ಪ್ರಯಾಗ್ ರಾಜ್ ನಲ್ಲಿ ಕಾಲ್ತುಳಿತ : ಚಿತ್ರದುರ್ಗದ ನಾಗಸಾಧು ಸಾವು..!

ಪ್ರಯಾಗ್ ರಾಜ್: ಎಷ್ಟೋ ದಶಕಗಳಿಗೊಮ್ಮೆ ಬರುವ ಮಹಾಕುಂಭಮೇಳದಲ್ಲಿ ಭಾಗವಹಿಸಬೇಕೆಂದು ದೇಶದ ಎಲ್ಲರ ಆಸೆ. ತ್ರಿವೇಣಿ ಸಂಗಮದಲ್ಲಿ ಮಿಂದೆದ್ದು ಬರಬೇಕೆಂದು ಕೋಟ್ಯಾಂತರ ಜನ ಪ್ರಯಾಗ್ ರಾಜ್ ಗೆ ಭೇಟಿ ನೀಡುತ್ತಿದ್ದಾರೆ. ಅದರಲ್ಲೂ ಸಾಧು ಸಂತರಿಗೆ ಇದು ವಿಶೇಷವಾದಂತದ್ದಾಗಿದೆ. ದೇಶದ ಮೂಲೆ ಮೂಲೆಯಿಂದಾನೂ ನಾಗಸಾಧುಗಳು ಪ್ರಯಾಗ್ ರಾಜ್ ಗೆ ಬರುತ್ತಾರೆ. ಅದರಂತೆ ನಾಗಸಾಧುಗಳು ಸಿಗುತ್ತಾರೆಂದು ಚಿತ್ರದುರ್ಗದ ನಾಗಸಾಧು ರಾಜನಾಥ್ ಮಹರಾಜರು ಹೋಗಿದ್ದರು. ಆದರೆ ಕಾಲ್ತುಳಿತದಿಂದ ಸಾವನ್ನಪ್ಪಿದ್ದಾರೆ.

ಚಿತ್ರದುರ್ಗದ ಬಂಜಾರ ಗುರು ಪೀಠದಲ್ಲಿ ಕಳೆದ ಏಳೆಂಟು ವರ್ಷಗಳಿಂದ ನೆಲೆಸಿದ್ದರು. ಜೊತೆಗೆ ಬಂಜಾರ ಗುರುಪೀಠದ ಪೀಠಾಧಿಪತಿ ಸರ್ದಾರ್ ಸೇವಲಾಲ್ ಅವರ ಆಪ್ತರಾಗಿದ್ದರು. ರಾಜನಾಥ್ ಅವರ ನಿಧನದ ಸುದ್ದಿ ಕೇಳಿ, ಪೀಠದಲ್ಲಿ ನೀರವ ಮೌನ ಆವರಿಸಿದೆ. ಸೇವಲಾಲ್ ಶ್ರೀಗಳು ಕಂಬನಿ ಮಿಡಿದಿದ್ದಾರೆ. ಸಾಧುಗಳ ನಿಧನದ ಬಗ್ಗೆ ಮಾತನಾಡಿ, ಪಾರ್ಥಿವ ಶರೀರ ಬರದೆ ಇದ್ದರೆ ಗುರುಪರಂಪರೆಗೆ ಅವಮಾನ ಮಾಡಿದಂತೆ. ಮೃತ ದೇಹವನ್ನು ಗುರುಮಠಕ್ಕೆ ತಲುಪಿಸುವ ಕೆಲಸವನ್ನು ಸರ್ಕಾರ ಮಾಡಬೇಕಿದೆ. ಅವರ ಅಂತ್ಯಕ್ರಿಯೆಯನ್ನು ನಾವೂ ಮಾಡುತ್ತೇವೆ ಎಂದಿದ್ದಾರೆ.

ರಾಜನಾಥರಿಗೆ ಕನ್ನಡ ಬರುತ್ತಿರಲಿಲ್ಲ. ಹಿಂದಿ ಮಾತ್ರ ಮಾತಾಡ್ತಾ ಇದ್ದರು. ಕಳೆದ ಹದಿನೈದು ದಿನಗಳ ಹಿಂದಷ್ಟೇ ಟ್ರೈನ್ ನಲ್ಲಿ ಮಹಾಕುಂಭಮೇಳಕ್ಕೆ ಹೊರಟಿದ್ದರು. ಆದರೆ ಕುಂಭಮೇಳದ ಕಾಲ್ತುಳಿತದಲ್ಲಿ ಸಾವನ್ನಪ್ಪಿರುವುದು ದುಃಖದ ಸಂಗತಿಯಾಗಿದೆ. ಸಾಧುಗಳ ಭಕ್ತರಿಗೂ ಇದು ಅರಗಿಸಿಕೊಳ್ಳಲಾಗಿಲ್ಲ. ಪಾರ್ಥಿವ ಶರೀರವನ್ನಾದರೂ ಮಠಕ್ಕೆ ತಲುಪಿಸುವ ಕೆಲಸವನ್ನ ಸರ್ಕಾರ ಮಾಡಿದರೆ ಅದೇ ಕೊಂಚ ನೆಮ್ಮದಿ ಕೊಡುತ್ತದೆ. ಪಾರ್ಥಿವ ಶರೀರವೂ ಇಲ್ಲದೆ ಇದ್ದರೆ ಆ ನೋವು ಎಲ್ಲರನ್ನು ಕಾಡುತ್ತದೆ. ತ್ರಿವೇಣಿ ಸಂಗಮದಲ್ಲಿ ಮುಳುಗಿ ಬಂದರೆ ಪುಣ್ಯ ಎಂದು ಹೋದ ಕೆಲವರು ತಮ್ಮ ಪ್ರಾಣವನ್ನೇ ಅರ್ಪಿಸಿದ್ದಾರೆ.