ರಾತ್ರಿ ಚೆನ್ನಾಗಿ ನಿದ್ದೆ ಮಾಡಬೇಕೇ? ಹಾಗಿದ್ದರೆ ಮಲಗುವ ಮುನ್ನ ಈ ಆಹಾರಗಳಿಂದ ದೂರವಿರಿ!

ಪ್ರಸ್ತುತ ಆಧುನಿಕ ಜೀವನಶೈಲಿಯಲ್ಲಿ ಅನೇಕರು ಎದುರಿಸುತ್ತಿರುವ ಪ್ರಮುಖ ಆರೋಗ್ಯ ಸಮಸ್ಯೆಗಳಲ್ಲಿ ನಿದ್ರಾಹೀನತೆಯೂ ಒಂದು. ಇಡೀ ದಿನ ದಣಿದು ರಾತ್ರಿ ಹಾಸಿಗೆಗೆ ವಾಲಿದರೂ ಕಣ್ಣಿಗೆ ನಿದ್ದೆ ಬಾರದೆ ಒದ್ದಾಡುವವರ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಇದಕ್ಕೆ ನಮ್ಮ ಬದಲಾದ ಆಹಾರ ಪದ್ಧತಿಯೂ ಒಂದು ಪ್ರಮುಖ ಕಾರಣ ಎನ್ನುತ್ತಾರೆ ತಜ್ಞರು. ಕಣ್ಣತುಂಬಾ ಒಳ್ಳೆಯ ಮತ್ತು ನೆಮ್ಮದಿಯ ನಿದ್ರೆ ಮಾಡಬೇಕು ಅಂದ್ರೆ, ಮಲಗುವ ಮುನ್ನ ಕೆಲವು ನಿರ್ದಿಷ್ಟ ಆಹಾರಗಳಿಂದ ದೂರವಿರಬೇಕು ಎಂದು ವೈದ್ಯರು ಸಲಹೆ ನೀಡುತ್ತಾರೆ.

ರಾತ್ರಿ ನಿದ್ರೆಗೆ ಭಂಗ ತರುವ ಹಾಗೂ ಜೀರ್ಣಕ್ರಿಯೆಗೆ ತೊಂದರೆ ಕೊಡುವ ಪ್ರಮುಖ ಆಹಾರಗಳ ಪಟ್ಟಿ ಇಲ್ಲಿದೆ:

ಮಾಂಸಾಹಾರ:

ಮಾಂಸಾಹಾರದಲ್ಲಿ ಕೊಬ್ಬು ಮತ್ತು ಪ್ರೋಟೀನ್‌ ಗಳು ಹೇರಳವಾಗಿರುತ್ತವೆ. ಇವು ದೇಹಕ್ಕೆ ಶಕ್ತಿ ನೀಡಿದರೂ, ಜೀರ್ಣವಾಗಲು ಬಹಳ ಸಮಯ ತೆಗೆದುಕೊಳ್ಳುತ್ತವೆ. ರಾತ್ರಿ ತಡವಾಗಿ ಮಾಂಸಾಹಾರ ಸೇವಿಸಿ ಮಲಗುವುದರಿಂದ ಜೀರ್ಣಾಂಗ ವ್ಯವಸ್ಥೆಯು ವಿಶ್ರಾಂತಿ ಪಡೆಯದೆ ಕೆಲಸ ಮಾಡಬೇಕಾಗುತ್ತದೆ, ಇದು ನಿದ್ರಾಹೀನತೆಗೆ ಕಾರಣವಾಗುತ್ತದೆ.

ಮಸಾಲೆಯುಕ್ತ ಆಹಾರಗಳು (Spicy Foods):

ಯಾವುದೇ ಸಮಯವಾಗಿರಲಿ, ಅತಿಯಾದ ಮಸಾಲೆಯುಕ್ತ ಆಹಾರವನ್ನು ಸೇವಿಸುವುದರಿಂದ ಹೊಟ್ಟೆಗೆ ಸಂಬಂಧಿಸಿದ ಸಮಸ್ಯೆಗಳು ಹಾಗೂ ಎದೆಯುರಿ (Acidity) ಉಂಟಾಗಬಹುದು. ವಿಶೇಷವಾಗಿ ರಾತ್ರಿಯ ಸಮಯದಲ್ಲಿ ಇಂತಹ ಆಹಾರ ಸೇವನೆ ಮಾಡುವುದರಿಂದ ಅಸಿಡಿಟಿ ಹೆಚ್ಚಾಗಿ ನಿದ್ರೆಗೆ ತೊಂದರೆಯಾಗುತ್ತದೆ.

ಕಾಫಿ ಸೇವನೆ:

ಅನೇಕರಿಗೆ ರಾತ್ರಿ ಊಟದ ನಂತರ ಬಿಸಿಬಿಸಿಯಾದ ಕಾಫಿ ಕುಡಿಯುವ ಅಭ್ಯಾಸವಿರುತ್ತದೆ. ಆದರೆ ಕಾಫಿಯಲ್ಲಿರುವ ಕೆಫೀನ್ ಅಂಶವು ಮೆದುಳನ್ನು ಜಾಗೃತವಾಗಿಡುತ್ತದೆ. ಹೀಗಾಗಿ ಸಂಜೆಯ ನಂತರ ಅಥವಾ ರಾತ್ರಿ ವೇಳೆ ಕಾಫಿ ಕುಡಿಯುವುದು ನಿದ್ರಾಹೀನತೆಗೆ ನೇರ ಕಾರಣವಾಗಬಹುದು.

ಚಹಾ (ಟೀ):

ಕಾಫಿಯಂತೆಯೇ ಚಹಾ ಎಲೆಗಳಲ್ಲಿಯೂ ಕೆಫೀನ್ ಅಂಶ ಅಡಗಿರುತ್ತದೆ. ಮಲಗುವ ಮುನ್ನ ಬಿಸಿ ಚಹಾ ಸೇವಿಸುವುದರಿಂದ ಅದು ನಿದ್ರೆಯ ಚಕ್ರದ (Sleep Cycle) ಮೇಲೆ ತೀವ್ರ ಪರಿಣಾಮ ಬೀರಲಿದ್ದು, ರಾತ್ರಿಯಿಡೀ ನಿದ್ರೆ ಬಾರದೆ ಒದ್ದಾಡುವಂತೆ ಮಾಡಬಹುದು.

ಜಂಕ್ ಫುಡ್ (Junk Food):

ಪಿಜ್ಜಾ, ಬರ್ಗರ್ ಅಥವಾ ಎಣ್ಣೆಯಲ್ಲಿ ಕರಿದ ಜಂಕ್ ಫುಡ್‌ಗಳಲ್ಲಿ ಹೆಚ್ಚಿನ ಪ್ರಮಾಣದ ‘ಸ್ಯಾಚುರೇಟೆಡ್ ಕೊಬ್ಬಿನ’ (Saturated Fat) ಅಂಶ ಇರುತ್ತದೆ. ಇಂತಹ ಆಹಾರಗಳು ಹೊಟ್ಟೆಯಲ್ಲಿ ಸುಲಭವಾಗಿ ಮತ್ತು ಬೇಗನೆ ಜೀರ್ಣವಾಗುವುದಿಲ್ಲ. ಇದು ಹೊಟ್ಟೆ ಉಬ್ಬರಕ್ಕೆ ಕಾರಣವಾಗಿ ರಾತ್ರಿಯ ನಿದ್ದೆಯನ್ನು ಹಾಳು ಮಾಡುತ್ತದೆ.

ಒಳ್ಳೆಯ ಆರೋಗ್ಯಕ್ಕೆ ನಿರಂತರ ಹಾಗೂ ಗಾಢವಾದ ನಿದ್ರೆ ಅತ್ಯಗತ್ಯ. ಹಾಗಾಗಿ ರಾತ್ರಿ ಸಮಯದಲ್ಲಿ ಈ ಮೇಲಿನ ಆಹಾರ ಪದಾರ್ಥಗಳನ್ನು ಸೇವಿಸುವುದನ್ನು ಸಂಪೂರ್ಣವಾಗಿ ತಡೆದರೆ, ಯಾವುದೇ ಅಡೆತಡೆಯಿಲ್ಲದೆ ನೆಮ್ಮದಿಯ ನಿದ್ರೆ ನಿಮ್ಮದಾಗುವುದರಲ್ಲಿ ಸಂಶಯವಿಲ್ಲ.