ವಾರದ ಏಳು ದಿನಗಳಲ್ಲಿ ಯಾವ ದಿನವು ಹೆಚ್ಚು ಒತ್ತಡ ಮತ್ತು ಬೇಸರ ಉಂಟುಮಾಡುತ್ತದೆ ಎಂಬ ಪ್ರಶ್ನೆ ದಶಕಗಳಿಂದ ಚರ್ಚೆಗೆ ಗ್ರಾಸವಾಗಿತ್ತು. ಇದೀಗ ಈ ಕುತೂಹಲಕ್ಕೆ ಅಂತ್ಯ ಹಾಡಿರುವ ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ಸ್, ಅಧಿಕೃತವಾಗಿ ವಾರದ ಅತ್ಯಂತ ‘ಕೆಟ್ಟ ದಿನ’ ಯಾವುದು ಎಂಬುದನ್ನು ಘೋಷಿಸಿದೆ.
ಸಾಮಾನ್ಯವಾಗಿ ಭಾನುವಾರವನ್ನು ಎಲ್ಲರೂ ಪ್ರೀತಿಸುವ ದಿನವೆಂದು ಪರಿಗಣಿಸಲಾಗುತ್ತದೆ. ಆದರೆ ರಜೆ ಮುಗಿದ ಬಳಿಕ ಕೆಲಸಕ್ಕೆ ಮರಳುವ ದಿನವಾದ ಸೋಮವಾರವೇ ಹೆಚ್ಚಿನ ಜನರಿಗೆ ಕಿರಿಕಿರಿ ಹಾಗೂ ಒತ್ತಡದ ದಿನವೆಂಬ ಅಭಿಪ್ರಾಯ ಬಹುಕಾಲದಿಂದ ಕೇಳಿಬರುತ್ತಿತ್ತು. ಇದೀಗ ಇದೇ ವಿಚಾರಕ್ಕೆ ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ಸ್ ಮುದ್ರೆ ಹಾಕಿದ್ದು, ಸೋಮವಾರವೇ ವಾರದ ಅತ್ಯಂತ ಕಠಿಣ ದಿನ ಎಂದು ತಿಳಿಸಿದೆ.
ಸಂಸ್ಥೆಯ ಈ ಘೋಷಣೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದ್ದು, ಲಕ್ಷಾಂತರ ಮಂದಿ ತಮ್ಮ ಅನುಭವಗಳನ್ನು ಹಂಚಿಕೊಂಡಿದ್ದಾರೆ. ಭಾನುವಾರದ ವಿಶ್ರಾಂತಿಯ ನಂತರ ಹಠಾತ್ ಕೆಲಸದ ಒತ್ತಡ, ಮೀಟಿಂಗ್ಗಳು ಮತ್ತು ಗುರಿಗಳ ಹೊರೆ ಎದುರಾಗುವುದರಿಂದ ಸೋಮವಾರವನ್ನು ‘ಮಂಡೇ ಬ್ಲೂಸ್’ ಎಂದು ಕರೆಯಲಾಗುತ್ತದೆ.
ಗಿನ್ನೆಸ್ ಘೋಷಣೆಯ ಬಳಿಕ ನೆಟ್ಟಿಗರು ಹಾಸ್ಯಮಯ ಪ್ರತಿಕ್ರಿಯೆಗಳನ್ನು ನೀಡುತ್ತಿದ್ದು, “ನಮ್ಮ ಸೋಮವಾರದ ಬೇಸರಕ್ಕೆ ಈಗ ಅಂತಾರಾಷ್ಟ್ರೀಯ ಮಾನ್ಯತೆ ಸಿಕ್ಕಿದೆ” ಎಂದು ಕಾಮೆಂಟ್ ಮಾಡುತ್ತಿದ್ದಾರೆ. ವಿವಿಧ ಮೀಮ್ಸ್ಗಳಲ್ಲಿ ಅಲಾರಾಂ ಧ್ವನಿ, ನಿದ್ರಾಭಾರ ಮತ್ತು ಕೆಲಸದ ಒತ್ತಡವನ್ನು ಹಾಸ್ಯಾತ್ಮಕವಾಗಿ ಚಿತ್ರಿಸಲಾಗುತ್ತಿದೆ.
ಒಟ್ಟಿನಲ್ಲಿ, ದಶಕಗಳಿಂದ ಜನರು ಅನುಭವಿಸುತ್ತಿದ್ದ ಸೋಮವಾರದ ಬೇಸರಕ್ಕೆ ಇದೀಗ ಅಧಿಕೃತ ಮಾನ್ಯತೆ ದೊರೆತಂತಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಚಾರ ಸಂಭ್ರಮ ಹಾಗೂ ಚರ್ಚೆಗೆ ಕಾರಣವಾಗಿದೆ.
