ದೇಹ ಸೋತರೂ ಮನಸ್ಸು ಸೋಲಲಿಲ್ಲ! ವಿಶಾಲ್ ಮೆಗಾ ಮಾರ್ಟ್ ಸಂಸ್ಥಾಪಕರ ಸ್ಪೂರ್ತಿದಾಯಕ ಕಥೆ ಇಲ್ಲಿದೆ

ದೇಹದ ಅಂಗವೈಕಲ್ಯ ಯಶಸ್ಸಿಗೆ ಎಂದಿಗೂ ಅಡ್ಡಿಯಲ್ಲ ಎಂಬುದನ್ನು ತಮ್ಮ ಬದುಕಿನ ಮೂಲಕ ಸಾಬೀತುಪಡಿಸಿದ ವ್ಯಕ್ತಿ ರಾಮ್ ಚಂದ್ರ ಅಗರ್ವಾಲ್. ನಾಲ್ಕನೇ ವಯಸ್ಸಿನಲ್ಲಿ ಪೋಲಿಯೊದಿಂದ ದೇಹದ ಕೆಳಭಾಗದ ಅಂಗವೈಕಲ್ಯಕ್ಕೆ ತುತ್ತಾದರೂ, ಆತ್ಮವಿಶ್ವಾಸ ಮತ್ತು ಕಠಿಣ ಪರಿಶ್ರಮದ ಬಲದಿಂದ ಅವರು ದೇಶದ ಪ್ರಮುಖ ರಿಟೇಲ್ ಉದ್ಯಮಿಗಳಲ್ಲಿ ಒಬ್ಬರಾಗಿ ಬೆಳೆದಿದ್ದಾರೆ. ವಿಶಾಲ್ ಮೆಗಾ ಮಾರ್ಟ್ ಮತ್ತು ಬಳಿಕ ವಿ2 ರಿಟೇಲ್ ಮೂಲಕ ಅವರು ನಿರ್ಮಿಸಿದ ಯಶಸ್ಸಿನ ಪಯಣ ಇಂದು ಸಾವಿರಾರು ಯುವ ಉದ್ಯಮಿಗಳಿಗೆ ಸ್ಫೂರ್ತಿಯಾಗಿದೆ.

1965ರಲ್ಲಿ ಕೋಲ್ಕತ್ತದ ಮಧ್ಯಮ ವರ್ಗದ ಕುಟುಂಬದಲ್ಲಿ ಜನಿಸಿದ ರಾಮ್ ಚಂದ್ರ ಅಗರ್ವಾಲ್, ಕೇವಲ ನಾಲ್ಕು ವರ್ಷದವರಿದ್ದಾಗ ಪೋಲಿಯೊಗೆ ತುತ್ತಾದರು. ಇದರಿಂದ ಸೊಂಟದ ಕೆಳಭಾಗ ಶಾಶ್ವತವಾಗಿ ಅಂಗವೈಕಲ್ಯಕ್ಕೊಳಗಾಯಿತು. ಆದರೆ ದೈಹಿಕ ಮಿತಿಯನ್ನು ಅವರು ತಮ್ಮ ಕನಸುಗಳಿಗೆ ಅಡ್ಡಿಯಾಗಲು ಬಿಡಲಿಲ್ಲ.”ಯಾರ ಮೇಲೂ ಅವಲಂಬಿತರಾಗಬಾರದು” ಎಂಬ ದೃಢನಿಶ್ಚಯದೊಂದಿಗೆ ಉನ್ನತ ಶಿಕ್ಷಣ ಪೂರ್ಣಗೊಳಿಸಿದ ರಾಮ್, ಪೋಷಕರ ನೆರವಿನಿಂದ ಸಣ್ಣ ಜೆರಾಕ್ಸ್ ಅಂಗಡಿ ಆರಂಭಿಸಿದರು. ಆದರೆ ಅಷ್ಟರಲ್ಲಿ ತೃಪ್ತಿಪಡದೆ, ದೊಡ್ಡ ಕನಸಿನತ್ತ ಹೆಜ್ಜೆ ಹಾಕಿದರು.
ಸ್ವಲ್ಪ ಸಮಯದ ಬಳಿಕ ಜೆರಾಕ್ಸ್ ವ್ಯವಹಾರವನ್ನು ಬಿಟ್ಟು ಕೋಲ್ಕತ್ತದಲ್ಲಿ ಸಣ್ಣ ಬಟ್ಟೆ ಅಂಗಡಿ ಆರಂಭಿಸಿದರು. ಗ್ರಾಹಕರ ಅಭಿರುಚಿಯನ್ನು ಅರ್ಥಮಾಡಿಕೊಂಡು ಉತ್ತಮ ಗುಣಮಟ್ಟದ ಉಡುಪುಗಳನ್ನು ಕೈಗೆಟುಕುವ ಬೆಲೆಯಲ್ಲಿ ನೀಡುವ ತಂತ್ರವನ್ನು ಅನುಸರಿಸಿದರು.

2000ರಲ್ಲಿ ದೆಹಲಿಗೆ ಸ್ಥಳಾಂತರಗೊಂಡ ಅವರು ವಿಶಾಲ್ ಮೆಗಾ ಮಾರ್ಟ್ ಸ್ಥಾಪಿಸಿದರು. ಕಡಿಮೆ ಬೆಲೆಯಲ್ಲಿ ಉತ್ತಮ ಗುಣಮಟ್ಟದ ಬಟ್ಟೆ, ದಿನಸಿ ಹಾಗೂ ಗೃಹೋಪಯೋಗಿ ವಸ್ತುಗಳನ್ನು ಒದಗಿಸುವ ಮೂಲಕ ಮಧ್ಯಮ ವರ್ಗದ ಕುಟುಂಬಗಳ ವಿಶ್ವಾಸ ಗಳಿಸಿದರು. ಕೆಲವೇ ವರ್ಷಗಳಲ್ಲಿ ವಿಶಾಲ್ ಮೆಗಾ ಮಾರ್ಟ್ ದೇಶದ ಪ್ರಮುಖ ರಿಟೇಲ್ ಬ್ರ್ಯಾಂಡ್‌ಗಳಲ್ಲಿ ಒಂದಾಗಿ ಬೆಳೆಯಿತು.2008–09ರ ಜಾಗತಿಕ ಆರ್ಥಿಕ ಬಿಕ್ಕಟ್ಟು ಸಂಸ್ಥೆಯ ಮೇಲೂ ಪರಿಣಾಮ ಬೀರಿತು. ಸಾಲದ ಒತ್ತಡ ಮತ್ತು ನಷ್ಟ ಹೆಚ್ಚಿದ ಹಿನ್ನೆಲೆಯಲ್ಲಿ, ಸುಮಾರು ₹2,000 ಕೋಟಿ ಮೌಲ್ಯದ ವಿಶಾಲ್ ಮೆಗಾ ಮಾರ್ಟ್ ಅನ್ನು 2011ರಲ್ಲಿ ಕೇವಲ ₹70 ಕೋಟಿಗೆ ಮಾರಾಟ ಮಾಡುವ ಕಠಿಣ ನಿರ್ಧಾರವನ್ನು ರಾಮ್ ಚಂದ್ರ ತೆಗೆದುಕೊಳ್ಳಬೇಕಾಯಿತು.

ಅನೇಕರು ಇಲ್ಲಿ ಸೋಲೊಪ್ಪಿಕೊಳ್ಳುತ್ತಿದ್ದರು. ಆದರೆ ರಾಮ್ ಚಂದ್ರ ಅಗರ್ವಾಲ್ ಮತ್ತೆ ಹೊಸ ಕನಸಿನೊಂದಿಗೆ ವಿ2 ರಿಟೇಲ್ ಲಿಮಿಟೆಡ್ ಆರಂಭಿಸಿದರು. ಕೈಗೆಟುಕುವ ದರದಲ್ಲಿ ಗುಣಮಟ್ಟದ ವಸ್ತುಗಳನ್ನು ಒದಗಿಸುವ ತಮ್ಮ ಹಳೆಯ ತತ್ವವನ್ನೇ ಮುಂದುವರಿಸಿದ ಅವರು ಮತ್ತೊಮ್ಮೆ ಯಶಸ್ಸಿನ ಶಿಖರ ಏರಿದರು.
ಇಂದು ದೇಶಾದ್ಯಂತ 150ಕ್ಕೂ ಹೆಚ್ಚು ವಿ2 ರಿಟೇಲ್ ಮಳಿಗೆಗಳು ಕಾರ್ಯನಿರ್ವಹಿಸುತ್ತಿದ್ದು, ಸಂಸ್ಥೆಯ ವಾರ್ಷಿಕ ವಹಿವಾಟು ₹6,500 ಕೋಟಿಗೂ ಅಧಿಕ ಎಂದು ವರದಿಯಾಗಿದೆ.ಅಂಗವೈಕಲ್ಯ, ಆರ್ಥಿಕ ಸಂಕಷ್ಟ ಮತ್ತು ಉದ್ಯಮದ ವೈಫಲ್ಯ—ಇವೆಲ್ಲವನ್ನೂ ಮೀರಿ ಮತ್ತೆ ಯಶಸ್ಸಿನ ಸಾಮ್ರಾಜ್ಯ ಕಟ್ಟಿದ ರಾಮ್ ಚಂದ್ರ ಅಗರ್ವಾಲ್ ಅವರ ಬದುಕು, “ಸೋಲು ಅಂತ್ಯವಲ್ಲ; ಅದು ಹೊಸ ಆರಂಭದ ಮೆಟ್ಟಿಲು” ಎಂಬುದಕ್ಕೆ ಜೀವಂತ ಉದಾಹರಣೆಯಾಗಿದೆ.