ಶರೀರದ ಅತಿಯಾದ ಉಷ್ಣತೆ ಕಮ್ಮಿ ಮಾಡಿ, ಜೀರ್ಣಕ್ರಿಯೆ ಹೆಚ್ಚಿಸುವ ಸ್ಪೆಷಲ್ ಮಸಾಲಾ ಮಜ್ಜಿಗೆ

ಇತ್ತೀಚಿನ ದಿನಗಳಲ್ಲಿ ದೇಹದ ಅತಿಯಾದ ಉಷ್ಣತೆಯು ಹೆಚ್ಚಿನ ಜನರನ್ನು ಕಾಡುತ್ತಿರುವ ಒಂದು ಪ್ರಮುಖ ಸಮಸ್ಯೆಯಾಗಿದೆ. ದೇಹವನ್ನು ತಂಪಾಗಿಸಲು ಮತ್ತು ಜೀರ್ಣಕ್ರಿಯೆಯನ್ನು ಉತ್ತಮಗೊಳಿಸಲು ಮಜ್ಜಿಗೆ ಅತ್ಯುತ್ತಮ ಮನೆಮದ್ದಾಗಿದೆ. ಅದರಲ್ಲೂ ಮಜ್ಜಿಗೆಗೆ ಕೆಲವು ವಿಶೇಷ ಪದಾರ್ಥಗಳನ್ನು ಸೇರಿಸಿ ‘ಮಸಾಲಾ ಮಜ್ಜಿಗೆ’ ತಯಾರಿಸಿ ಕುಡಿದರೆ ದೇಹದ ಉಷ್ಣತೆ ಕ್ಷಣಾರ್ಧದಲ್ಲಿ ಕಡಿಮೆಯಾಗುತ್ತದೆ.

ಹಾಗಾದರೆ ಈ ರುಚಿಕರ ಹಾಗೂ ಆರೋಗ್ಯಕರ ಮಸಾಲಾ ಮಜ್ಜಿಗೆಯನ್ನು ಮನೆಯಲ್ಲೇ ಸುಲಭವಾಗಿ ಮಾಡುವುದು ಹೇಗೆ? ಅದಕ್ಕೆ ಬೇಕಾಗುವ ಪದಾರ್ಥಗಳೇನು ಎಂಬುದನ್ನು ಇಲ್ಲಿ ನೋಡೋಣ.

ಬೇಕಾಗುವ ಪದಾರ್ಥಗಳು ಮತ್ತು ಮಾಡುವ ವಿಧಾನ

ಗಟ್ಟಿ ಮಜ್ಜಿಗೆ: ಮೊದಲು ಚೆನ್ನಾಗಿ ಕಡೆದ ಗಟ್ಟಿಯಾದ ಮಜ್ಜಿಗೆಯನ್ನು ತೆಗೆದುಕೊಳ್ಳಿ.

ಹುರಿದ ಜೀರಿಗೆ ಪುಡಿ: ಮಜ್ಜಿಗೆಗೆ ಸ್ವಲ್ಪ ಹುರಿದ ಜೀರಿಗೆ ಪುಡಿಯನ್ನು ಸೇರಿಸುವುದರಿಂದ ಅದರ ರುಚಿ ದುಪ್ಪಟ್ಟಾಗುತ್ತದೆ.

ಇಂಗು: ಮಜ್ಜಿಗೆಗೆ ಚಿಟಿಕೆ ಇಂಗು ಸೇರಿಸಿದರೆ ಅದು ಮಜ್ಜಿಗೆಗೆ ಅದ್ಭುತವಾದ ಸುಗಂಧವನ್ನು ನೀಡುತ್ತದೆ.

ಕರಿಬೇವು: ಸಣ್ಣದಾಗಿ ಹೆಚ್ಚಿದ ಕರಿಬೇವಿನ ಎಲೆಗಳನ್ನು ಸೇರಿಸುವುದರಿಂದ ಮಜ್ಜಿಗೆ ಕುಡಿಯಲು ಮತ್ತಷ್ಟು ರುಚಿಯಾಗಿರುತ್ತದೆ.

ಕೊತ್ತಂಬರಿ ಸೊಪ್ಪು: ಮಜ್ಜಿಗೆಗೆ ಸ್ವಲ್ಪ ಕೊತ್ತಂಬರಿ ಸೊಪ್ಪಿನ ತುರಿಯನ್ನು ಸೇರಿಸಿ, ತಣ್ಣಗಾಗಿಸಿ ಕುಡಿಯಬಹುದು.

ಶುಂಠಿ ಮತ್ತು ಹಸಿಮೆಣಸಿನಕಾಯಿ: ಸ್ವಲ್ಪ ಜಜ್ಜಿದ ಶುಂಠಿ ಮತ್ತು ನಾಲ್ಕೈದು ಹಸಿಮೆಣಸಿನಕಾಯಿ ತುಂಡುಗಳನ್ನು ಸೇರಿಸುವುದರಿಂದ ಮಜ್ಜಿಗೆಗೆ ಉತ್ತಮ ಫ್ಲೇವರ್ ಹಾಗೂ ಖಾರವಾದ ರುಚಿ ಸಿಗುತ್ತದೆ.

ಕೊನೆಯದಾಗಿ ಎಲ್ಲವನ್ನು ಚೆನ್ನಾಗಿ ಬೆರೆಸಿ ಕುಡಿಯಿರಿ. ಇದು ದೇಹಕ್ಕೆ ತಂಪು ನೀಡುವುದರ ಜೊತೆಗೆ ಜೀರ್ಣಶಕ್ತಿಯನ್ನು ವೃದ್ಧಿಸಲು ರಾಮಬಾಣದಂತೆ ಕೆಲಸ ಮಾಡುತ್ತದೆ.