ನವದೆಹಲಿ : ದೇಶದ ಅತಿ ದೊಡ್ಡ ಸಾರ್ವಜನಿಕ ವಲಯದ ಬ್ಯಾಂಕ್ ಆದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI), ಸೈಬರ್ ವಂಚಕರ ಹೊಸ ಜಾಲದ ಬಗ್ಗೆ ತನ್ನ ಗ್ರಾಹಕರಿಗೆ ಹಾಗೂ ಸಾರ್ವಜನಿಕರಿಗೆ ಮಹತ್ವದ ಎಚ್ಚರಿಕೆ ಸಂದೇಶ ರವಾನಿಸಿದೆ. ಇತ್ತೀಚಿನ ದಿನಗಳಲ್ಲಿ ಹೆಚ್ಚುತ್ತಿರುವ ‘ಜಂಪ್ಡ್ ಡೆಪಾಸಿಟ್’ (Jumped Deposit) ಎಂಬ ನೂತನ ವಂಚನೆಯ ತಂತ್ರದ ಮೂಲಕ ಜನರ ಬ್ಯಾಂಕ್ ಖಾತೆಗಳಿಗೆ ಕನ್ನ ಹಾಕಲಾಗುತ್ತಿದ್ದು, ಈ ಕುರಿತು ಎಲ್ಲರೂ ಜಾಗರೂಕರಾಗಿರುವಂತೆ ಬ್ಯಾಂಕ್ ಮನವಿ ಮಾಡಿದೆ. ರಾಷ್ಟ್ರೀಯ ಸೈಬರ್ ಭದ್ರತಾ ಮಾಸಾಚರಣೆಯ ‘ಸ್ಪೆಷಲ್ ಕ್ಯಾಂಪೇನ್ 6.0’ ಭಾಗವಾಗಿ ಎಸ್‌ಬಿಐ ಈ ಮಾಹಿತಿಯನ್ನು ಹಂಚಿಕೊಂಡಿದೆ.
ಈ ಜಂಪ್ಡ್ ಡೆಪಾಸಿಟ್ ವಂಚನೆಯು ಅತ್ಯಂತ ವ್ಯವಸ್ಥಿತವಾಗಿ ನಡೆಯುತ್ತದೆ. ವಂಚಕರು ಮೊದಲು ಅಪರಿಚಿತ ವ್ಯಕ್ತಿಯ ಖಾತೆಗೆ ಸಣ್ಣ ಮೊತ್ತದ ಹಣವನ್ನು ಉದ್ದೇಶಪೂರ್ವಕವಾಗಿ ವರ್ಗಾಯಿಸುತ್ತಾರೆ. ನಂತರ ಖಾತೆದಾರರಿಗೆ ಕರೆ ಮಾಡಿ, “ತಪ್ಪಾಗಿ ನಿಮ್ಮ ಖಾತೆಗೆ ಹಣ ಬಂದಿದೆ, ದಯವಿಟ್ಟು ಅದನ್ನು ಮರಳಿ ಕಳುಹಿಸಿ” ಎಂದು ಮನವಿ ಮಾಡುತ್ತಾರೆ. ತಮ್ಮ ಮಾತನ್ನು ನಂಬಿಸಲು ತುರ್ತು ಪರಿಸ್ಥಿತಿಯ ನಾಟಕವಾಡುವುದು ಮತ್ತು ಭಾವನಾತ್ಮಕವಾಗಿ ಒತ್ತಡ ಹೇರುವುದು ಈ ಸೈಬರ್ ಖದೀಮರ ಮುಖ್ಯ ತಂತ್ರವಾಗಿರುತ್ತದೆ.
National Cyber Security Month
ಇದನ್ನು ಓದಿBREAKING : ವಿಮಾನದಲ್ಲಿ ಹೊತ್ತಿ ಉರಿದ ಪವರ್ ಬ್ಯಾಂಕ್: ಹೈದರಾಬಾದ್‌ನಲ್ಲಿ ಇಂಡಿಗೋ ವಿಮಾನ ತುರ್ತು ಲ್ಯಾಂಡಿಂಗ್Special Campaign 6.0
🚨 Unexpected credit in your account? It’s a Trap!
Beware of Jumped Deposit Scam!
In a Jumped Deposit Scam, scammers claim to have "accidentally" credited a small amount to your account to win your trust. When you try to… pic.twitter.com/ORVwe8bwG4
— State Bank of India (@TheOfficialSBI) October 10, 2026
ಹಣ ವಾಪಸ್ ಮಾಡುವ ಭರದಲ್ಲಿ ಖಾತೆಗೆ ಬೀಳುತ್ತೆ ಕನ್ನ
ಗ್ರಾಹಕರು ಗಾಬರಿಯಲ್ಲೋ ಅಥವಾ ಮಾನವೀಯತೆಯ ದೃಷ್ಟಿಯಿಂದಲೋ ಆ ಹಣವನ್ನು ವಾಪಸ್ ಕಳುಹಿಸಲು ಮುಂದಾದಾಗ ಅಸಲಿ ಜಾಲ ಆರಂಭವಾಗುತ್ತದೆ. ವಂಚಕರು ಹಣ ಸ್ವೀಕರಿಸುವ ನೆಪದಲ್ಲಿ ಗ್ರಾಹಕರಿಗೆ ದೊಡ್ಡ ಮೊತ್ತದ ಯುಪಿಐ ‘ಕಲೆಕ್ಟ್ ರಿಕ್ವೆಸ್ಟ್’ ಅಥವಾ ಪಾವತಿ ವಿನಂತಿಯನ್ನು ಕಳುಹಿಸುತ್ತಾರೆ. ಕರೆಯಲ್ಲಿದ್ದ ವ್ಯಕ್ತಿಯ ಒತ್ತಡಕ್ಕೆ ಮಣಿದು, ಸಂದೇಶವನ್ನು ಸರಿಯಾಗಿ ಪರಿಶೀಲಿಸದೆ ಯುಪಿಐ ಪಿನ್ ನಮೂದಿಸಿದರೆ ಸಾಕು, ಗ್ರಾಹಕರ ಖಾತೆಯಿಂದ ಕ್ಷಣಾರ್ಧದಲ್ಲಿ ಭಾರಿ ಪ್ರಮಾಣದ ಹಣ ವಂಚಕರ ಪಾಲಾಗುತ್ತದೆ.
ಗ್ರಾಹಕರು ವಹಿಸಬೇಕಾದ ಮುನ್ನೆಚ್ಚರಿಕೆ ಕ್ರಮಗಳು
ಅಪರಿಚಿತರಿಂದ ಖಾತೆಗೆ ಹಠಾತ್ತಾಗಿ ಹಣ ಜಮೆಯಾದ ತಕ್ಷಣ ಯಾವುದೇ ಕಾರಣಕ್ಕೂ ನೇರವಾಗಿ ಮರುಪಾವತಿಗೆ ಮುಂದಾಗಬಾರದು ಎಂದು ಎಸ್‌ಬಿಐ ಸ್ಪಷ್ಟಪಡಿಸಿದೆ. ಇಂತಹ ಸಂದರ್ಭಗಳಲ್ಲಿ ಮೊದಲು ಬ್ಯಾಂಕಿನ ಅಧಿಕೃತ ಮೂಲಗಳ ಮೂಲಕ ವಹಿವಾಟನ್ನು ಖಚಿತಪಡಿಸಿಕೊಳ್ಳಬೇಕು. ಯಾವುದೇ ಅನುಮಾನಾಸ್ಪದ ಕರೆಗಳು ಬಂದರೆ ತಕ್ಷಣವೇ ಆ ಸಂಖ್ಯೆಯನ್ನು ಬ್ಲಾಕ್ ಮಾಡಿ, ಬ್ಯಾಂಕ್‌ಗೆ ಅಥವಾ ಸೈಬರ್ ಪೊಲೀಸರಿಗೆ ಮಾಹಿತಿ ನೀಡಬೇಕು. ಅಲ್ಲದೆ ಬ್ಯಾಂಕ್‌ಗಳಿಂದ ಅಧಿಕೃತವಾಗಿ ಬರುವ ಕರೆಗಳ ಮುಂದೆ ‘1600’ ಸಂಖ್ಯೆಯ ಪೂರ್ವಪ್ರತ್ಯಯ ಇರಲಿದ್ದು, ಅಂತಹ ಅಧಿಕೃತ ಕರೆಗಳಿಗೆ ಮಾತ್ರ ಸ್ಪಂದಿಸುವಂತೆ ಹಾಗೂ ಅಪರಿಚಿತ ಯುಪಿಐ ವಿನಂತಿಗಳಿಗೆ ಒಪ್ಪಿಗೆ ನೀಡದಂತೆ ಬ್ಯಾಂಕ್ ಸೂಚಿಸಿದೆ.
