ಕಿವಿ ತುರಿಕೆಯಿಂದ ಕಷ್ಟಪಡುತ್ತಿದ್ದೀರಾ? ಈ ಲಕ್ಷಣಗಳನ್ನು ನಿರ್ಲಕ್ಷಿಸಬೇಡಿ: ಇಲ್ಲಿದೆ ಸುಲಭ ಪರಿಹಾರಗಳು!

ಸುದ್ದಿಒನ್:ಅನೇಕ ಬಾರಿ ನಮಗೆ ಕಿವಿ ಒಳಗೆ ವಿಪರೀತ ತುರಿಕೆ ಉಂಟಾಗುತ್ತದೆ. ಕೆಲವರು ಕೈಗೆ ಸಿಕ್ಕ ಕಡ್ಡಿ, ಹೇರ್ ಪಿನ್ ಅಥವಾ ಪೆನ್ ಬಳಸಿ ಕಿವಿಯನ್ನು ಕೆರೆಯುತ್ತಾರೆ. ಆದರೆ ಹೀಗೆ ಮಾಡುವುದು ಕಿವಿ ಪದೆಗೆ ಹಾನಿ ಉಂಟುಮಾಡಬಹುದು. ಕಿವಿ ತುರಿಕೆಗೆ ನಿಖರವಾದ ಕಾರಣಗಳು ಮತ್ತು ಅವುಗಳನ್ನು ಹೋಗಲಾಡಿಸುವ ಮಾರ್ಗಗಳ ಬಗ್ಗೆ ಇಲ್ಲಿದೆ ಮಾಹಿತಿ.

ಕಿವಿ ತುರಿಕೆಗೆ ಪ್ರಮುಖ ಕಾರಣಗಳು:

1. ಕಿವಿಯ ಮೇಣ (Ear Wax): ಕಿವಿಯಲ್ಲಿ ಉತ್ಪತ್ತಿಯಾಗುವ ಮೇಣವು ಕಿವಿಯನ್ನು ಧೂಳು ಮತ್ತು ಬ್ಯಾಕ್ಟೀರಿಯಾದಿಂದ ರಕ್ಷಿಸುತ್ತದೆ. ಆದರೆ ಇದು ಅತಿಯಾಗಿ ಶೇಖರಣೆಯಾದಾಗ ಅಥವಾ ಒಣಗಿದಾಗ ಕಿವಿ ತುರಿಕೆ ಆರಂಭವಾಗುತ್ತದೆ.

2. ಕಿವಿ ಸೋಂಕು (Ear Infections): ಬ್ಯಾಕ್ಟೀರಿಯಾ ಅಥವಾ ವೈರಸ್ ದಾಳಿಯಿಂದ ಕಿವಿಯಲ್ಲಿ ಸೋಂಕು ಉಂಟಾಗಬಹುದು. ವಿಶೇಷವಾಗಿ ಶೀತ ಅಥವಾ ಜ್ವರ ಬಂದಾಗ ಕಿವಿ ತುರಿಕೆ ಮತ್ತು ನೋವು ಕಾಣಿಸಿಕೊಳ್ಳುತ್ತದೆ.

3. ಚರ್ಮದ ಸಮಸ್ಯೆಗಳು: ಸೋರಿಯಾಸಿಸ್ ಅಥವಾ ಎಕ್ಸಿಮಾದಂತಹ ಚರ್ಮದ ಕಾಯಿಲೆಗಳಿದ್ದರೆ ಕಿವಿಯ ಕಾಲುವೆಯಲ್ಲಿ ತುರಿಕೆ ಉಂಟಾಗಬಹುದು.

4. ಅಲರ್ಜಿ: ಆಹಾರ ಪದಾರ್ಥಗಳು, ಸೌಂದರ್ಯವರ್ಧಕಗಳು ಅಥವಾ ಕಿವಿಗೆ ಹಾಕುವ ಇಯರ್ ಫೋನ್ ಹಾಗೂ ಒಡವೆಗಳಿಂದ ಕೆಲವರಿಗೆ ಅಲರ್ಜಿಯಾಗಿ ತುರಿಕೆ ಬರಬಹುದು.

5. ತೇವಾಂಶ (Swimmer’s Ear): ಸ್ನಾನ ಮಾಡುವಾಗ ಅಥವಾ ಈಜುವಾಗ ಕಿವಿಯೊಳಗೆ ನೀರು ಹೋದರೆ, ಅಲ್ಲಿ ತೇವಾಂಶ ಉಳಿದು ಬ್ಯಾಕ್ಟೀರಿಯಾ ಬೆಳೆಯುತ್ತವೆ. ಇದರಿಂದ ಕಿವಿ ತುರಿಕೆ ಉಂಟಾಗುತ್ತದೆ.

ಪರಿಹಾರ ಮಾರ್ಗಗಳು:
ನೀರನ್ನು ಹೊರಹಾಕಿ: ಸ್ನಾನ ಅಥವಾ ಈಜಿನ ನಂತರ ಕಿವಿಯನ್ನು ಮೃದುವಾದ ಬಟ್ಟೆಯಿಂದ ಒರೆಸಿಕೊಳ್ಳಿ. ತಲೆ ಬಾಗಿಸಿ ಕಿವಿಯೊಳಗಿನ ನೀರನ್ನು ಹೊರಹಾಕಿ.

ಎಣ್ಣೆಯ ಬಳಕೆ: ಕಿವಿ ಒಣಗಿ ತುರಿಕೆ ಬರುತ್ತಿದ್ದರೆ, ವೈದ್ಯರ ಸಲಹೆಯಂತೆ ಒಂದೆರಡು ಹನಿ ಬೆಚ್ಚಗಿನ ಆಲಿವ್ ಎಣ್ಣೆ ಅಥವಾ ಬೇಬಿ ಆಯಿಲ್ ಬಳಸಬಹುದು. ಇದು ಮೇಣವನ್ನು ಮೃದುಗೊಳಿಸುತ್ತದೆ.

ಸರಿಯಾದ ಸ್ವಚ್ಛತೆ: ಕಿವಿಯನ್ನು ಸ್ವಚ್ಛಗೊಳಿಸಲು ಕಡ್ಡಿ ಅಥವಾ ಚೂಪಾದ ವಸ್ತುಗಳನ್ನು ಬಳಸಬೇಡಿ. ಬದಲಿಗೆ ಮೃದುವಾದ ಇಯರ್ ಬಡ್ಸ್ ಬಳಸಿ ಅಥವಾ ವೈದ್ಯರ ಬಳಿ ಹೋಗಿ ಕ್ಲೀನ್ ಮಾಡಿಸಿಕೊಳ್ಳಿ.

ಅಲರ್ಜಿ ತಡೆಗಟ್ಟಿ: ನೀವು ಬಳಸುವ ಇಯರ್ ಫೋನ್ ಅಥವಾ ಹೇರ್ ಸ್ಪ್ರೇಗಳಿಂದ ಅಲರ್ಜಿ ಆಗುತ್ತಿದ್ದರೆ ಅವುಗಳ ಬಳಕೆಯನ್ನು ಕಡಿಮೆ ಮಾಡಿ.

ಗಮನಿಸಿ: ಒಂದು ವೇಳೆ ಕಿವಿ ತುರಿಕೆಯ ಜೊತೆಗೆ ರಕ್ತ ಅಥವಾ ಕೀವು ಬರುವುದು, ಕೇಳುವ ಶಕ್ತಿ ಕಡಿಮೆಯಾಗುವುದು ಅಥವಾ ಅತಿಯಾದ ನೋವು ಇದ್ದರೆ ಕೂಡಲೇ ಇಎನ್‌ಟಿ (ENT) ವೈದ್ಯರನ್ನು ಸಂಪರ್ಕಿಸುವುದು ಉತ್ತಮ.