ವರದಿ ಮತ್ತು ಫೋಟೋ ಕೃಪೆ
ಕೆ.ಎಂ.ಮುತ್ತುಸ್ವಾಮಿ ಕಣ್ಣನ್,
ಮೊ : 78998 64552
ಸುದ್ದಿಒನ್, ಚಿತ್ರದುರ್ಗ, ಆಗಸ್ಟ್. 01 : ತಾಲ್ಲೂಕು ಕಚೇರಿ ಅಧಿಕಾರಿಗಳ ನಿರ್ಲಕ್ಷೆಯಿಂದ ಹಿರೇಗುಂಟನೂರು ಹೋಬಳಿಯ ಗೂಳಯ್ಯನಹಟ್ಟಿ ಗ್ರಾಮದ ಚಂದ್ರಪ್ಪನವರಿಗೆ ಅನ್ಯಾಯವಾಗಿರುವುದನ್ನು ಖಂಡಿಸಿ ಕರುನಾಡ ವಿಜಯಸೇನೆಯಿಂದ ಶನಿವಾರ ತಾಲ್ಲೂಕು ಕಚೇರಿ ಎದುರು ಪ್ರತಿಭಟನೆ ನಡೆಸಿ ತಪ್ಪಿತಸ್ಥರ ವಿರುದ್ದ ಕಾನೂನು ರೀತಿಯ ಕ್ರಮ ಕೈಗೊಳ್ಳುವಂತೆ ತಹಶೀಲ್ದಾರ್ಗೆ ಮನವಿ ಸಲ್ಲಿಸಲಾಯಿತು.
ಹಿರೇಗುಂಟನೂರು ಹೋಬಳಿ ಚಿಕ್ಕಪುರ ಗ್ರಾಮದಲ್ಲಿರುವ ರಿ.ಸ.ನಂ.8/1 ರಲ್ಲಿ ಎರಡು ಎಕರೆ 20 ಗುಂಟೆ ಜಮೀನು ಹೊಂದಿರುವ ಚಂದ್ರಪ್ಪ 1 ಎಕರೆ 20 ಗುಂಟೆ
ಜಮೀನನ್ನು ಸರ್ವೆ ಸೈಟ್ ಸ್ಕೆಚ್ ನಕ್ಷೆ ಸಂಖ್ಯೆ 13030925111232001 ಪ್ರಕಾರ ದಿನಾಂಕ : 19-5-2026 ರಂದು ಜಯಲಕ್ಷ್ಮಿ ಎನ್ನುವವರಿಗೆ ಮಾರಾಟ ಮಾಡಿದ್ದು, ಚಿತ್ರದುರ್ಗ ಉಪ ನೊಂದಣಾಧಿಕಾರಿ ಕಚೇರಿಯಲ್ಲಿ ನೊಂದಣಿ ಮಾಡಿಸಿದ್ದಾರೆ. ಆದರೆ ಪಹಣಿಯಲ್ಲಿ ಜಯಲಕ್ಷ್ಮಿಯವರಿಗೆ 2 ಎಕರೆ 20 ಗುಂಟೆ ಜಮೀನು ವರ್ಗಾವಣೆಯಾಗಿರುವುದರ ಹಿಂದೆ ತಾಲ್ಲೂಕು ಕಚೇರಿ ಅಧಿಕಾರಿಗಳ ಕುಮ್ಮಕ್ಕಿದೆ. ಕೂಡಲೆ ತನಿಖೆ ನಡೆಸಿ ಚಂದ್ರಪ್ಪನವರಿಗೆ ನ್ಯಾಯ ದೊರಕಿಸಿ ಒಂದು ಎಕರೆ ಜಮೀನು ಉಳಿಸಿಕೊಡಬೇಕು. ಇಲ್ಲವಾದಲ್ಲಿ ಆ.3 ರಂದು ರೈತರ ಜೊತೆಗೂಡಿ ತಾಲ್ಲೂಕು ಕಚೇರಿ ಎದುರು ಧರಣಿ ನಡೆಸಲಾಗುವುದೆಂದು ಪ್ರತಿಭಟನಾಕಾರರು ಎಚ್ಚರಿಸಿದರು.
ಬಿಜೆಪಿ ನಗರ ಉಪಾಧ್ಯಕ್ಷ ವಿ.ಆರ್.ನಾಗರಾಜ್, ಲಿಂಗರಾಜು ಕವಾಡಿಗರಹಟ್ಟಿ, ಸುರೇಶ್ ಈಚಲನಾಗೇನಹಳ್ಳಿ, ಹೊಲದ ಮಾಲೀಕ ಚಂದ್ರಪ್ಪ ಗೂಳಯ್ಯನಹಟ್ಟಿ, ಕರುನಾಡ ವಿಜಯಸೇನೆ ಜಿಲ್ಲಾಧ್ಯಕ್ಷ ಕೆ.ಟಿ.ಶಿವಕುಮಾರ್, ಮಹಿಳಾ ಘಟಕದ ಅಧ್ಯಕ್ಷೆ ವೀಣಗೌರಣ್ಣ ಇನ್ನು ಅನೇಕರು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.
