ಸತತ 4ನೇ ಬಾರಿ ರೆಪೋ ದರ 5.25% ಯಥಾಸ್ಥಿತಿ : ಸಾಲಗಾರರ ಇಎಂಐ ಇಳಿಯುತ್ತಾ? ಏರುತ್ತಾ? ಇಲ್ಲಿದೆ ಮಾಹಿತಿ

ಮುಂಬೈ: ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಜೂನ್ 5 ರಂದು ನಡೆದ ದ್ರವ್ಯ ನೀತಿ ಪರಾಮರ್ಶೆ ಸಭೆಯಲ್ಲಿ ಪ್ರಮುಖ ‘ರೆಪೋ ದರ’ವನ್ನು (Repo Rate) ಶೇಕಡಾ 5.25 ರಷ್ಟು ಯಥಾಸ್ಥಿತಿಯಲ್ಲಿ ಮುಂದುವರಿಸಿದೆ. ಆರ್‌ಬಿಐ ಗವರ್ನರ್ ಸಂಜಯ್ ಮಲ್ಹೋತ್ರಾ ನೇತೃತ್ವದ ವಿತ್ತೀಯ ನೀತಿ ಸಮಿತಿಯು (MPC) 2026-27ರ ಹಣಕಾಸು ವರ್ಷದ ಎರಡನೇ ದ್ವೈಮಾಸಿಕ ಸಭೆಯನ್ನು ಜೂನ್ 3 ರಿಂದ ಜೂನ್ 5 ರವರೆಗೆ ನಡೆಸಿತು. ಸತತ ಮೂರನೇ ಬಾರಿಗೆ ರೆಪೋ ದರದಲ್ಲಿ ಯಾವುದೇ ಬದಲಾವಣೆ ಮಾಡದಿರಲು ಸಮಿತಿ ನಿರ್ಧರಿಸಿದ್ದು, ಇದು ಸಾಲಗಾರರು ಮತ್ತು ಠೇವಣಿದಾರರಿಗೆ ಸದ್ಯದ ಮಟ್ಟಿಗೆ ಸ್ಥಿರತೆ ತಂದಿದೆ.

ಫೆಬ್ರವರಿ 2025 ರಿಂದ ಆರ್‌ಬಿಐ ಒಟ್ಟು 125 ಬೇಸಿಸ್ ಪಾಯಿಂಟ್‌ಗಳಷ್ಟು ರೆಪೋ ದರವನ್ನು ಕಡಿತಗೊಳಿಸಿದ್ದರೂ, ಡಿಸೆಂಬರ್ 2025 ರ ನಂತರ ನಡೆದ ಮೂರು ಸಭೆಗಳಲ್ಲಿ ಯಾವುದೇ ಬದಲಾವಣೆಗಳನ್ನು ಮಾಡಲಾಗಿಲ್ಲ.

ಇಎಂಐ ಮೇಲೆ ಏನು ಪರಿಣಾಮ?
ರೆಪೋ ದರ ಯಥಾಸ್ಥಿತಿಯಲ್ಲಿ ಇರುವುದರಿಂದ ಈಗಾಗಲೇ ಸಾಲ ಪಡೆದವರ ಮಾಸಿಕ ಇಎಂಐ (EMI) ನಲ್ಲಿ ಯಾವುದೇ ಬದಲಾವಣೆ ಇರುವುದಿಲ್ಲ. ಹಾಗೆಯೇ ಹೊಸದಾಗಿ ಸಾಲ ಪಡೆಯಲು ಇಚ್ಛಿಸುವವರಿಗೂ ಪ್ರಸ್ತುತ ಬಡ್ಡಿ ದರಗಳು ಸ್ಥಿರವಾಗಿರಲಿವೆ. ಸರ್ಕಾರಿ ಮತ್ತು ಖಾಸಗಿ ಬ್ಯಾಂಕುಗಳು ಗೃಹ, ವಾಹನ ಹಾಗೂ ವೈಯಕ್ತಿಕ ಸಾಲಗಳ ಮೇಲಿನ ಪ್ರಸ್ತುತ ಬಡ್ಡಿ ದರಗಳನ್ನೇ ಮುಂದುವರಿಸುವ ಸಾಧ್ಯತೆ ದಟ್ಟವಾಗಿದೆ.

ಇಎಂಐ ಲೆಕ್ಕಾಚಾರ ಹೇಗೆ? (ಉದಾಹರಣೆಗಳು)
ಗೃಹ ಸಾಲ: 30 ವರ್ಷಗಳ ಅವಧಿಗೆ ಶೇ. 8.20 ಬಡ್ಡಿ ದರದಲ್ಲಿ 50 ಲಕ್ಷ ರೂ. ಗೃಹ ಸಾಲ ಪಡೆದಿದ್ದರೆ, ಸದ್ಯ ಅವರ ಮಾಸಿಕ ಇಎಂಐ 37,346 ರೂ. ಇರಲಿದೆ. ರೆಪೋ ದರದಲ್ಲಿ ಬದಲಾವಣೆ ಇಲ್ಲದಿರುವುದರಿಂದ ಇದೇ ಮೊತ್ತ ಮುಂದುವರಿಯುತ್ತದೆ.

ವೈಯಕ್ತಿಕ ಸಾಲ: ಶೇ. 12 ರಷ್ಟು ಬಡ್ಡಿ ದರದಲ್ಲಿ 5 ವರ್ಷಗಳ ಅವಧಿಗೆ 5 ಲಕ್ಷ ರೂ. ವೈಯಕ್ತಿಕ ಸಾಲ ಪಡೆದಿದ್ದರೆ, ಅವರ ಇಎಂಐ 11,122 ರೂ. ಗಳಲ್ಲೇ ಮುಂದುವರಿಯಲಿದೆ.

ಗಮನಾರ್ಹ ಅಂಶ: ರೆಪೋ ದರಕ್ಕೆ ಲಿಂಕ್ ಮಾಡಲಾದ (Repo-linked loan) ಗೃಹ ಸಾಲ ಪಡೆದ ಗ್ರಾಹಕರು, ಈ ಹಿಂದೆ ಕಡಿತಗೊಳಿಸಲಾಗಿದ್ದ 125 ಬೇಸಿಸ್ ಪಾಯಿಂಟ್‌ಗಳ ಸಂಪೂರ್ಣ ಪ್ರಯೋಜನವನ್ನು ಈಗಾಗಲೇ ಪಡೆಯುತ್ತಿದ್ದಾರೆ.

ಗ್ರಾಹಕರಿಗೆ ಸಿಕ್ಕ ಭಾರಿ ಉಳಿತಾಯ:
50 ಲಕ್ಷ ರೂ. ಸಾಲ (20 ವರ್ಷಗಳ ಅವಧಿ): ಮಾಸಿಕ ಇಎಂಐನಲ್ಲಿ ಸುಮಾರು 3,050 ರೂ. ಉಳಿತಾಯವಾಗುತ್ತಿದ್ದು, ಒಟ್ಟಾರೆ ಸಾಲದ ಅವಧಿಯಲ್ಲಿ ಬಡ್ಡಿಯ ರೂಪದಲ್ಲಿ 7.34 ಲಕ್ಷ ರೂ. ವರೆಗೆ ಲಾಭವಾಗುತ್ತಿದೆ.

75 ಲಕ್ಷ ರೂ. ಸಾಲ: ಮಾಸಿಕ ಸುಮಾರು 5,800 ರೂ. ಉಳಿತಾಯವಾಗುತ್ತಿದ್ದು, ಒಟ್ಟು ಬಡ್ಡಿ ಮೊತ್ತದಲ್ಲಿ 13.94 ಲಕ್ಷ ರೂ. ವರೆಗೆ ಗ್ರಾಹಕರಿಗೆ ಆರ್ಥಿಕ ಲಾಭ ಸಿಗುತ್ತಿದೆ.

ಆರ್ಥಿಕ ತಜ್ಞರ ಸಲಹೆ ಏನು?
ಆರ್ಥಿಕ ತಜ್ಞರ ಪ್ರಕಾರ, ಇನ್ನೂ ಎಂಸಿಎಲ್‌ಆರ್ (MCLR) ಆಧಾರಿತ ಸಾಲದ ವ್ಯವಸ್ಥೆಯಲ್ಲೇ ಮುಂದುವರಿದಿರುವ ಗ್ರಾಹಕರು, ರೆಪೋ-ಲಿಂಕ್ಡ್ (RLLR) ಸಾಲಗಳಿಗೆ ಬದಲಾಗುವುದರಿಂದ ಹೆಚ್ಚಿನ ಪ್ರಯೋಜನ ಪಡೆಯಬಹುದು. ಪ್ರಸ್ತುತ ಮಾರುಕಟ್ಟೆ ದರಕ್ಕಿಂತ 50 ಬೇಸಿಸ್ ಪಾಯಿಂಟ್ ಅಥವಾ ಅದಕ್ಕಿಂತ ಹೆಚ್ಚು ಬಡ್ಡಿ ಪಾವತಿಸುತ್ತಿರುವವರು ತಮ್ಮ ಸಾಲವನ್ನು ‘ರೀಫೈನಾನ್ಸಿಂಗ್’ (Refinancing) ಮಾಡಿಕೊಳ್ಳುವುದು ಉತ್ತಮ ಎಂದು ತಜ್ಞರು ಸೂತ್ರ ನೀಡಿದ್ದಾರೆ.

ಒಟ್ಟಾರೆಯಾಗಿ, ಆರ್‌ಬಿಐನ ಈ ನಿರ್ಧಾರದಿಂದ ಸಾಲಗಾರರಿಗೆ ಸದ್ಯಕ್ಕೆ ಯಾವುದೇ ಹೊಸ ಹೊರೆ ಬೀಳದೆ, ಹಳೆಯ ಸೌಲಭ್ಯಗಳೇ ಮುಂದುವರಿಯಲಿವೆ.