ. ಈ ಹೊಸ ತಿದ್ದುಪಡಿಯ ಅನ್ವಯ, ಎಲ್ಲಾ ಲಸಿಕೆಗಳು, ಆ್ಯಂಟಿಮೈಕ್ರೋಬಿಯಲ್‌ಗಳು, ಕ್ಯಾನ್ಸರ್ ವಿರೋಧಿ ಔಷಧಗಳು ಹಾಗೂ ಎನ್‌ಡಿಪಿಎಸ್ (NDPS) ಕಾಯ್ದೆಯಡಿ ಬರುವ ಮಾದಕ ಮತ್ತು ಸೈಕೋಟ್ರೋಪಿಕ್ ಔಷಧಗಳನ್ನು ಔಷಧ ನಿಯಮಗಳ ‘ಶೆಡ್ಯೂಲ್ H2’ ವ್ಯಾಪ್ತಿಗೆ ತರಲಾಗಿದೆ.

ಪರಿಷ್ಕೃತ ನಿಯಮಾವಳಿಗಳ ಪ್ರಕಾರ, ತಯಾರಕರು ಈ ಔಷಧಗಳ ಪ್ರಾಥಮಿಕ ಪ್ಯಾಕೇಜಿಂಗ್ (ಬಾಟಲಿ ಅಥವಾ ಸ್ಟ್ರಿಪ್ಸ್) ಮೇಲೆ ಕ್ಯೂಆರ್ ಕೋಡ್ ಅನ್ನು ಮುದ್ರಿಸಬೇಕಾಗುತ್ತದೆ. ಒಂದು ವೇಳೆ ಪ್ರಾಥಮಿಕ ಪ್ಯಾಕೇಜಿಂಗ್‌ನಲ್ಲಿ ಸ್ಥಳಾವಕಾಶದ ಕೊರತೆಯಿದ್ದರೆ, ದ್ವಿತೀಯ ಪ್ಯಾಕೇಜಿಂಗ್ (ಬಾಕ್ಸ್) ಮೇಲೆ ಇದನ್ನು ಅಳವಡಿಸಲು ಅವಕಾಶ ನೀಡಲಾಗಿದೆ. ಈ ಡಿಜಿಟಲ್ ಕೋಡ್ ಸಹಾಯದಿಂದ ಗ್ರಾಹಕರು, ಫಾರ್ಮಾಸಿಸ್ಟ್‌ಗಳು, ವಿತರಕರು ಮತ್ತು ನಿಯಂತ್ರಕರು ಔಷಧದ ಸಾಗಾಟದ ಯಾವುದೇ ಹಂತದಲ್ಲೂ ಅದರ ವಿಶ್ವಾಸಾರ್ಹತೆಯನ್ನು ಪರಿಶೀಲಿಸಬಹುದಾಗಿದೆ.

ಈ ಕ್ಯೂಆರ್ ಕೋಡ್‌ನಲ್ಲಿ ಔಷಧದ ವಿಶಿಷ್ಟ ಗುರುತಿನ ಕೋಡ್, ಜೆನೆರಿಕ್ ಮತ್ತು ಬ್ರ್ಯಾಂಡ್ ಹೆಸರು, ತಯಾರಕರ ವಿವರಗಳು, ಬ್ಯಾಚ್ ಸಂಖ್ಯೆ, ಉತ್ಪಾದನೆ ಮತ್ತು ಮುಕ್ತಾಯ ದಿನಾಂಕಗಳು ಹಾಗೂ ಉತ್ಪಾದನಾ ಲೈಸೆನ್ಸ್ ಸಂಖ್ಯೆಯಂತಹ ಪ್ರಮುಖ ಮಾಹಿತಿಗಳು ಅಡಕವಾಗಿರುತ್ತವೆ. ಈ ಕ್ರಮದಿಂದಾಗಿ ಮಾರುಕಟ್ಟೆಗೆ ನಕಲಿ ಮತ್ತು ಕಳಪೆ ಗುಣಮಟ್ಟದ ಔಷಧಗಳು ಪ್ರವೇಶಿಸುವುದನ್ನು ತಡೆಯಲು ಸಾಧ್ಯವಾಗಲಿದ್ದು, ಸಾರ್ವಜನಿಕ ಆರೋಗ್ಯ ರಕ್ಷಣೆಗೆ ದೊಡ್ಡ ಬಲ ಸಿಗಲಿದೆ. ಜೊತೆಗೆ, ಜಾಗತಿಕವಾಗಿ ಆತಂಕ ಸೃಷ್ಟಿಸುತ್ತಿರುವ ಆ್ಯಂಟಿ-ಮೈಕ್ರೋಬಿಯಲ್ ರೆಸಿಸ್ಟೆನ್ಸ್ (AMR) ಸಮಸ್ಯೆಯನ್ನು ಎದುರಿಸಲು ಕೂಡ ಇದು ಸಹಕಾರಿಯಾಗಲಿದೆ.

ಇಷ್ಟು ದೊಡ್ಡ ಮಟ್ಟದ ನಿಯಮವನ್ನು ಜಾರಿಗೆ ತರಲು ಔಷಧ ಉದ್ಯಮಕ್ಕೆ ಕಾಲಾವಕಾಶದ ಅಗತ್ಯವಿರುವುದನ್ನು ಮನಗಂಡಿರುವ ಸರ್ಕಾರ, ಹಂತ-ಹಂತವಾಗಿ ಗಡುವನ್ನು ನಿಗದಿಪಡಿಸಿದೆ. ಲಸಿಕೆಗಳು, ಕ್ಯಾನ್ಸರ್ ಔಷಧಗಳು ಮತ್ತು ಮಾದಕ ದ್ರವ್ಯಗಳ ತಯಾರಕರು ಜುಲೈ 1, 2027 ರಿಂದ ಈ ಹೊಸ ಲೇಬಲಿಂಗ್ ನಿಯಮವನ್ನು ಪಾಲಿಸಬೇಕಾಗುತ್ತದೆ. ಇನ್ನು ಆ್ಯಂಟಿಬಯೋಟಿಕ್ಸ್ ಒಳಗೊಂಡಂತೆ ಆ್ಯಂಟಿಮೈಕ್ರೋಬಿಯಲ್ ಔಷಧಗಳಿಗೆ ಜುಲೈ 1, 2028 ರಿಂದ ಈ ಕ್ಯೂಆರ್ ಕೋಡ್ ನಿಯಮ ಅನ್ವಯವಾಗಲಿದೆ. ಈ ಹಿಂದೆ ದೇಶದ ಮೊದಲ 300 ಪ್ರಮುಖ ಔಷಧ ಬ್ರ್ಯಾಂಡ್‌ಗಳಿಗೆ ಮಾತ್ರ ಇದು ಸೀಮಿತವಾಗಿತ್ತು, ಆದರೆ ಈಗ ಇದರ ವ್ಯಾಪ್ತಿಯನ್ನು ಗಣನೀಯವಾಗಿ ವಿಸ್ತರಿಸಲಾಗಿದೆ.