ಇತ್ತೀಚಿನ ದಿನಗಳಲ್ಲಿ ಬೆಳಗ್ಗೆ ಎದ್ದ ತಕ್ಷಣ ಒಂದೆರಡು ಲವಂಗಗಳನ್ನು ಜಗಿಯುವುದು ಒಂದು ಜನಪ್ರಿಯ ಆರೋಗ್ಯಕರ ಹವ್ಯಾಸವಾಗಿ ಮಾರ್ಪಟ್ಟಿದೆ. ಇದು ಜೀರ್ಣಕ್ರಿಯೆಯನ್ನು ಉತ್ತಮಗೊಳಿಸುತ್ತದೆ, ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ ಮತ್ತು ಬಾಯಿಯ ದುರ್ವಾಸನೆಯನ್ನು ಹೋಗಲಾಡಿಸುತ್ತದೆ ಎಂದು ಹಲವರು ನಂಬುತ್ತಾರೆ.
ಲವಂಗವು ಯಾವುದೇ ಪವಾಡದ ಔಷಧಿಯಲ್ಲದಿದ್ದರೂ, ವೈಜ್ಞಾನಿಕ ಸಂಶೋಧನೆಗಳ ಪ್ರಕಾರ ‘ಸಿಜಿಜಿಯಮ್ ಆರೊಮ್ಯಾಟಿಕಮ್’ ಎಂದು ಕರೆಯಲಾಗುವ ಈ ಒಣಗಿದ ಹೂವಿನ ಮೊಗ್ಗುಗಳಲ್ಲಿ ಒಟ್ಟಾರೆ ಆರೋಗ್ಯವನ್ನು ವೃದ್ಧಿಸುವ ಪ್ರಬಲ ಸಸ್ಯ ಜನ್ಯ ಸಂಯುಕ್ತಗಳಿವೆ.
ಲವಂಗದ ಈ ರಹಸ್ಯ ಅಡಗಿರುವುದು ಅದರಲ್ಲಿರುವ ‘ಯೂಜಿನಾಲ್’ ಎಂಬ ಮುಖ್ಯ ಸಕ್ರಿಯ ಸಂಯುಕ್ತದಲ್ಲಿ. ಇದು ಆಂಟಿಆಕ್ಸಿಡೆಂಟ್, ಉರಿಯೂತ ನಿವಾರಕ ಬ್ಯಾಕ್ಟೀರಿಯಾ ವಿರೋಧಿ ಮತ್ತು ನೋವು ನಿವಾರಕ ಗುಣಗಳನ್ನು ಹೊಂದಿದೆ. ಆದರೆ, ತಜ್ಞರ ಪ್ರಕಾರ ಇದರ ಹೆಚ್ಚಿನ ಸಂಶೋಧನೆಗಳು ಪ್ರಯೋಗಾಲಯ ಮತ್ತು ಪ್ರಾಣಿಗಳ ಮೇಲೆ ನಡೆದಿವೆಯೇ ಹೊರತು, ಮನುಷ್ಯರ ಮೇಲಿನ ಸಂಶೋಧನೆಗಳು ಸೀಮಿತವಾಗಿವೆ.
ದಿನಾಲೂ ಬೆಳಗ್ಗೆ ಲವಂಗ ಜಗಿಯುವುದರಿಂದ ಸಿಗುವ 5 ಮುಖ್ಯ ಪ್ರಯೋಜನಗಳು ಇಲ್ಲಿವೆ:
1. ಬಾಯಿಯ ಆರೋಗ್ಯ ಮತ್ತು ತಾಜಾ ಉಸಿರು
ಲವಂಗವನ್ನು ಜಗಿಯುವುದರಿಂದ ತಕ್ಷಣವೇ ಬಾಯಿಯ ದುರ್ವಾಸನೆ ಕಡಿಮೆಯಾಗುತ್ತದೆ. ಇದರಲ್ಲಿರುವ ಯೂಜಿನಾಲ್ ಬ್ಯಾಕ್ಟೀರಿಯಾಗಳ ಬೆಳವಣಿಗೆಯನ್ನು ತಡೆಯುತ್ತದೆ. ಈ ಕಾರಣಕ್ಕಾಗಿಯೇ ಹಲ್ಲುನೋವು ಮತ್ತು ಒಸಡಿನ ಸಮಸ್ಯೆಗೆ ಸಾಂಪ್ರದಾಯಿಕವಾಗಿ ಲವಂಗದ ಎಣ್ಣೆಯನ್ನು ಬಳಸಲಾಗುತ್ತದೆ. ಆದರೆ ನೆನಪಿಡಿ, ಇದು ಹಲ್ಲುಜ್ಜುವುದು ಮತ್ತು ಫ್ಲೋಸಿಂಗ್ ಮಾಡುವುದಕ್ಕೆ ಪರ್ಯಾಯವಲ್ಲ.
2. ಜೀರ್ಣಕ್ರಿಯೆ ಸುಧಾರಣೆ
ಲವಂಗವು ಜೀರ್ಣಕಾರಿ ಕಿಣ್ವಗಳನ್ನು (enzymes) ಉತ್ತೇಜಿಸುವ ಮೂಲಕ ಆಹಾರವನ್ನು ಸುಲಭವಾಗಿ ಜೀರ್ಣಿಸಿಕೊಳ್ಳಲು ಸಹಾಯ ಮಾಡುತ್ತದೆ. ಇದು ಹೊಟ್ಟೆ ಉಬ್ಬರ, ಗ್ಯಾಸ್ ಮತ್ತು ಅಜೀರ್ಣ ಸಮಸ್ಯೆಯಿಂದ ಪರಿಹಾರ ನೀಡುತ್ತದೆ. ಪ್ರಾಣಿಗಳ ಮೇಲಿನ ಸಂಶೋಧನೆಗಳ ಪ್ರಕಾರ, ಇದು ಹೊಟ್ಟೆಯ ಒಳಪದರವನ್ನು ರಕ್ಷಿಸಿ, ಅಲ್ಸರ್ (ವ್ರಣ) ಅಪಾಯವನ್ನು ಕಡಿಮೆ ಮಾಡುತ್ತದೆ.
3. ಪ್ರಬಲ ಆಂಟಿಆಕ್ಸಿಡೆಂಟ್ಗಳ ಆಗರ
ಮಸಾಲೆ ಪದಾರ್ಥಗಳಲ್ಲೇ ಲವಂಗವು ಅತಿ ಹೆಚ್ಚು ಆಂಟಿಆಕ್ಸಿಡೆಂಟ್ಗಳನ್ನು ಹೊಂದಿರುವ ಸಾಂಬಾರ ಪದಾರ್ಥವಾಗಿದೆ. ಇವು ವಯಸ್ಸಾಗುವಿಕೆ, ಉರಿಯೂತ ಹಾಗೂ ಹೃದಯ ಕಾಯಿಲೆ ಮತ್ತು ಮಧುಮೇಹದಂತಹ ದೀರ್ಘಕಾಲದ ಕಾಯಿಲೆಗಳಿಗೆ ಕಾರಣವಾಗುವ ಮುಕ್ತ ರಾಡಿಕಲ್ಸ್ (free radicals) ವಿರುದ್ಧ ಹೋರಾಡುತ್ತವೆ.
4. ರಕ್ತದಲ್ಲಿನ ಸಕ್ಕರೆ ಮಟ್ಟದ ನಿಯಂತ್ರಣ
ಲವಂಗದಲ್ಲಿರುವ ಸಂಯುಕ್ತಗಳು ಇನ್ಸುಲಿನ್ ಸೂಕ್ಷ್ಮತೆಯನ್ನು ಸುಧಾರಿಸಲು ಮತ್ತು ಊಟದ ನಂತರ ರಕ್ತದಲ್ಲಿ ಸಕ್ಕರೆ ಮಟ್ಟ ದಿಢೀರ್ ಹೆಚ್ಚಾಗುವುದನ್ನು ತಡೆಯಲು ಸಹಾಯ ಮಾಡುತ್ತದೆ ಎಂದು ಕೆಲವು ಸಣ್ಣ ಪ್ರಮಾಣದ ಅಧ್ಯಯನಗಳು ತೋರಿಸಿವೆ. ಆದರೆ, ಮಧುಮೇಹ ಇರುವವರು ವೈದ್ಯರ ಸಲಹೆ ಮೇರೆಗೇ ಇದನ್ನು ಬಳಸಬೇಕು.
5. ಉರಿಯೂತ ನಿವಾರಕ (Anti-inflammatory)
ದೀರ್ಘಕಾಲದ ಉರಿಯೂತವು ಸಂಧಿವಾತ (arthritis), ಹೃದಯ ಸಂಬಂಧಿ ಕಾಯಿಲೆಗಳಿಗೆ ಕಾರಣವಾಗಬಹುದು. ಲವಂಗದಲ್ಲಿರುವ ಯೂಜಿನಾಲ್ ಉರಿಯೂತದ ವಿರುದ್ಧ ಹೋರಾಡುವ ಗುಣವನ್ನು ಹೊಂದಿದೆ.
