ದೆಹಲಿ.ಆಗಸ್ಟ್.24: 4 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗೆ ನೀಡಲಾಗುವ ಕೆಲವು ಶೀತ-ನೆಗಡಿ ಔಷಧಿಗಳ ಬಳಕೆಗೆ ಕೇಂದ್ರ ಸರ್ಕಾರ ಮಹತ್ವದ ನಿರ್ಬಂಧ ವಿಧಿಸಿದೆ. ಕ್ಲೋರ್ಫೆನಿರಮೈನ್ ಮ್ಯಾಲಿಯೇಟ್ (Chlorpheniramine Maleate) ಮತ್ತು ಫೆನೈಲೆಫ್ರಿನ್ ಹೈಡ್ರೋಕ್ಲೋರೈಡ್ (Phenylephrine Hydrochloride) ಒಳಗೊಂಡಿರುವ ಎಲ್ಲಾ ಫಿಕ್ಸ್ಡ್-ಡೋಸ್ ಕಾಂಬಿನೇಷನ್ (FDC) ಔಷಧಿಗಳ ತಯಾರಿಕೆ, ಮಾರಾಟ ಮತ್ತು ವಿತರಣೆಯನ್ನು 4 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗೆ ನಿರ್ಬಂಧಿಸಲಾಗಿದೆ.
ಚಿಕ್ಕ ಮಕ್ಕಳಿಗೆ ಇಂತಹ ಔಷಧಿಗಳನ್ನು ನೀಡುವಾಗ ಪೋಷಕರು ಹೆಚ್ಚಿನ ಎಚ್ಚರಿಕೆ ವಹಿಸಬೇಕು ಎಂದು ಕೇಂದ್ರ ಸರ್ಕಾರ ಸೂಚಿಸಿದೆ. ಔಷಧ ತಯಾರಿಕಾ ಕಂಪನಿಗಳು ಔಷಧದ ಲೇಬಲ್, ಪ್ಯಾಕೇಜ್ ಇನ್ಸರ್ಟ್ ಹಾಗೂ ಜಾಹೀರಾತುಗಳಲ್ಲಿ “4 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಲ್ಲಿ ಈ ಸಂಯೋಜಿತ ಔಷಧಿಯನ್ನು ಬಳಸಬಾರದು” ಎಂಬ ಎಚ್ಚರಿಕೆ ಸಂದೇಶವನ್ನು ಕಡ್ಡಾಯವಾಗಿ ಮುದ್ರಿಸುವಂತೆ ಸೂಚಿಸಲಾಗಿದೆ.
ಮಕ್ಕಳಲ್ಲಿ ಅಡ್ಡಪರಿಣಾಮಗಳ ಅಪಾಯ
ವೈದ್ಯರ ಪ್ರಕಾರ, ಚಿಕ್ಕ ಮಕ್ಕಳಿಗೆ ಇಂತಹ ಔಷಧಿಗಳನ್ನು ನೀಡುವುದರಿಂದ ಅತಿಯಾದ ನಿದ್ರೆ, ಹೃದಯ ಬಡಿತ ವೇಗವಾಗುವುದು ಸೇರಿದಂತೆ ವಿವಿಧ ಅಡ್ಡಪರಿಣಾಮಗಳು ಉಂಟಾಗುವ ಸಾಧ್ಯತೆಯಿದೆ. ಕೆಲವೊಮ್ಮೆ ಗಂಭೀರ ಆರೋಗ್ಯ ಸಮಸ್ಯೆಗಳಿಗೂ ಕಾರಣವಾಗಬಹುದು ಎಂದು ಎಚ್ಚರಿಸಲಾಗಿದೆ.
ನೆಗಡಿಗೆ ಸುರಕ್ಷಿತ ಕ್ರಮ ಯಾವುದು?
ಮಕ್ಕಳಿಗೆ ಶೀತ ಅಥವಾ ಮೂಗು ಕಟ್ಟಿಕೊಳ್ಳುವಂತಹ ಸಮಸ್ಯೆಗಳು ಕಂಡುಬಂದರೆ, ವೈದ್ಯರ ಸಲಹೆಯಂತೆ ಸಲೈನ್ ನಾಸಲ್ ಡ್ರಾಪ್ಸ್ ಬಳಸುವಂತಹ ಸುರಕ್ಷಿತ ಕ್ರಮಗಳನ್ನು ಪರಿಗಣಿಸಬಹುದು. ಒಂದು ವರ್ಷಕ್ಕಿಂತ ಮೇಲ್ಪಟ್ಟ ಮಕ್ಕಳಿಗೆ ವೈದ್ಯರ ಸಲಹೆಯ ಮೇರೆಗೆ ಜೇನುತುಪ್ಪ ನೀಡಬಹುದು.
ಮಕ್ಕಳಿಗೆ ಯಾವುದೇ ಶೀತ-ನೆಗಡಿ ಔಷಧಿಯನ್ನು ಸ್ವಯಂಪ್ರೇರಿತವಾಗಿ ನೀಡದೆ, ಅಗತ್ಯವಿದ್ದರೆ ವೈದ್ಯರ ಸಲಹೆ ಪಡೆಯುವುದು ಅತ್ಯಂತ ಮುಖ್ಯ.
