ಕೇರಳದ ಸಂಸ್ಕೃತಿ, ಪರಂಪರೆ ಮತ್ತು ಸಾಮೂಹಿಕ ಸೌಹಾರ್ದತೆಯ ಪ್ರತೀಕವಾಗಿರುವ ಓಣಂ ಹಬ್ಬ ಇಂದು ಸಂಭ್ರಮದಿಂದ ಆಚರಿಸಲಾಗುತ್ತಿದೆ. ಜಾತಿ, ಧರ್ಮದ ಭೇದವಿಲ್ಲದೆ ಎಲ್ಲರೂ ಒಟ್ಟಾಗಿ ಆಚರಿಸುವ ಈ ಹಬ್ಬವನ್ನು ಕೇರಳದ ಪ್ರಮುಖ ನಾಡಹಬ್ಬವೆಂದು ಕರೆಯಲಾಗುತ್ತದೆ.ಓಣಂ ಎಂದರೆ ಕೇವಲ ಹಬ್ಬವಲ್ಲ. ಅದು ಸಮೃದ್ಧಿ, ಸಂತೋಷ, ಕುಟುಂಬದ ಒಗ್ಗಟ್ಟು, ಸ್ನೇಹ ಮತ್ತು ಮಾನವೀಯತೆಯ ಸಂಭ್ರಮ. ಮನೆಮನೆಗಳಲ್ಲಿ ಹಬ್ಬದ ವಾತಾವರಣ ನಿರ್ಮಾಣವಾಗಿದ್ದು, ಸಾಂಪ್ರದಾಯಿಕ ಆಚರಣೆಗಳ ಮೂಲಕ ಓಣಂನ ಸಂಭ್ರಮ ಕಳೆಗಟ್ಟಿದೆ.
ಓಣಂ ಹಬ್ಬದ ಹಿಂದೆ ಮಹಾಬಲಿ ಚಕ್ರವರ್ತಿಯ ಪೌರಾಣಿಕ ಕಥೆಯಿದೆ. ಮಹಾಬಲಿ ಪ್ರಜಾಪಾಲನೆಯಲ್ಲಿ ನ್ಯಾಯ, ಸಮಾನತೆ ಮತ್ತು ದಾನಶೀಲತೆಗೆ ಹೆಸರುವಾಸಿಯಾಗಿದ್ದ ರಾಜನೆಂದು ನಂಬಲಾಗಿದೆ.
ಅವರ ಆಡಳಿತದಲ್ಲಿ ಎಲ್ಲರೂ ಸಮಾನವಾಗಿ, ಸಂತೋಷದಿಂದ ಬದುಕುತ್ತಿದ್ದರು ಎಂಬುದು ಪುರಾಣದ ನಂಬಿಕೆ. ಮಹಾಬಲಿಯ ಜನಪ್ರಿಯತೆ ಹಾಗೂ ಅವರ ರಾಜ್ಯದ ಸಮೃದ್ಧಿಯಿಂದ ದೇವತೆಗಳು ಆತಂಕಗೊಂಡರು ಎನ್ನಲಾಗುತ್ತದೆ.ಈ ಸಂದರ್ಭದಲ್ಲಿ ವಿಷ್ಣುವು ವಾಮನ ಅವತಾರದಲ್ಲಿ ಮಹಾಬಲಿಯ ಬಳಿಗೆ ಬಂದು ಮೂರು ಹೆಜ್ಜೆ ಭೂಮಿಯನ್ನು ಕೇಳಿದನು. ವಾಮನನ ಬೇಡಿಕೆಯನ್ನು ಮಹಾಬಲಿ ಒಪ್ಪಿಕೊಂಡ ನಂತರ, ವಾಮನನು ವಿಶ್ವರೂಪ ತಾಳಿ ಎರಡು ಹೆಜ್ಜೆಗಳಲ್ಲಿ ಭೂಮ್ಯಾಕಾಶವನ್ನು ಅಳೆಯುತ್ತಾನೆ. ಮೂರನೇ ಹೆಜ್ಜೆ ಇಡಲು ತನ್ನ ತಲೆಯನ್ನೇ ಮಹಾಬಲಿ ಅರ್ಪಿಸುತ್ತಾನೆ.
ಮಹಾಬಲಿಯ ಭಕ್ತಿ ಮತ್ತು ಪ್ರಜಾಪ್ರೀತಿಯಿಂದ ಸಂತುಷ್ಟನಾದ ವಿಷ್ಣು, ವರ್ಷಕ್ಕೊಮ್ಮೆ ತನ್ನ ಪ್ರಜೆಗಳನ್ನು ಭೇಟಿ ಮಾಡಲು ಮಹಾಬಲಿಗೆ ಅವಕಾಶ ನೀಡಿದನು ಎಂಬ ನಂಬಿಕೆ ಇದೆ. ಮಹಾಬಲಿ ತನ್ನ ಪ್ರಜೆಗಳನ್ನು ಭೇಟಿ ಮಾಡಲು ಬರುವ ದಿನವೇ ಓಣಂ ಎಂದು ಕೇರಳದ ಜನರು ನಂಬುತ್ತಾರೆ.
ಓಣಂ ಹಬ್ಬದ ಪ್ರಮುಖ ಆಕರ್ಷಣೆಗಳಲ್ಲಿ ಪೂಕಳಂ ಕೂಡ ಒಂದು. ವಿವಿಧ ಬಣ್ಣಗಳ ಹೂವುಗಳನ್ನು ಬಳಸಿ ಮನೆಗಳ ಮುಂದೆ ಸುಂದರವಾದ ಹೂವಿನ ವಿನ್ಯಾಸಗಳನ್ನು ರಚಿಸಲಾಗುತ್ತದೆ.
ಹಬ್ಬದ ದಿನಗಳು ಮುಂದುವರಿದಂತೆ ಪೂಕಳಂನ ಗಾತ್ರ ಮತ್ತು ವಿನ್ಯಾಸವೂ ವಿಸ್ತಾರಗೊಳ್ಳುತ್ತದೆ. ಕುಟುಂಬದ ಸದಸ್ಯರು, ಮಕ್ಕಳು ಹಾಗೂ ನೆರೆಹೊರೆಯವರು ಒಟ್ಟಾಗಿ ಪೂಕಳಂ ರಚಿಸುವುದು ಹಬ್ಬದ ಸಂಭ್ರಮವನ್ನು ಹೆಚ್ಚಿಸುತ್ತದೆ.
ಓಣಂ ಎಂದಾಕ್ಷಣ ನೆನಪಾಗುವುದು ಓಣಂ ಸದ್ಯ. ಬಾಳೆ ಎಲೆಯ ಮೇಲೆ ವಿವಿಧ ಬಗೆಯ ಸಾಂಪ್ರದಾಯಿಕ ಖಾದ್ಯಗಳನ್ನು ಬಡಿಸುವುದು ಈ ಹಬ್ಬದ ವಿಶೇಷ ಸಂಪ್ರದಾಯ.ಅವಿಯಲ್, ಸಾಂಬಾರ್, ತೋರನ್, ಓಲನ್, ಪಚಡಿ, ಕಿಚಡಿ, ಉಪ್ಪೇರಿ, ಉಪ್ಪಿನಕಾಯಿ, ಪಪ್ಪಡಂ ಸೇರಿದಂತೆ ಹಲವು ಖಾದ್ಯಗಳೊಂದಿಗೆ ಪಾಯಸವನ್ನು ಸವಿಯಲಾಗುತ್ತದೆ.
ಕುಟುಂಬದವರು ಒಂದೇ ಕಡೆ ಕುಳಿತು ಒಟ್ಟಾಗಿ ಊಟ ಮಾಡುವುದು ಸದ್ಯದ ಪ್ರಮುಖ ವಿಶೇಷತೆ.
ಕೇರಳದ ಹಲವು ಭಾಗಗಳಲ್ಲಿ ನಡೆಯುವ ವಲ್ಲಂ ಕಳಿ, ಅಂದರೆ ಸಾಂಪ್ರದಾಯಿಕ ದೋಣಿ ಸ್ಪರ್ಧೆ, ಓಣಂ ಸಂಭ್ರಮಕ್ಕೆ ಮತ್ತಷ್ಟು ಮೆರುಗು ನೀಡುತ್ತದೆ.ಉದ್ದವಾದ ಹಾವು ದೋಣಿಗಳಲ್ಲಿ ನೂರಾರು ಮಂದಿ ಒಂದೇ ಲಯದಲ್ಲಿ ಹುಟ್ಟು ಹಾಕುತ್ತಾ ಸ್ಪರ್ಧಿಸುವ ದೃಶ್ಯ ನೋಡುಗರನ್ನು ಆಕರ್ಷಿಸುತ್ತದೆ. ಸಾಂಪ್ರದಾಯಿಕ ಹಾಡುಗಳು ಮತ್ತು ಜನರ ಉತ್ಸಾಹ ಈ ಸ್ಪರ್ಧೆಯ ವಿಶೇಷತೆ.
ಓಣಂನ ಅತ್ಯಂತ ದೊಡ್ಡ ವಿಶೇಷತೆ ಎಂದರೆ ಸಾಮೂಹಿಕತೆ ಮತ್ತು ಸೌಹಾರ್ದತೆ. ಧರ್ಮ, ಜಾತಿ ಹಾಗೂ ಸಾಮಾಜಿಕ ಭೇದಗಳನ್ನು ಮರೆತು ಜನರು ಒಟ್ಟಾಗಿ ಹಬ್ಬ ಆಚರಿಸುತ್ತಾರೆ.ಕುಟುಂಬದ ಸದಸ್ಯರು ಒಂದೆಡೆ ಸೇರುವುದು, ಸ್ನೇಹಿತರು ಮತ್ತು ಬಂಧುಗಳಿಗೆ ಶುಭಾಶಯ ಕೋರುವುದು, ಸಾಂಪ್ರದಾಯಿಕ ಉಡುಪು ಧರಿಸುವುದು, ಹೂವಿನ ಅಲಂಕಾರ ಮಾಡುವುದು ಮತ್ತು ಸದ್ಯ ಸವಿಯುವುದು ಓಣಂ ಸಂಭ್ರಮದ ಭಾಗವಾಗಿದೆ.
ಓಣಂ ನಮಗೆ ಕೇವಲ ಪೌರಾಣಿಕ ಕಥೆಯನ್ನು ನೆನಪಿಸುವುದಲ್ಲ. ಸಮಾನತೆ, ಪ್ರೀತಿ, ಸೌಹಾರ್ದತೆ ಮತ್ತು ಸಮೃದ್ಧಿಯ ಸಮಾಜದ ಕನಸನ್ನು ಕೂಡ ನೆನಪಿಸುತ್ತದೆ.ಮಹಾಬಲಿ ಚಕ್ರವರ್ತಿಯ ಕಾಲದಲ್ಲಿ ಎಲ್ಲರೂ ಸಂತೋಷದಿಂದ ಬದುಕಿದ್ದರು ಎಂಬ ನಂಬಿಕೆ, ಇಂದಿನ ಸಮಾಜದಲ್ಲೂ ಪರಸ್ಪರ ಗೌರವ ಮತ್ತು ಸಹಬಾಳ್ವೆಯ ಮಹತ್ವವನ್ನು ಸಾರುತ್ತದೆ.
ಹೂವಿನ ಪೂಕಳಂನ ಬಣ್ಣಗಳಂತೆ ನಮ್ಮ ಬದುಕಿನಲ್ಲೂ ಸಂತೋಷ ತುಂಬಲಿ, ಓಣಂ ಎಲ್ಲರ ಮನೆಗೂ ಸಮೃದ್ಧಿ, ಆರೋಗ್ಯ ಮತ್ತು ನೆಮ್ಮದಿ ತರಲಿ.
