ಕೈಬರಹದಲ್ಲಿದೆ ಮೆದುಳಿನ ಆರೋಗ್ಯದ ರಹಸ್ಯ: ಹೊಸ ಸಂಶೋಧನೆ

ಸುದ್ದಿಒನ್,ಮೇ.24: ನಮ್ಮ ಕೈಬರಹದ ಶೈಲಿಯು ನಮ್ಮ ಮೆದುಳಿನ ಆರೋಗ್ಯದ ಬಗ್ಗೆ ಪ್ರಮುಖ ಸುಳಿವುಗಳನ್ನು ನೀಡಬಲ್ಲದು ಎಂದು ಹೊಸ ಅಧ್ಯಯನವೊಂದು ತಿಳಿಸಿದೆ. ವಯಸ್ಸಾದವರಲ್ಲಿ ಕಂಡುಬರುವ ಅರಿವಿನ ಕೊರತೆ (Cognitive Decline) ಮತ್ತು ಡಿಮೆನ್ಶಿಯಾ (ಮರೆವು ರೋಗ)ದ ಅಪಾಯವನ್ನು ಕೈಬರಹದ ಮೂಲಕ ಗುರುತಿಸಬಹುದು ಎಂದು ವಿಜ್ಞಾನಿಗಳು ಪತ್ತೆಹಚ್ಚಿದ್ದಾರೆ.

ಪೋರ್ಚುಗಲ್ ‘ಯೂನಿವರ್ಸಿಟಿ ಆಫ್ ಎವೋರಾ’ ಸಂಶೋಧಕರು ನಡೆಸಿರುವ ಈ ಅಧ್ಯಯನದ ಪ್ರಕಾರ, ಬರೆಯುವ ವೇಗ, ಸಮನ್ವಯತೆ ಮತ್ತು ಸಮಯದ ಬದಲಾವಣೆಗಳನ್ನು ಗಮನಿಸುವ ಮೂಲಕ ಮೆದುಳಿನ ಕಾಯಿಲೆಯ ಆರಂಭಿಕ ಲಕ್ಷಣಗಳನ್ನು ಮೊದಲೇ ಪತ್ತೆಹಚ್ಚಬಹುದು. ಇದು ಭವಿಷ್ಯದಲ್ಲಿ ಡಿಮೆನ್ಶಿಯಾವನ್ನು ಅತ್ಯಂತ ಕಡಿಮೆ ವೆಚ್ಚದಲ್ಲಿ ಮತ್ತು ಸುಲಭವಾಗಿ ಪತ್ತೆಹಚ್ಚುವ ಸಾಧನವಾಗಬಹುದು ಎಂದು ಸಂಶೋಧಕರು ಆಶಿಸಿದ್ದಾರೆ.

ಈ ಅಧ್ಯಯನಕ್ಕಾಗಿ 62 ರಿಂದ 92 ವರ್ಷದೊಳಗಿನ 58 ವೃದ್ಧರನ್ನು ಬಳಸಿಕೊಳ್ಳಲಾಗಿತ್ತು. ಇವರಲ್ಲಿ 38 ಜನರಿಗೆ ಈಗಾಗಲೇ ಅರಿವಿನ ಕೊರತೆಯ ಸಮಸ್ಯೆ ಇರುವುದು ದೃಢಪಟ್ಟಿತ್ತು. ಸಂಶೋಧಕರು ಇವರಿಗೆ ಡಿಜಿಟಲ್ ಪೆನ್ ಮತ್ತು ಟ್ಯಾಬ್ಲೆಟ್ ನೀಡಿ ಕೆಲವು ಕೈಬರಹದ ಅಭ್ಯಾಸಗಳನ್ನು ಮಾಡಲು ಸೂಚಿಸಿದರು. ಇದರ ಮೂಲಕ ಅವರ ಕೈಬರಹದ ಚಲನವಲನಗಳನ್ನು ಸೂಕ್ಷ್ಮವಾಗಿ ಗಮನಿಸಲಾಯಿತು.

ಮೊದಲಿಗೆ ಕೇವಲ ಗೆರೆಗಳನ್ನು ಎಳೆಯುವುದು ಮತ್ತು ಚುಕ್ಕೆಗಳನ್ನು ಇಡುವ ಸರಳ ಕೆಲಸಗಳನ್ನು ನೀಡಲಾಯಿತು. ಇದರಲ್ಲಿ ಆರೋಗ್ಯವಂತರಿಗೂ ಮತ್ತು ಮೆದುಳಿನ ಸಮಸ್ಯೆ ಇರುವವರಿಗೂ ಯಾವುದೇ ದೊಡ್ಡ ವ್ಯತ್ಯಾಸ ಕಂಡುಬರಲಿಲ್ಲ.ಆದರೆ, ಒಂದು ಕಾರ್ಡ್ ನೋಡಿ ವಾಕ್ಯವನ್ನು ನಕಲು ಮಾಡುವುದು ಮತ್ತು ಹೇಳಿ ಬರೆಯುವ (Dictation) ಕಷ್ಟದ ಕೆಲಸಗಳನ್ನು ನೀಡಿದಾಗ ಪ್ರಮುಖ ವ್ಯತ್ಯಾಸಗಳು ಕಂಡುಬಂದವು. ಮೆದುಳಿನ ಸಮಸ್ಯೆ ಇರುವವರು ಅತ್ಯಂತ ನಿಧಾನವಾಗಿ ಬರೆಯುವುದು, ಬರೆಯಲು ಆರಂಭಿಸುವ ಮುನ್ನ ಹೆಚ್ಚು ಸಮಯ ಯೋಚಿಸುವುದು ಮತ್ತು ಅಸ್ತವ್ಯಸ್ತವಾಗಿ ಬರೆಯುವುದನ್ನು ಸಂಶೋಧಕರು ಗಮನಿಸಿದರು.

ಪ್ರಮುಖವಾಗಿ ಕಂಡುಬಂದ 3 ಅಂಶಗಳು
ಸಂಶೋಧನೆಯ ಪ್ರಕಾರ ಮೆದುಳಿನ ಕಾರ್ಯಕ್ಷಮತೆ ಕುಸಿಯುತ್ತಿರುವುದನ್ನು ಈ ಮೂರು ಅಂಶಗಳು ಪ್ರಮುಖವಾಗಿ ತೋರ್ಪಡಿಸುತ್ತವೆ.

ಅಕ್ಷರಗಳ ಲಂಬವಾದ ಗಾತ್ರ (Vertical size).

ಬರೆಯಲು ಪ್ರಾರಂಭಿಸುವ ಮುನ್ನ ತೆಗೆದುಕೊಳ್ಳುವ ಸಮಯ (Delay).

ಇಡೀ ವಾಕ್ಯವನ್ನು ಬರೆದು ಮುಗಿಸಲು ತೆಗೆದುಕೊಳ್ಳುವ ಒಟ್ಟು ಸಮಯ.

ಬರವಣಿಗೆ ಎಂಬುದು ಕೇವಲ ಕೈಗಳ ಚಲನೆಯಲ್ಲ; ಅದು ನಮ್ಮ ಮೆದುಳಿನ ಕಿಟಕಿ” ಎಂದು ಅಧ್ಯಯನದ ಮುಖ್ಯಸ್ಥರಾದ ಡಾ. ಅನಾ ರೀಟಾ ಮಾಟಿಯಾಸ್ ಹೇಳಿದ್ದಾರೆ. ಬರವಣಿಗೆಯ ಸಂದರ್ಭದಲ್ಲಿ ಭಾಷೆಯ ಗ್ರಹಿಕೆ, ನೆನಪಿನ ಶಕ್ತಿ, ಗಮನ ಮತ್ತು ಯೋಜನೆ ರೂಪಿಸುವಿಕೆ ಸೇರಿದಂತೆ ಮೆದುಳಿನ ಹಲವು ವ್ಯವಸ್ಥೆಗಳು ಒಟ್ಟಿಗೆ ಕೆಲಸ ಮಾಡಬೇಕಾಗುತ್ತದೆ. ಮೆದುಳಿನ ಸಾಮರ್ಥ್ಯ ಕುಗ್ಗಿದಾಗ ಬರವಣಿಗೆಯೂ ನಿಧಾನವಾಗುತ್ತದೆ ಮತ್ತು ತುಂಡರಿಸಲ್ಪಡುತ್ತದೆ.

ಪ್ರಸ್ತುತ ಡಿಮೆನ್ಶಿಯಾ ಪತ್ತೆಹಚ್ಚಲು ಮಾಡುವ ವೈದ್ಯಕೀಯ ಪರೀಕ್ಷೆಗಳು ದುಬಾರಿ ಮತ್ತು ಕಷ್ಟಕರವಾಗಿವೆ. ಆದರೆ ಈ ಕೈಬರಹದ ವಿಶ್ಲೇಷಣೆಯು ಅತ್ಯಂತ ಅಗ್ಗದ ಮತ್ತು ಸರಳ ಪರ್ಯಾಯ ಮಾರ್ಗವಾಗಬಲ್ಲದು. ಆದಾಗ್ಯೂ, ಈ ಸಂಶೋಧನೆಯನ್ನು ಕೇವಲ ಸಣ್ಣ ಗುಂಪಿನ ಮೇಲೆ ಮಾಡಲಾಗಿರುವುದರಿಂದ, ಇದನ್ನು ಅಧಿಕೃತ ವೈದ್ಯಕೀಯ ಪರೀಕ್ಷೆಯಾಗಿ ಬಳಸುವ ಮುನ್ನ ಇನ್ನೂ ಹೆಚ್ಚಿನ ಮತ್ತು ದೊಡ್ಡ ಮಟ್ಟದ ಸಂಶೋಧನೆಗಳ ಅಗತ್ಯವಿದೆ ಎಂದು ವಿಜ್ಞಾನಿಗಳು ಸ್ಪಷ್ಟಪಡಿಸಿದ್ದಾರೆ. ಆದರೂ, ನಮ್ಮ ದೈನಂದಿನ ಬರವಣಿಗೆಯ ಅಭ್ಯಾಸವೇ ಮೆದುಳಿನ ಆರೋಗ್ಯದ ರಹಸ್ಯವನ್ನು ಬಿಚ್ಚಿಡಬಲ್ಲದು ಎಂಬುದು ಈ ಅಧ್ಯಯನದಿಂದ ಸಾಬೀತಾಗಿದೆ.