ದೆಹಲಿ, ಆಗಸ್ಟ್ 18: ದೇಶದಾದ್ಯಂತ ಪ್ರತಿದಿನ ನಡೆಯುತ್ತಿರುವ ಹೊಸ ನಿರ್ಮಾಣ, ತಂತ್ರಜ್ಞಾನ ಅಭಿವೃದ್ಧಿ, ಸ್ಟಾರ್ಟ್ಅಪ್ಗಳ ಬೆಳವಣಿಗೆ, ವೈಜ್ಞಾನಿಕ ಸಾಧನೆಗಳು ಹಾಗೂ ಮೂಲಸೌಕರ್ಯ ಯೋಜನೆಗಳ ಮಾಹಿತಿಯನ್ನು ಒಂದೇ ವೇದಿಕೆಯಲ್ಲಿ ನೋಡಲು ಸಾಧ್ಯವಾದರೆ ಹೇಗಿರುತ್ತದೆ? ಈ ಕಲ್ಪನೆಗೆ ಡಿಜಿಟಲ್ ರೂಪ ನೀಡುವ ಪ್ರಯತ್ನವೊಂದು ಇದೀಗ ಗಮನ ಸೆಳೆಯುತ್ತಿದೆ.
ಭಾರತದ ಸ್ವಾತಂತ್ರ್ಯ ದಿನವಾದ ಆಗಸ್ಟ್ 15, 2026ರಂದು ಡೆವಲಪರ್ ಸ್ವಪ್ನಿಲ್ ದುಬೆ (@swpnldubey) ಅವರು indiaisbuilding.live ಎಂಬ ಹೊಸ ಡಿಜಿಟಲ್ ವೇದಿಕೆಯನ್ನು ಪರಿಚಯಿಸಿದ್ದಾರೆ. ದೇಶದ ಅಭಿವೃದ್ಧಿಯ ವಿವಿಧ ಆಯಾಮಗಳನ್ನು ಒಂದೇ ಇಂಟರಾಕ್ಟಿವ್ ಡ್ಯಾಶ್ಬೋರ್ಡ್ನಲ್ಲಿ ಪ್ರದರ್ಶಿಸುವುದು ಇದರ ಪ್ರಮುಖ ಉದ್ದೇಶವಾಗಿದೆ.
ಒಂದೇ ವೇದಿಕೆಯಲ್ಲಿ ದೇಶದ ಅಭಿವೃದ್ಧಿಯ ಚಿತ್ರಣ
ದೇಶದ ಪ್ರಗತಿಗೆ ಸಂಬಂಧಿಸಿದ ಸುದ್ದಿಗಳು ಸಾಮಾನ್ಯವಾಗಿ ವಿವಿಧ ಪತ್ರಿಕೆಗಳು, ವೆಬ್ಸೈಟ್ಗಳು ಹಾಗೂ ತಂತ್ರಜ್ಞಾನ ವೇದಿಕೆಗಳಲ್ಲಿ ಚದುರಿರುತ್ತವೆ. ಹೊಸ ಸೌರ ವಿದ್ಯುತ್ ಘಟಕ, ಹೊಸ ಮೂಲಸೌಕರ್ಯ, ಬೆಂಗಳೂರಿನಲ್ಲಿ ಆರಂಭವಾಗುವ AI ಸ್ಟಾರ್ಟ್ಅಪ್ ಅಥವಾ ಹೈದರಾಬಾದ್ನ ರಕ್ಷಣಾ ತಂತ್ರಜ್ಞಾನ ಸಾಧನೆ ಹೀಗೆ ಪ್ರತಿಯೊಂದು ಬೆಳವಣಿಗೆಯೂ ಪ್ರತ್ಯೇಕ ಸುದ್ದಿಯಾಗಿ ಕಾಣಿಸುತ್ತದೆ.
ಈ ಮಾಹಿತಿಯನ್ನೇ ಒಂದೆಡೆ ಸಂಗ್ರಹಿಸಿ, ಭೌಗೋಳಿಕ ಸ್ಥಳದೊಂದಿಗೆ ಸಂಪರ್ಕಿಸಿ ಪ್ರದರ್ಶಿಸುವ ಕೆಲಸವನ್ನು indiaisbuilding.live ಮಾಡುತ್ತದೆ.
12 ಕ್ಷೇತ್ರಗಳಲ್ಲಿ ಭಾರತದ ಬೆಳವಣಿಗೆ
ವೇದಿಕೆಯಲ್ಲಿರುವ ಇಂಟರಾಕ್ಟಿವ್ ನಕ್ಷೆಯಲ್ಲಿ ದೇಶದ ವಿವಿಧ ಭಾಗಗಳಲ್ಲಿ ಹೊಳೆಯುವ ಗುರುತುಗಳನ್ನು ಕಾಣಬಹುದು. ಪ್ರತಿಯೊಂದು ಗುರುತೂ ಇತ್ತೀಚೆಗೆ ನಡೆದಿರುವ ನಿರ್ದಿಷ್ಟ ಅಭಿವೃದ್ಧಿ ಅಥವಾ ಸಾಧನೆಯನ್ನು ಪ್ರತಿನಿಧಿಸುತ್ತದೆ.
ಇಲ್ಲಿ ದೇಶದ ಪ್ರಗತಿಯನ್ನು ಹಲವು ಪ್ರಮುಖ ಕ್ಷೇತ್ರಗಳಾಗಿ ವಿಂಗಡಿಸಲಾಗಿದೆ. ಅವುಗಳಲ್ಲಿ ಪ್ರಮುಖವಾಗಿ:
ಬಾಹ್ಯಾಕಾಶ ಮತ್ತು ವಿಜ್ಞಾನ
ಮೂಲಸೌಕರ್ಯ ಮತ್ತು ಸಾರಿಗೆ
ಕೃತಕ ಬುದ್ಧಿಮತ್ತೆ (AI) ಮತ್ತು ತಂತ್ರಜ್ಞಾನ
ಇಂಧನ ಮತ್ತು ಉತ್ಪಾದನೆ
ಸ್ಟಾರ್ಟ್ಅಪ್ಗಳು ಮತ್ತು ಸಂಶೋಧನೆ
ಸಾರ್ವಜನಿಕ ವ್ಯವಸ್ಥೆಗಳು
ಶಿಕ್ಷಣ
ರಕ್ಷಣಾ ತಂತ್ರಜ್ಞಾನ ಸೇರಿದಂತೆ ಹಲವು ಕ್ಷೇತ್ರಗಳು ಸೇರಿವೆ.
‘ಇಂದು’, ‘48 ಗಂಟೆ’ ಹಾಗೂ ‘ಎಲ್ಲಾ ಸಮಯ’ ಆಯ್ಕೆ
ಡ್ಯಾಶ್ಬೋರ್ಡ್ನಲ್ಲಿ ಬಳಕೆದಾರರು ತಮಗೆ ಬೇಕಾದ ಅವಧಿಯನ್ನು ಆಯ್ಕೆ ಮಾಡಿಕೊಂಡು ದೇಶದ ಬೆಳವಣಿಗೆಯನ್ನು ವೀಕ್ಷಿಸಬಹುದು. ‘Today’, ‘48 Hours’ ಮತ್ತು ‘All Time’ ಎಂಬ ಆಯ್ಕೆಗಳ ಮೂಲಕ ಇತ್ತೀಚಿನ ಅಥವಾ ಇದುವರೆಗೆ ದಾಖಲಾಗಿರುವ ಬೆಳವಣಿಗೆಗಳನ್ನು ನೋಡಬಹುದಾಗಿದೆ.
ಇದರೊಂದಿಗೆ ದೇಶದ ಅಭಿವೃದ್ಧಿಗೆ ಸಂಬಂಧಿಸಿದ ಎಷ್ಟು ಸಾಧನೆಗಳು ದಾಖಲಾಗಿವೆ ಎಂಬುದನ್ನು ತೋರಿಸುವ ಪ್ರಗತಿ ಕೌಂಟರ್ ಕೂಡ ಇದೆ.
‘Dear India, 2047’ ವಿಶೇಷ ವಿಭಾಗ
ಈ ವೇದಿಕೆಯ ಮತ್ತೊಂದು ಗಮನಾರ್ಹ ಅಂಶವೆಂದರೆ ‘DEAR INDIA, 2047’ ಎಂಬ ಸಮುದಾಯ ವಿಭಾಗ.
2047ರಲ್ಲಿ ಭಾರತ ಸ್ವಾತಂತ್ರ್ಯದ 100ನೇ ವರ್ಷವನ್ನು ಆಚರಿಸಲಿದೆ. ಈ ಹಿನ್ನೆಲೆಯಲ್ಲಿ, “ಅಷ್ಟರೊಳಗೆ ಭಾರತ ಏನನ್ನು ನಿರ್ಮಿಸಬೇಕು ಎಂದು ನೀವು ಆಶಿಸುತ್ತೀರಿ?” ಎಂಬ ಪ್ರಶ್ನೆಯನ್ನು ಮುಂದಿಟ್ಟು ಸಾರ್ವಜನಿಕರಿಂದ ತಮ್ಮ ಕನಸು ಮತ್ತು ಆಶಯಗಳನ್ನು ಹಂಚಿಕೊಳ್ಳಲು ಅವಕಾಶ ನೀಡಲಾಗಿದೆ.
ಇತರರು ಬರೆದಿರುವ ಆಶಯಗಳನ್ನು ಓದುವ ಅವಕಾಶವೂ ಇರುವುದರಿಂದ, ಇದು ಭಾರತದ ಭವಿಷ್ಯದ ಕುರಿತು ನಾಗರಿಕರ ಕನಸುಗಳನ್ನು ದಾಖಲಿಸುವ ಡಿಜಿಟಲ್ ಟೈಮ್ ಕ್ಯಾಪ್ಸುಲ್ನಂತೆ ಕಾರ್ಯನಿರ್ವಹಿಸುತ್ತದೆ.
ಅಭಿವೃದ್ಧಿಯನ್ನು ಕೇವಲ ಅಂಕಿ-ಅಂಶಗಳಲ್ಲಿ ಅಲ್ಲ, ಕಣ್ಣಮುಂದೆ!
ಇಂದಿನ ಸಾಮಾಜಿಕ ಮಾಧ್ಯಮಗಳಲ್ಲಿ ಹೆಚ್ಚಾಗಿ ವಿವಾದಗಳು, ನಕಾರಾತ್ಮಕ ಸುದ್ದಿಗಳು ಹಾಗೂ ರಾಜಕೀಯ ಚರ್ಚೆಗಳು ಗಮನ ಸೆಳೆಯುತ್ತಿವೆ. ಇಂತಹ ಸಂದರ್ಭದಲ್ಲಿ indiaisbuilding.live ಭಾರತದ ಅಭಿವೃದ್ಧಿ ಮತ್ತು ಹೊಸತನವನ್ನು ಸಕಾರಾತ್ಮಕವಾಗಿ ನೋಡಲು ವಿಭಿನ್ನ ವೇದಿಕೆಯಾಗಿ ಹೊರಹೊಮ್ಮಿದೆ.
ದೇಶದ ಪ್ರಗತಿಯನ್ನು ಕೇವಲ ಅಂಕಿ-ಅಂಶಗಳ ಮೂಲಕ ಹೇಳುವುದಕ್ಕಿಂತ, ನಕ್ಷೆಯ ಮೇಲೆ ನಡೆಯುತ್ತಿರುವ ಬೆಳವಣಿಗೆಗಳನ್ನು ದೃಶ್ಯ ರೂಪದಲ್ಲಿ ತೋರಿಸುವುದು ಈ ಯೋಜನೆಯ ವಿಶೇಷತೆ.
i made a website where you can watch India being built, live.
every day, things are being built, launched, discovered and improved across the country. I wanted one place where you could actually see all of it happening.
happy independence day 🇮🇳https://t.co/y5yT87zZH9 pic.twitter.com/QuathVUABq
— swapnil (@swpnldubey) August 15, 2026
