BREAKING NEWS : ತಮಿಳುನಾಡಿನ ಕಾರ್ಖಾನೆಯಲ್ಲಿ ಗ್ಯಾಸ್ ಸೋರಿಕೆಯಾಗಿ 7 ಕಾರ್ಮಿಕರ ಸಾವು; 9 ಮಂದಿ ಸ್ಥಿತಿ ಗಂಭೀರ

ಚೆನ್ನೈ.ಜೂನ್.21: ತಮಿಳುನಾಡಿನ ತಿರುವಳ್ಳೂರು ಜಿಲ್ಲೆಯ ಪೆರಿಯಪಾಳ್ಯಂ ಬಳಿಯ ಖಾಸಗಿ ಕಡಲ ಆಹಾರ (ಸೀಫುಡ್) ರಫ್ತು ಘಟಕದಲ್ಲಿ ಸಂಭವಿಸಿದ ಅಮೋನಿಯಾ ಅನಿಲ ಸೋರಿಕೆಯಿಂದಾಗಿ ಏಳು ವಲಸೆ ಕಾರ್ಮಿಕರು ಸಾವನ್ನಪ್ಪಿದ್ದು, 40ಕ್ಕೂ ಹೆಚ್ಚು ಜನರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಅಧಿಕಾರಿಗಳು ಮತ್ತು ಪೊಲೀಸ್ ಮೂಲಗಳು ತಿಳಿಸಿವೆ.

ಪೆರಿಯಪಾಳ್ಯಂ ಸಮೀಪದ ಕನ್ನಿಗೈಪೇರ್ನಲ್ಲಿರುವ ‘ಸೇಂಟ್ ಪೀಟರ್ಸ್ ಪಾಲ್ ಸೀಫುಡ್ಸ್ ಎಕ್ಸ್ಪೋರ್ಟ್ಸ್ ಪ್ರೈವೇಟ್ ಲಿಮಿಟೆಡ್’ ಸಂಸ್ಥೆಯಲ್ಲಿ ಈ ದುರಂತ ಸಂಭವಿಸಿದೆ. ಈ ಕಾರ್ಖಾನೆಯ ಆವರಣದಲ್ಲಿ ಅಸ್ಸಾಂ, ಒಡಿಶಾ ಮತ್ತು ಜಾರ್ಖಂಡ್ ಮೂಲದ ಸುಮಾರು 120 ವಲಸೆ ಕಾರ್ಮಿಕರು (ಹೆಚ್ಚಾಗಿ ಮಹಿಳೆಯರು) ವಾಸಿಸುತ್ತಿದ್ದರು. ಭಾನುವಾರ ಕಾರ್ಖಾನೆಗೆ ವಾರದ ರಜೆಯಿದ್ದ ಕಾರಣ, ಬಹುತೇಕ ಕಾರ್ಮಿಕರು ತಮ್ಮ ವಸತಿಗೃಹಗಳಲ್ಲೇ ಇದ್ದಾಗ ಈ ಅನಿಲ ಸೋರಿಕೆಯಾಗಿ ಇಡೀ ಆವರಣವನ್ನು ಆವರಿಸಿಕೊಂಡಿದೆ.

ಕಾರ್ಖಾನೆಯ ಸಂಸ್ಕರಣಾ ಘಟಕದಿಂದ ಹೊರಹೊಮ್ಮಿದ ಅಮೋನಿಯಾ ಅನಿಲವು ವಸತಿ ಪ್ರದೇಶಕ್ಕೆ ವೇಗವಾಗಿ ಹರಡಿತು. ಇದರಿಂದಾಗಿ ಕಾರ್ಮಿಕರು ತೀವ್ರ ಉಸಿರಾಟದ ತೊಂದರೆಯಿಂದ ತತ್ತರಿಸಿದ್ದಾರೆ. ಕೆಲವರ ಬಾಯಿ ಮತ್ತು ಮೂಗಿನಿಂದ ರಕ್ತಸ್ರಾವ ಕೂಡ ಉಂಟಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

#WATCH | Tamil Nadu: An ammonia gas leak was reported today at the St. Peter's Paul Seafoods Exports facility located in Kannigaipair near Periyapalayam in Tiruvallur district. National Disaster Response Force (NDRF) 4th Battalion headquarters in Arakkonam was immediately alerted… pic.twitter.com/ojoBZ9qyu3

— ANI (@ANI) June 21, 2026

ಘಟನೆ ನಡೆದ ತಕ್ಷಣವೇ ಸಂತ್ರಸ್ತ 67 ಕಾರ್ಮಿಕರನ್ನು ಸ್ಥಳೀಯ ವೈದ್ಯಕೀಯ ಕೇಂದ್ರಗಳಿಗೆ ರವಾನಿಸಲಾಗಿದೆ ಎಂದು ತಿರುವಳ್ಳೂರು ಜಿಲ್ಲಾಧಿಕಾರಿ ಎಸ್. ಕವಿತಾ ತಿಳಿಸಿದ್ದಾರೆ. ಇವರಲ್ಲಿ 46 ಜನರನ್ನು ವೇಲ್ಸ್ ಆಸ್ಪತ್ರೆಗೆ ಮತ್ತು 21 ಜನರನ್ನು ವೆಂಕಟೇಶ್ವರ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಇವರ ಪೈಕಿ ಅತ್ಯಂತ ಗಂಭೀರ ಸ್ಥಿತಿಯಲ್ಲಿದ್ದ ಒಂಬತ್ತು ರೋಗಿಗಳನ್ನು ಹೆಚ್ಚಿನ ಚಿಕಿತ್ಸೆಗಾಗಿ 108 ಆಂಬುಲೆನ್ಸ್ ಮೂಲಕ ಚೆನ್ನೈನ ಸರ್ಕಾರಿ ಸ್ಟ್ಯಾನ್ಲಿ ವೈದ್ಯಕೀಯ ಕಾಲೇಜು ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿದೆ.

ಮತ್ತೊಂದು ಖಾಸಗಿ ಆಸ್ಪತ್ರೆಯಲ್ಲಿ 43 ಯುವತಿಯರು ಮತ್ತು ಒಬ್ಬ ಪುರುಷ ಸೇರಿದಂತೆ 44 ರೋಗಿಗಳನ್ನು ದಾಖಲಿಸಲಾಗಿದ್ದು, ಅವರಲ್ಲಿ 15 ರಿಂದ 16 ರೋಗಿಗಳಿಗೆ ಇಂಟ್ಯೂಬೇಶನ್ ಮಾಡಲಾಗಿದೆ ಮತ್ತು 11 ಜನರನ್ನು ವೆಂಟಿಲೇಟರ್ ವ್ಯವಸ್ಥೆಯಲ್ಲಿ ಇಡಲಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.