ಸುದ್ದಿಒನ್, ಚಿತ್ರದುರ್ಗ, ಅಕ್ಟೋಬರ್. 30 : ಕರ್ನಾಟಕ ಸರ್ಕಾರ ಪ್ರಕಟಿಸಿರುವ 2026ನೇ ಸಾಲಿನ ಪ್ರತಿಷ್ಠಿತ ರಾಜ್ಯೋತ್ಸವ ಪ್ರಶಸ್ತಿ ಪ್ರಕಟವಾಗಿದ್ದು, ಚಿತ್ರದುರ್ಗ ಜಿಲ್ಲೆಯ ಇಬ್ಬರು ಪ್ರಶಸ್ತಿಗೆ ಭಾಜನರಾಗಿದ್ದಾರೆ.
ರಂಗಭೂಮಿ ಕ್ಷೇತ್ರದಲ್ಲಿ ಆರು ದಶಕಗಳಿಗೂ ಹೆಚ್ಚು ಕಾಲ ನಿಸ್ವಾರ್ಥ ಸೇವೆ ಸಲ್ಲಿಸಿದ ಹಿರಿಯ ರಂಗಕರ್ಮಿ ಜಿ.ಡಿ. ತಿಮ್ಮಯ್ಯ ಹಾಗೂ ಪತ್ರಿಕೋದ್ಯಮ ರಂಗದಲ್ಲಿ ದಿಟ್ಟ, ಮೌಲ್ಯಾಧಾರಿತ ಬರವಣಿಗೆಯ ಮೂಲಕ ಗಮನ ಸೆಳೆದಿರುವ ಹಿರಿಯ ಪತ್ರಕರ್ತ ಡಿ. ಉಮಾಪತಿ ಅವರಿಗೆ ಈ ಬಾರಿ ನಾಡಿನ ಅತ್ಯುನ್ನತ ಗೌರವ ಒಲಿದುಬಂದಿದೆ. ಕಲೆ ಮತ್ತು ಮಾಧ್ಯಮ ಕ್ಷೇತ್ರದ ಈ ಇಬ್ಬರು ಸಾಧಕರ ಆಯ್ಕೆಯಿಂದಾಗಿ ಐತಿಹಾಸಿಕ ಚಿತ್ರದುರ್ಗ ಜಿಲ್ಲೆಯ ಗರಿಮೆಗೆ ಮತ್ತಷ್ಟು ಶೋಭೆ ಬಂದಂತಾಗಿದೆ.
ಗ್ರಾಮೀಣ ರಂಗಭೂಮಿಯ ಜೀವನಾಡಿ ಜಿ.ಡಿ. ತಿಮ್ಮಯ್ಯ :
ಹಿರಿಯೂರು ತಾಲೂಕಿನ ಹರಿಯಬ್ಬೆ ಗ್ರಾಮದ ಜಿ.ಡಿ. ತಿಮ್ಮಯ್ಯ ಅವರು ರಂಗಭೂಮಿ ಲೋಕದಲ್ಲಿ ‘ತೋಟದವರ ದೊಡ್ಡ ತಿಮ್ಮಯ್ಯ’ ಎಂದೇ ಚಿರಪರಿಚಿತರು. ಗಿರೇ ತಿಮ್ಮಯ್ಯ ಹಾಗೂ ತಿಮ್ಮಕ್ಕ ದಂಪತಿಯ ಪುತ್ರನಾಗಿ 1936ರ ಆಗಸ್ಟ್ 13ರಂದು ಜನಿಸಿದ ತಿಮ್ಮಯ್ಯ ಅವರಿಗೆ ಈಗ 87 ವರ್ಷ ವಯಸ್ಸು. ಕಿರಿಯ ವಯಸ್ಸಿನಿಂದಲೇ ನಾಟಕ ಹಾಗೂ ಸಂಗೀತದತ್ತ ಆಕರ್ಷಿತರಾದ ಇವರು, ಪರಶುರಾಪುರದ ಟಿ. ತಿಪ್ಪೇಸ್ವಾಮಿ, ಹಿರಿಯೂರಿನ ಎಂ. ರಾಮಸ್ವಾಮಿ ಹಾಗೂ ಏಕನಾಥೇಶ್ವರಿ ಸಂಗೀತ ಶಾಲೆಯಲ್ಲಿ ಕಲಾ ಶಿಕ್ಷಣ ಪಡೆದು ತಮ್ಮ ಪ್ರತಿಭೆಯನ್ನು ರೂಪಿಸಿಕೊಂಡರು. ಕೇವಲ ಅಭಿನಯಕ್ಕಷ್ಟೇ ಸೀಮಿತವಾಗದೆ ಗಾಯನ, ಜಾನಪದ ಹಾಡುಗಾರಿಕೆ, ಹಾರ್ಮೋನಿಯಂ ವಾದನ, ನಾಟಕ ನಿರ್ದೇಶನ, ಸಾಹಿತ್ಯ ರಚನೆ ಮತ್ತು ರಾಗ ಸಂಯೋಜನೆಯಲ್ಲೂ ಪರಿಣತಿ ಹೊಂದಿದ ಅಪರೂಪದ ಬಹುಮುಖ ಪ್ರತಿಭೆ ಇವರಾಗಿದ್ದಾರೆ. 1999ರಲ್ಲಿ ಕರ್ನಾಟಕ ಸಂಗೀತ ಜೂನಿಯರ್ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿದ್ದ ಇವರು, ‘ಕವನ ಕುಸುಮ’ ಕವನ ಸಂಕಲನ ಪ್ರಕಟಿಸಿದ್ದಲ್ಲದೆ ಧ್ವನಿಸುರುಳಿಗಳಿಗೂ ಸಾಹಿತ್ಯ ಬರೆದು ತಮ್ಮ ಸಾಹಿತ್ಯಕ ಅಭಿರುಚಿಯನ್ನು ಮೆರೆದಿದ್ದಾರೆ.
ಆರು ದಶಕಗಳ ರಂಗ ಪಯಣ ಮತ್ತು ಜನಜಾಗೃತಿ ಕಾಯಕ :
1963ರಲ್ಲಿ ಹರಿಯಬ್ಬೆಯಲ್ಲಿ ಪ್ರದರ್ಶಿತವಾದ ‘ಮಾನವತಿ’ ನಾಟಕದ ಮೂಲಕ ನಿರ್ದೇಶನ ಆರಂಭಿಸಿದ ತಿಮ್ಮಯ್ಯನವರು, ಇಲ್ಲಿಯವರೆಗೆ ಪೌರಾಣಿಕ, ಸಾಮಾಜಿಕ ಹಾಗೂ ಐತಿಹಾಸಿಕ ಪ್ರಕಾರಗಳ ಹತ್ತಾರು ನಾಟಕಗಳನ್ನು ಯಶಸ್ವಿಯಾಗಿ ರಂಗಕ್ಕೆ ತಂದಿದ್ದಾರೆ. ವಿಜಯನಗರ ಪತನ, ಚಾಣಕ್ಯ ಚಂದ್ರಗುಪ್ತ, ಕುರುಕ್ಷೇತ್ರ, ರಾಜ ವೀರ ಮದಕರಿ ನಾಯಕ, ಕಲ್ಯಾಣ ಕ್ರಾಂತಿ, ರಕ್ತರಾತ್ರಿ, ಶಿವಯೋಗಿ ಸಿದ್ದರಾಮೇಶ್ವರ ಹಾಗೂ ಕೆಎಸ್ಆರ್ಪಿ ಕಲಾಬಳಗಕ್ಕಾಗಿ ನಿರ್ದೇಶಿಸಿದ ‘ಸಹೋದರ ಅರ್ಥಾತ್ ದೀಪಾವಳಿ’ ಮುಂತಾದ ನಾಟಕಗಳು ಜನಮೆಚ್ಚುಗೆ ಪಡೆದಿವೆ. 1986ರಲ್ಲಿ ಹರಿಯಬ್ಬೆಯಲ್ಲಿ ಶಾಂತಲಾ ಕಲಾ ಸಂಘವನ್ನು ಕಟ್ಟಿ ಗ್ರಾಮೀಣ ಭಾಗದಲ್ಲಿ ಬಯಲು ರಂಗಮಂದಿರ ನಿರ್ಮಾಣವಾಗಲು ಶ್ರಮಿಸಿದ ಇವರು, ನೂರಾರು ಗ್ರಾಮೀಣ ಯುವಕರಿಗೆ ನಟನೆ, ರಂಗ ತರಬೇತಿ ನೀಡಿ ಪ್ರೋತ್ಸಾಹಿಸಿದ್ದಾರೆ. ಕಲೆಯ ಜೊತೆಗೆ ಆರೋಗ್ಯ ಇಲಾಖೆ ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯಡಿ ಗ್ರಾಮೀಣ ಜನಜಾಗೃತಿ ಗೀತೆಗಳು, ಹರಿಕಥೆ ಹಾಗೂ ಭಕ್ತಿಗೀತೆಗಳ ಮೂಲಕ ಸಮಾಜಮುಖಿ ಕಾರ್ಯಗಳಲ್ಲಿ ನಿರಂತರವಾಗಿ ತೊಡಗಿಸಿಕೊಂಡಿದ್ದಾರೆ.
ಅರಸಿ ಬಂದ ಪ್ರಶಸ್ತಿ, ಸನ್ಮಾನಗಳ ಮಹಾಪೂರ :
ಜಿ.ಡಿ. ತಿಮ್ಮಯ್ಯ ಅವರ ಕಲಾ ಸೇವೆಗೆ ಹಲವಾರು ಗೌರವಗಳು ಸಂದಿವೆ. 1996ರಲ್ಲಿ ವೃತ್ತಿ ರಂಗಭೂಮಿ ಕಲಾವಿದರ ಸಮ್ಮೇಳನದಲ್ಲಿ ವರನಟ ಡಾ. ರಾಜ್ಕುಮಾರ್ ಅವರಿಂದ ಸವಿ ನೆನಪಿನ ಪತ್ರ ಪಡೆದಿದ್ದ ಇವರಿಗೆ, 2006ರಲ್ಲಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಹಾಗೂ 2015ರಲ್ಲಿ ಪ್ರತಿಷ್ಠಿತ ಕರ್ನಾಟಕ ನಾಟಕ ಅಕಾಡಮಿ ಪ್ರಶಸ್ತಿ ಲಭಿಸಿದೆ. ಆಕಾಶವಾಣಿ, ದೂರದರ್ಶನಗಳಲ್ಲಿ ಕಾರ್ಯಕ್ರಮ ನೀಡಿದ ಹಿರಿಮೆ ಹೊಂದಿರುವ ಇವರು ಜಿಲ್ಲಾ ನಾಟಕ ಕಲಾವಿದರ ಒಕ್ಕೂಟದ ಗೌರವಾಧ್ಯಕ್ಷರಾಗಿಯೂ ಸೇವೆ ಸಲ್ಲಿಸಿದ್ದಾರೆ. ಇದೀಗ 2026ರ ಸಾಲಿನ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ದೊರೆತಿರುವುದು ಅವರ ಜೀವಮಾನದ ರಂಗ ತಪಸ್ಸಿಗೆ ಸಂದ ನ್ಯಾಯಯುತ ಮನ್ನಣೆಯಾಗಿದೆ.
ಮಾಧ್ಯಮ ಲೋಕದ ದಿಟ್ಟ ದನಿ ಡಿ. ಉಮಾಪತಿ :
ಚಿತ್ರದುರ್ಗ ಜಿಲ್ಲೆಯ ಹೆಮ್ಮೆಯ ಪತ್ರಕರ್ತರಾದ ಡಿ. ಉಮಾಪತಿ ಅವರು ಮಾಧ್ಯಮ ಕ್ಷೇತ್ರದ ಸಾಧನೆಗಾಗಿ 2026ನೇ ಸಾಲಿನ ರಾಜ್ಯೋತ್ಸವ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. 1959ರ ಮಾರ್ಚ್ 18ರಂದು ಜನಿಸಿದ ಉಮಾಪತಿ ಅವರು ಮೈಸೂರು ಮಹಾರಾಜ ಕಾಲೇಜಿನಲ್ಲಿ ಆಂಗ್ಲ ಸಾಹಿತ್ಯ ಹಾಗೂ ಪತ್ರಿಕೋದ್ಯಮದಲ್ಲಿ ಬಿ.ಎ ಪದವಿ ಮುಗಿಸಿ, ಬಳಿಕ ಮೈಸೂರು ವಿಶ್ವವಿದ್ಯಾಲಯದಿಂದ ಪತ್ರಿಕೋದ್ಯಮ ವಿಷಯದಲ್ಲಿ ಸ್ನಾತಕೋತ್ತರ ಪದವಿ ಪಡೆದರು. ನಾಲ್ಕು ದಶಕಗಳಿಗೂ ಹೆಚ್ಚು ಕಾಲ ಕನ್ನಡ ಪತ್ರಿಕೋದ್ಯಮದಲ್ಲಿ ಸಕ್ರಿಯವಾಗಿರುವ ಇವರು, ವಿಶೇಷವಾಗಿ ದೆಹಲಿ ಮಟ್ಟದಲ್ಲಿ ರಾಷ್ಟ್ರೀಯ ರಾಜಕಾರಣ, ಸಾಮಾಜಿಕ-ಆರ್ಥಿಕ ವಿದ್ಯಮಾನಗಳು ಹಾಗೂ ಸಂಸದೀಯ ವ್ಯವಹಾರಗಳನ್ನು ಆಳವಾಗಿ ವಿಶ್ಲೇಷಿಸಿ ನಾಡಿನ ಓದುಗರಿಗೆ ತಲುಪಿಸಿದ ಮುಂಚೂಣಿ ಪತ್ರಕರ್ತರಲ್ಲಿ ಪ್ರಮುಖರು.
ಸಾಮಾಜಿಕ ಬದ್ಧತೆಯ ಬರಹಗಾರನಿಗೆ ಸಂದ ಶ್ರೇಷ್ಠ ಗೌರವ :
ಯಾವಾಗಲೂ ಜನಪರ, ಶೋಷಿತರ ಪರ ಮತ್ತು ಸಾಂವಿಧಾನಿಕ ಮೌಲ್ಯಗಳ ಪರವಾಗಿ ನಿಲ್ಲುವ ಡಿ. ಉಮಾಪತಿ ಅವರ ವಿಶ್ಲೇಷಣಾತ್ಮಕ ಬರವಣಿಗೆ ಮಾಧ್ಯಮ ವಲಯದಲ್ಲಿ ಅತ್ಯಂತ ಗೌರವಯುತ ಸ್ಥಾನ ಪಡೆದಿದೆ. ಇವರ ಮೌಲ್ಯಾಧಾರಿತ ಪತ್ರಿಕೋದ್ಯಮ ಸೇವೆಯನ್ನು ಗುರುತಿಸಿ ಈಗಾಗಲೇ ವಡ್ಡರ್ಸೆ ರಘುರಾಮ ಶೆಟ್ಟಿ ಸಾಮಾಜಿಕ ನ್ಯಾಯ ಪತ್ರಿಕೋದ್ಯಮ ಪ್ರಶಸ್ತಿ (2024) ಹಾಗೂ ಡಾ. ಬಿ.ಆರ್. ಅಂಬೇಡ್ಕರ್ ದತ್ತಿ ನಿಧಿ ಪ್ರಶಸ್ತಿಗಳು ಸಂದಿವೆ. ಇದೀಗ ಮುಡಿಗೇರಿರುವ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿಯು ಅವರ ದಿಟ್ಟ, ರಾಜಿರಹಿತ ಹಾಗೂ ಜನಪರ ಪತ್ರಿಕಾ ಧರ್ಮಕ್ಕೆ ಸಂದ ಅತ್ಯುನ್ನತ ಪುರಸ್ಕಾರವಾಗಿದೆ.
ಗ್ರಾಮೀಣ ಸೊಗಡಿನ ರಂಗಭೂಮಿಯನ್ನು ಉಸಿರಾಗಿಸಿಕೊಂಡ ಜಿ.ಡಿ. ತಿಮ್ಮಯ್ಯ ಹಾಗೂ ರಾಷ್ಟ್ರಮಟ್ಟದಲ್ಲಿ ಕನ್ನಡ ಪತ್ರಿಕೋದ್ಯಮದ ಕೀರ್ತಿ ಪತಾಕೆ ಹಾರಿಸಿದ ಡಿ. ಉಮಾಪತಿ ಅವರಿಗೆ ಏಕಕಾಲದಲ್ಲಿ ರಾಜ್ಯ ಪ್ರಶಸ್ತಿ ಸಂದಿರುವುದು ಕೋಟೆನಾಡಿನ ಜನತೆಗೆ ಹೆಮ್ಮೆಯ ಸಂಗತಿಯಾಗಿದೆ.
ಪ್ರಶಸ್ತಿಯ ವಿಶೇಷತೆ :
ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿಯು ರಾಜ್ಯದ ಪ್ರತಿಷ್ಠಿತ ನಾಗರಿಕ ಗೌರವಗಳಲ್ಲಿ ಒಂದಾಗಿದೆ. ಪ್ರಶಸ್ತಿ ಪುರಸ್ಕೃತರಿಗೆ 22 ಕ್ಯಾರೆಟ್ನ 25 ಗ್ರಾಂ ಚಿನ್ನದ ಪದಕ ಹಾಗೂ ಐದು ಲಕ್ಷ ರೂಪಾಯಿ ನಗದು ಬಹುಮಾನ ನೀಡಲಾಗುತ್ತದೆ. 2026ನೇ ಸಾಲಿನಲ್ಲಿ ಒಟ್ಟು 71 ಸಾಧಕರನ್ನು ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿದೆ. ನವೆಂಬರ್ 1ರಂದು ನಡೆಯುವ ಕರ್ನಾಟಕ ರಾಜ್ಯೋತ್ಸವ ಸಂಭ್ರಮದ ಸಂದರ್ಭದಲ್ಲಿ ಪ್ರಶಸ್ತಿ ಪ್ರದಾನ ನಡೆಯಲಿದೆ.
