ಎಲ್ ನಿನೋ ಎಫೆಕ್ಟ್ : ಈ ಸಲ ವಾಡಿಕೆಗಿಂತ ಕಡಿಮೆ ಮಳೆ, ಐಎಂಡಿ ಮುನ್ಸೂಚನೆ!

ಸುದ್ದಿಒನ್,ನವದೆಹಲಿ,ಮೇ.30:ದೇಶದ ಬೆನ್ನೆಲುಬಾಗಿರುವ ರೈತಾಪಿ ವರ್ಗಕ್ಕೆ ಭಾರತೀಯ ಹವಾಮಾನ ಇಲಾಖೆ (IMD) ಕಹಿ ಸುದ್ದಿಯೊಂದನ್ನು ನೀಡಿದೆ. 2026ರ ಸಾಲಿನ ನೈಋತ್ಯ ಮುಂಗಾರು ಮಳೆಯ ಕುರಿತು ಶುಕ್ರವಾರ ಪರಿಷ್ಕೃತ ಮುನ್ಸೂಚನೆ ಬಿಡುಗಡೆ ಮಾಡಲಾಗಿದ್ದು, ಈ ಬಾರಿ ದೇಶಾದ್ಯಂತ ವಾಡಿಕೆಗಿಂತ ಅತ್ಯಂತ ಕಡಿಮೆ ಮಳೆಯಾಗಲಿದೆ ಎಂದು ಎಚ್ಚರಿಸಲಾಗಿದೆ.

ದೀರ್ಘಾವಧಿ ಸರಾಸರಿ (LPA) ಪ್ರಕಾರ ಈ ವರ್ಷ ಕೇವಲ ಶೇಕಡಾ 90 ರಷ್ಟು ಮಾತ್ರ ಮಳೆ ಬೀಳುವ ನಿರೀಕ್ಷೆಯಿದ್ದು, ಮುಂಬರುವ ಮುಂಗಾರು ಹಂಗಾಮನ್ನು ಅಧಿಕೃತವಾಗಿ ‘ಕೊರತೆ ವರ್ಷ’ ಎಂದು ವರ್ಗೀಕರಿಸಲಾಗಿದೆ.

ಕರಗಿದ ಮಳೆಯ ನಿರೀಕ್ಷೆ: ಏನಿದು ‘ಎಲ್ ನಿನೋ’ ಭೀತಿ?

ಕಳೆದ ಏಪ್ರಿಲ್ ತಿಂಗಳ ವರದಿಯಲ್ಲಿ ಐಎಂಡಿ ಶೇಕಡಾ 92 ರಷ್ಟು ಮಳೆಯಾಗಬಹುದು ಎಂದು ಅಂದಾಜಿಸಿತ್ತು. ಆದರೆ, ಪೆಸಿಫಿಕ್ ಮಹಾಸಾಗರದಲ್ಲಿ ತೀವ್ರ ಸ್ವರೂಪ ಪಡೆದುಕೊಳ್ಳುತ್ತಿರುವ ‘ಎಲ್ ನಿನೋ’ (El Nino Effect) ವಿದ್ಯಮಾನದಿಂದಾಗಿ ಈಗ ಆ ನಿರೀಕ್ಷೆಯನ್ನು ಮತ್ತಷ್ಟು ತಗ್ಗಿಸಲಾಗಿದೆ.

ಪೆಸಿಫಿಕ್ ಸಾಗರದ ಮೇಲ್ಮೈ ತಾಪಮಾನ ಗಣನೀಯವಾಗಿ ಹೆಚ್ಚಾಗುತ್ತಿರುವುದರಿಂದ, ಜುಲೈನಿಂದ ಸೆಪ್ಟೆಂಬರ್ ಅವಧಿಯಲ್ಲಿ ಮುಂಗಾರು ಮಾರುತಗಳು ದುರ್ಬಲಗೊಳ್ಳುವ ಸಾಧ್ಯತೆ ದಟ್ಟವಾಗಿದೆ.ಆರಂಭಿಕ ತಿಂಗಳಾದ ಜೂನ್‌ನಲ್ಲೂ ದೇಶದ ಬಹುತೇಕ ಭಾಗಗಳಲ್ಲಿ ಮಳೆ ಕೊರತೆ ಎದುರಾಗಲಿದ್ದು, ವಾಡಿಕೆಗಿಂತ ಹೆಚ್ಚಿನ ತಾಪಮಾನ ದಾಖಲಾಗಲಿದೆ.

ಈ ಹಿಂದೆ ಮೇ 26ಕ್ಕೇ ಮುಂಗಾರು ಕೇರಳಕ್ಕೆ ಎಂಟ್ರಿ ಕೊಡಲಿದೆ ಎಂದು ಅಂದಾಜಿಸಲಾಗಿತ್ತು. ಆದರೆ ಈಗ ಮುಂದಿನ ವಾರವಷ್ಟೇ ಕೇರಳಕ್ಕೆ ಮುಂಗಾರು ಪ್ರವೇಶಿಸಲು ಪೂರಕ ವಾತಾವರಣ ನಿರ್ಮಾಣವಾಗಲಿದೆ ಎಂದು ಐಎಂಡಿ ಸ್ಪಷ್ಟಪಡಿಸಿದೆ.