ಮಳೆಗಾಲದಲ್ಲಿ ದಿನಕ್ಕೆ ಎಷ್ಟು ಕಪ್ ಚಹಾ ಕುಡಿಯಬೇಕು ಗೊತ್ತಾ?

ದೇಶಾದ್ಯಂತ ಮುಂಗಾರು ಮಳೆ ಆರಂಭವಾಗಿದ್ದು, ವಾತಾವರಣ ತಂಪಾಗಿದೆ. ಇಂತಹ ಹಿತಕರವಾದ ಹವಾಮಾನದಲ್ಲಿ ಬಿಸಿಬಿಸಿಯಾದ ಒಂದು ಕಪ್ ಚಹಾ (ಟೀ) ಕುಡಿಯುವುದನ್ನು ಬಹುತೇಕರು ಇಷ್ಟಪಡುತ್ತಾರೆ. ಬೆಳಿಗ್ಗೆ ಎದ್ದ ತಕ್ಷಣ ಟೀ ಸಿಗದಿದ್ದರೆ ದಿನವೇ ಆರಂಭವಾಗುವುದಿಲ್ಲ ಎನ್ನುವವರೂ ಇದ್ದಾರೆ. ಕೆಲವರು ದಿನಕ್ಕೆ ಒಂದೇ ಕಪ್ ಕುಡಿದರೆ, ಇನ್ನು ಕೆಲವರು ಎರಡು ಮೂರು ಬಾರಿ ಚಹಾ ಹೀರುತ್ತಾರೆ. ಆದರೆ, ಮಳೆಗಾಲದಲ್ಲಿ ಅತಿಯಾಗಿ ಚಹಾ ಕುಡಿಯುವುದು ಆರೋಗ್ಯದ ಮೇಲೆ, ವಿಶೇಷವಾಗಿ ಜೀರ್ಣಾಂಗ ವ್ಯವಸ್ಥೆಯ ಮೇಲೆ ಕೆಟ್ಟ ಪರಿಣಾಮ ಬೀರಬಹುದು ಎಂದು ಆರೋಗ್ಯ ತಜ್ಞರು ಎಚ್ಚರಿಸಿದ್ದಾರೆ.

ದಿನಕ್ಕೆ ಎಷ್ಟು ಕಪ್ ಚಹಾ ಉತ್ತಮ?

ಮಳೆಗಾಲದ ತೇವಾಂಶಭರಿತ ಹಾಗೂ ತಂಪು ವಾತಾವರಣದಲ್ಲಿ ಪದೇ ಪದೇ ಚಹಾ ಕುಡಿಯುವ ಬಯಕೆಯಾಗುವುದು ಸಹಜ. ಆದರೆ ಆರೋಗ್ಯ ತಜ್ಞರ ಪ್ರಕಾರ, ಮಳೆಗಾಲದಲ್ಲಿ ದಿನಕ್ಕೆ ಎರಡರಿಂದ ಮೂರು ಕಪ್ ಗಳಿಗಿಂತ ಹೆಚ್ಚು ಚಹಾ ಕುಡಿಯುವುದು ಸೂಕ್ತವಲ್ಲ. ದಿನಕ್ಕೆ 1 ರಿಂದ ಗರಿಷ್ಠ 3 ಬಾರಿ ಮಾತ್ರ ಚಹಾ ಸೇವಿಸುವುದು ಆರೋಗ್ಯದ ದೃಷ್ಟಿಯಿಂದ ಅತ್ಯಂತ ಸುರಕ್ಷಿತ ಮತ್ತು ಪ್ರಯೋಜನಕಾರಿ.

ಅತಿಯಾಗಿ ಚಹಾ ಕುಡಿದರೆ ಏನಾಗುತ್ತದೆ?

ಮಳೆಗಾಲದಲ್ಲಿ ನಮ್ಮ ಜೀರ್ಣ ಶಕ್ತಿಯು ಸಾಮಾನ್ಯವಾಗಿ ಸ್ವಲ್ಪ ಮಂದವಾಗಿರುತ್ತದೆ. ಇಂತಹ ಸಮಯದಲ್ಲಿ ಅತಿಯಾಗಿ ಚಹಾ ಸೇವಿಸುವುದರಿಂದ ಅದು ನೇರವಾಗಿ ಜೀರ್ಣಾಂಗ ವ್ಯವಸ್ಥೆಯ (Digestive System) ಮೇಲೆ ತೀವ್ರ ಪರಿಣಾಮ ಬೀರುತ್ತದೆ. ಗ್ಯಾಸ್ಟ್ರಿಕ್, ಎದೆಯುರಿ, ಅಜೀರ್ಣ ಮತ್ತು ಮಲಬದ್ಧತೆಯಂತಹ ಹಲವು ರೀತಿಯ ಹೊಟ್ಟೆಯ ಸಮಸ್ಯೆಗಳಿಗೆ ಇದು ಕಾರಣವಾಗಬಹುದು.

ಆದ್ದರಿಂದ, ಮಳೆಗಾಲದ ಮಜಾವನ್ನು ಆನಂದಿಸುವ ಜೊತೆಗೆ ನಿಮ್ಮ ಜೀರ್ಣಕ್ರಿಯೆ ಹಳಿ ತಪ್ಪದಂತೆ ನೋಡಿಕೊಳ್ಳಲು ಚಹಾ ಸೇವನೆಯನ್ನು ಮಿತಿಗೊಳಿಸಿ, ಆರೋಗ್ಯವನ್ನು ಕಾಪಾಡಿಕೊಳ್ಳಿ ಎಂದು ತಜ್ಞರು ಸಲಹೆ ನೀಡಿದ್ದಾರೆ.