ಸುದ್ದಿಒನ್,ಬೆಂಗಳೂರು,ಮೇ.12: ರಾಜಧಾನಿಯ ಆಸ್ತಿ ಮಾಲೀಕರು ಇನ್ನು ಮುಂದೆ ಇ-ಖಾತಾ ಪಡೆಯಲು ಸರ್ಕಾರಿ ಕಚೇರಿಗಳ ಮೆಟ್ಟಿಲೇರಿ ಅಲೆಯಬೇಕಾದ ಅವಶ್ಯಕತೆಯಿಲ್ಲ. ಸಾರ್ವಜನಿಕರ ಮನೆಬಾಗಿಲಿಗೇ ಸೇವೆಯನ್ನು ತಲುಪಿಸುವ ನಿಟ್ಟಿನಲ್ಲಿ ಗ್ರೇಟರ್ ಬೆಂಗಳೂರು ಅಥಾರಿಟಿ (GBA) ಇದೇ ಮೇ 16ರಿಂದ ಬೃಹತ್ ‘ಇ-ಖಾತಾ ಮೇಳ’ವನ್ನು ಆಯೋಜಿಸಿದೆ.
ಜಿಬಿಎ ವ್ಯಾಪ್ತಿಗೆ ಬರುವ ಐದು ನಗರ ಪಾಲಿಕೆಗಳ ಒಟ್ಟು 50 ಆಯ್ದ ಕೇಂದ್ರಗಳಲ್ಲಿ ಈ ಮೇಳ ನಡೆಯಲಿದೆ. ಬೆಂಗಳೂರಿನ ಸುಮಾರು 25 ಲಕ್ಷ ಆಸ್ತಿಗಳನ್ನು ಡಿಜಿಟಲ್ ಇ-ಖಾತಾ ವ್ಯಾಪ್ತಿಗೆ ತರುವ ಬೃಹತ್ ಗುರಿಯನ್ನು ಪ್ರಾಧಿಕಾರ ಹೊಂದಿದ್ದು, ಈಗಾಗಲೇ 10 ಲಕ್ಷ ಆಸ್ತಿಗಳ ಪ್ರಕ್ರಿಯೆ ಪೂರ್ಣಗೊಂಡಿದೆ. ಮೇ 16ರ ನಂತರ ಪ್ರತಿ ಶನಿವಾರ ಈ ವಿಶೇಷ ಮೇಳಗಳು ನಡೆಯಲಿದ್ದು, ಸಾರ್ವಜನಿಕರು ಸದುಪಯೋಗ ಪಡಿಸಿಕೊಳ್ಳಲು ಕೋರಲಾಗಿದೆ.
ಮಧ್ಯವರ್ತಿಗಳ ಹಾವಳಿಗೆ ಮುಕ್ತಿ
ಈ ಅಭಿಯಾನದ ಪ್ರಮುಖ ಉದ್ದೇಶ ಪಾರದರ್ಶಕತೆ ಕಾಯ್ದುಕೊಳ್ಳುವುದು.
ಸಾರ್ವಜನಿಕರು ನೇರವಾಗಿ ಮೇಳಕ್ಕೆ ಭೇಟಿ ನೀಡಿ ಅರ್ಜಿ ಸಲ್ಲಿಸಬಹುದು.
ಡಿಜಿಟಲ್ ವ್ಯವಸ್ಥೆ ಇರುವುದರಿಂದ ಮಧ್ಯವರ್ತಿಗಳ ಹಾವಳಿ ಅಥವಾ ಲಂಚದ ಕಿರಿಕಿರಿ ಇರುವುದಿಲ್ಲ.
ಅರ್ಹ ಆಸ್ತಿ ಮಾಲೀಕರಿಗೆ ನೇರವಾಗಿ ಡಿಜಿಟಲ್ ರೂಪದಲ್ಲಿ ಖಾತಾ ತಲುಪಲಿದೆ.
ಇ-ಖಾತಾ ಪಡೆಯಲು ಈ ದಾಖಲೆಗಳು ಅತ್ಯಗತ್ಯ
ಮೇಳಕ್ಕೆ ಬರುವ ಸಾರ್ವಜನಿಕರು ಈ ಕೆಳಗಿನ ಮೂಲ ದಾಖಲೆಗಳು ಹಾಗೂ ಅವುಗಳ ಪ್ರತಿಯನ್ನು ತರುವುದು ಕಡ್ಡಾಯ:
ಕ್ರಯ ಪತ್ರ (Sale Deed): ಆಸ್ತಿಯ ಮಾಲೀಕತ್ವವನ್ನು ದೃಢೀಕರಿಸುವ ಮೂಲ ಪತ್ರ.
ಆಸ್ತಿ ತೆರಿಗೆ ರಸೀದಿ: ಇತ್ತೀಚಿನ ವರ್ಷದ ತೆರಿಗೆ ಪಾವತಿಸಿದ ರಸೀದಿ.
SAS ಪ್ರಾಪರ್ಟಿ ಟ್ಯಾಕ್ಸ್ ಐಡಿ: ತೆರಿಗೆ ಪಾವತಿಗೆ ಬಳಸುವ ಗುರುತಿನ ಸಂಖ್ಯೆ.
ಆಧಾರ್ ಕಾರ್ಡ್: ಮಾಲೀಕರ ಗುರುತಿಗಾಗಿ (ಇ-ಕೆವೈಸಿ ಸೌಲಭ್ಯಕ್ಕಾಗಿ).
ಇಸಿ (Encumbrance Certificate): ಆಸ್ತಿಯ ಹೊಣೆಗಾರಿಕೆ ಮುಕ್ತ ಪ್ರಮಾಣಪತ್ರ.
ಬೆಸ್ಕಾಂ ಬಿಲ್: ಪ್ರಸ್ತುತ ಬಳಕೆಯಲ್ಲಿರುವ ವಿದ್ಯುತ್ ಬಿಲ್ ಪ್ರತಿ.
ಜಿಪಿಎಸ್ ಲೊಕೇಶನ್: ಆಸ್ತಿಯ ನಿಖರವಾದ ಭೌಗೋಳಿಕ ಸ್ಥಳದ ಮಾಹಿತಿ.
ಗಮನಿಸಿ: ನಿಮ್ಮ ಆಸ್ತಿಗೆ ಸಂಬಂಧಿಸಿದ ಎಲ್ಲಾ ದಾಖಲೆಗಳು ಸರಿಯಾಗಿದ್ದಲ್ಲಿ, ಸ್ಥಳದಲ್ಲೇ ನಿಮ್ಮ ಇ-ಖಾತಾ ಪ್ರಕ್ರಿಯೆಯನ್ನು ಸುಗಮಗೊಳಿಸಲು ಈ ಮೇಳ ನೆರವಾಗಲಿದೆ.
