ಪೆಟ್ರೋಲ್ ಯಾವ ಸಮಯದಲ್ಲಿ ಹಾಕಿಸಿದರೆ ಲಾಭ? ವಾಹನ ಸವಾರರು ತಿಳಿಯಲೇಬೇಕಾದ ಮಹತ್ವದ ಮಾಹಿತಿ

ಪೆಟ್ರೋಲ್ ಬಂಕ್‌ನಲ್ಲಿ ಯಾವ ಸಮಯದಲ್ಲಿ ಇಂಧನ ತುಂಬಿಸಬೇಕು ಎಂಬ ಪ್ರಶ್ನೆ ಬಹುತೇಕ ವಾಹನ ಸವಾರರನ್ನು ಕಾಡುತ್ತದೆ. ತಜ್ಞರ ಪ್ರಕಾರ, ಬೆಳಗಿನ ಜಾವ ಅಥವಾ ರಾತ್ರಿ ವೇಳೆಯಲ್ಲಿ ಪೆಟ್ರೋಲ್ ಹಾಗೂ ಡೀಸೆಲ್ ತುಂಬಿಸುವುದು ಹೆಚ್ಚು ಲಾಭದಾಯಕ ಎನ್ನಲಾಗಿದೆ. ಇದರ ಹಿಂದೆ ವೈಜ್ಞಾನಿಕ ಕಾರಣವೂ ಇದೆ.ಪೆಟ್ರೋಲಿಯಂ ಉತ್ಪನ್ನಗಳು ತಾಪಮಾನ ಹೆಚ್ಚಾದಂತೆ ವಿಸ್ತರಿಸುವ ಗುಣ ಹೊಂದಿವೆ. ಮಧ್ಯಾಹ್ನ ಬಿಸಿಲಿನ ತಾಪಮಾನ ಹೆಚ್ಚಿರುವ ಸಂದರ್ಭದಲ್ಲಿ ಪೆಟ್ರೋಲ್‌ನ ಸಾಂದ್ರತೆ ಕಡಿಮೆಯಾಗುತ್ತದೆ. ಹೀಗಾಗಿ ಗಾತ್ರದಲ್ಲಿ ಒಂದು ಲೀಟರ್ ಇದ್ದರೂ ಅದರ ದ್ರವ್ಯರಾಶಿಯಲ್ಲಿ ಸ್ವಲ್ಪ ವ್ಯತ್ಯಾಸ ಉಂಟಾಗಬಹುದು. ಇದರ ಪರಿಣಾಮವಾಗಿ ವಾಹನದ ಮೈಲೇಜ್ ಮೇಲೂ ಅಲ್ಪ ಪ್ರಮಾಣದ ಪರಿಣಾಮ ಬೀರುವ ಸಾಧ್ಯತೆ ಇದೆ ಎಂದು ತಜ್ಞರು ಹೇಳುತ್ತಾರೆ.

ಇದೇ ವೇಳೆ, ಬೆಳಿಗ್ಗೆ ಅಥವಾ ರಾತ್ರಿ ಸಮಯದಲ್ಲಿ ಭೂಗತ ಟ್ಯಾಂಕ್‌ಗಳು ತಂಪಾಗಿರುವುದರಿಂದ ಪೆಟ್ರೋಲ್‌ನ ಸಾಂದ್ರತೆ ಹೆಚ್ಚು ಇರುತ್ತದೆ. ಹೀಗಾಗಿ ಗ್ರಾಹಕರು ಪಾವತಿಸುವ ಹಣಕ್ಕೆ ಸಮರ್ಪಕ ಪ್ರಮಾಣದ ಇಂಧನ ದೊರೆಯುವ ಸಾಧ್ಯತೆ ಹೆಚ್ಚಿರುತ್ತದೆ. ದೀರ್ಘಕಾಲ ಈ ಪದ್ಧತಿ ಅನುಸರಿಸಿದರೆ ಹಣ ಉಳಿತಾಯಕ್ಕೂ ನೆರವಾಗಬಹುದು ಎಂದು ತಿಳಿಸಲಾಗಿದೆ.ವಾಹನ ಸವಾರರು ಗಮನಿಸಬೇಕಾದ ಕೆಲವು ಪ್ರಮುಖ ಸಲಹೆಗಳೂ ಇವೆ. ಟ್ಯಾಂಕ್ ಸಂಪೂರ್ಣ ಖಾಲಿಯಾಗುವವರೆಗೆ ಕಾಯದೇ ಕನಿಷ್ಠ ಕಾಲು ಭಾಗದಷ್ಟು ಇಂಧನ ಉಳಿದಿರುವಾಗಲೇ ತುಂಬಿಸುವುದು ಉತ್ತಮ. ಟ್ಯಾಂಕ್ ಖಾಲಿಯಾದರೆ ಇಂಧನ ಪಂಪ್ ಬಿಸಿಯಾಗಿ ಹಾನಿಗೊಳಗಾಗುವ ಸಾಧ್ಯತೆ ಇದೆ.

ಪೆಟ್ರೋಲ್ ಹಾಕಿಸುವ ಮೊದಲು ಯಂತ್ರದ ಡಿಸ್‌ಪ್ಲೇನಲ್ಲಿ ‘0’ ತೋರಿಸುತ್ತಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕು. ಜೊತೆಗೆ ಬಂಕ್‌ನಲ್ಲಿ ಟ್ಯಾಂಕರ್ ಮೂಲಕ ಇಂಧನ ತುಂಬಿಸುವ ಕಾರ್ಯ ನಡೆಯುತ್ತಿರುವ ವೇಳೆ ಅಥವಾ ತಕ್ಷಣದ ಬಳಿಕ ಇಂಧನ ಹಾಕಿಸಬಾರದು. ಆ ಸಮಯದಲ್ಲಿ ಟ್ಯಾಂಕ್‌ನ ಅಡಿಯಲ್ಲಿರುವ ಕಸ ಮತ್ತು ಕಶ್ಮಲಗಳು ಮೇಲಕ್ಕೆ ಬಂದು ವಾಹನದ ಇಂಜಿನ್‌ಗೆ ಹಾನಿ ಉಂಟುಮಾಡುವ ಸಾಧ್ಯತೆ ಇದೆ.ಇನ್ನು ನಳಿಕೆಯನ್ನು ಕೈಯಿಂದ ಹಿಡಿದು ತುಂಬಿಸುವ ಬದಲು ‘ಆಟೋ ಕಟ್’ ಮೋಡ್‌ನಲ್ಲಿ ಇಂಧನ ತುಂಬಿಸಲು ಸೂಚಿಸಿದರೆ ಗಾಳಿಯ ಮಿಶ್ರಣ ಕಡಿಮೆಯಾಗುತ್ತದೆ ಎನ್ನಲಾಗುತ್ತಿದೆ. ಡಿಜಿಟಲ್ ಪಾವತಿಗಳ ಮೂಲಕ ಕ್ಯಾಶ್‌ಬ್ಯಾಕ್ ಹಾಗೂ ಇತರ ಆಫರ್‌ಗಳ ಲಾಭವೂ ಪಡೆಯಬಹುದಾಗಿದೆ. ಬಿಸಿಲಿನ ಮಧ್ಯಾಹ್ನಕ್ಕಿಂತ ತಂಪಾದ ಬೆಳಗ್ಗೆ ಅಥವಾ ರಾತ್ರಿ ವೇಳೆಯಲ್ಲಿ ಪೆಟ್ರೋಲ್ ಹಾಕಿಸುವುದು ವೈಜ್ಞಾನಿಕವಾಗಿ ಹೆಚ್ಚು ಪ್ರಯೋಜನಕಾರಿ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.