ಸುದ್ದಿಒನ್ : ಅಡುಗೆಯ ರುಚಿ ಹೆಚ್ಚಿಸಲು ನಾವು ಸಾಮಾನ್ಯವಾಗಿ ಈರುಳ್ಳಿ ಸೊಪ್ಪನ್ನು ಬಳಸುತ್ತೇವೆ. ಆದರೆ ಅನೇಕರು ಇದನ್ನು ಕೇವಲ ಅಲಂಕಾರಿಕ ವಸ್ತುವೆಂದು ಭಾವಿಸಿ ಪಕ್ಕಕ್ಕಿಡುತ್ತಾರೆ. ಇನ್ನು ಕೆಲವರಿಗಂತೂ ಇದರ ವಾಸನೆ ಕಂಡರೆ ಆಗದು. ಆದರೆ, ಆಯುರ್ವೇದ ಮತ್ತು ಆಧುನಿಕ ವೈದ್ಯಕೀಯ ಶಾಸ್ತ್ರದ ಪ್ರಕಾರ, ಈರುಳ್ಳಿ ಸೊಪ್ಪು ಕೇವಲ ರುಚಿಗಷ್ಟೇ ಅಲ್ಲ, ಆರೋಗ್ಯಕ್ಕೂ ಒಂದು ವರದಾನವಿದ್ದಂತೆ.
ಹಲವು ಮಾರಕ ಕಾಯಿಲೆಗಳನ್ನು ದೂರವಿಡುವ ಶಕ್ತಿ ಹೊಂದಿರುವ ಈ ‘ಹಸಿರು ಸಂಜೀವಿನಿ’ಯ ಪ್ರಯೋಜನಗಳು ಇಲ್ಲಿವೆ:
ಜೀರ್ಣಕ್ರಿಯೆಗೆ ರಾಮಬಾಣ
ಈರುಳ್ಳಿ ಸೊಪ್ಪಿನಲ್ಲಿ ಹೇರಳವಾದ ಫೈಬರ್ (ನಾರಿನಂಶ) ಅಡಗಿದೆ. ಇದು ಜೀರ್ಣಾಂಗ ವ್ಯೂಹವನ್ನು ಶುಚಿಗೊಳಿಸಿ, ಜೀರ್ಣಕ್ರಿಯೆ ಸುಗಮವಾಗಿ ನಡೆಯುವಂತೆ ನೋಡಿಕೊಳ್ಳುತ್ತದೆ. ದೀರ್ಘಕಾಲದ ಮಲಬದ್ಧತೆ ಸಮಸ್ಯೆಯಿಂದ ಬಳಲುತ್ತಿರುವವರು ತಮ್ಮ ಆಹಾರದಲ್ಲಿ ಈರುಳ್ಳಿ ಸೊಪ್ಪನ್ನು ನಿಯಮಿತವಾಗಿ ಬಳಸುವುದರಿಂದ ಉತ್ತಮ ಫಲಿತಾಂಶ ಪಡೆಯಬಹುದು.
ಶೀತ, ಕೆಮ್ಮಿಗೆ ಮದ್ದು
ಬದಲಾಗುತ್ತಿರುವ ಹವಾಮಾನದಿಂದ ಕಾಡುವ ಶೀತ, ಕೆಮ್ಮು ಮತ್ತು ಜ್ವರಕ್ಕೆ ಇದು ಹೇಳಿಮಾಡಿಸಿದ ಔಷಧ. ಇದರಲ್ಲಿರುವ ಆ್ಯಂಟಿವೈರಲ್ ಗುಣಲಕ್ಷಣಗಳು ಸೋಂಕಿನ ವಿರುದ್ಧ ಹೋರಾಡುತ್ತವೆ. ವಿಶೇಷವಾಗಿ ದೇಹದಲ್ಲಿ ಅತಿಯಾದ ಲೋಳೆ (Mucus) ಉತ್ಪಾದನೆಯನ್ನು ಕಡಿಮೆ ಮಾಡಿ, ಉಸಿರಾಟದ ಸಮಸ್ಯೆಯನ್ನು ನಿವಾರಿಸಲು ಇದು ಸಹಕಾರಿಯಾಗಿದೆ.
ಬಲಿಷ್ಠ ಮೂಳೆಗಳಿಗಾಗಿ
ವಯಸ್ಸಾದಂತೆ ಕಾಡುವ ಮೂಳೆ ಸವಕಳಿ ಅಥವಾ ಮೂಳೆ ನೋವಿನ ಸಮಸ್ಯೆಗೆ ಈರುಳ್ಳಿ ಸೊಪ್ಪು ಉತ್ತಮ ಪರಿಹಾರ ನೀಡಬಲ್ಲದು. ಇದರಲ್ಲಿ ಕ್ಯಾಲ್ಸಿಯಂ ಅಂಶ ಸಮೃದ್ಧವಾಗಿದ್ದು, ಇದು ಮೂಳೆಗಳನ್ನು ಬಲಪಡಿಸುವುದಲ್ಲದೆ, ಮೂಳೆಗಳಿಗೆ ಸಂಬಂಧಿಸಿದ ಆಸ್ಟಿಯೋ ಪೆರೋಸಿಸ್ನಂತಹ ಕಾಯಿಲೆಗಳ ಅಪಾಯವನ್ನು ಕಡಿಮೆ ಮಾಡುತ್ತದೆ.
ಹೃದಯದ ಆರೋಗ್ಯ ಮತ್ತು ಕಣ್ಣಿನ ದೃಷ್ಟಿ
ಇಷ್ಟೇ ಅಲ್ಲದೆ, ಈರುಳ್ಳಿ ಸೊಪ್ಪು ರಕ್ತದೊತ್ತಡವನ್ನು ನಿಯಂತ್ರಣದಲ್ಲಿಡಲು ಸಹಾಯ ಮಾಡುತ್ತದೆ. ಇದರಲ್ಲಿರುವ ವಿಟಮಿನ್ ‘ಎ’ ಅಂಶವು ಕಣ್ಣಿನ ದೃಷ್ಟಿಯನ್ನು ತೀಕ್ಷ್ಣಗೊಳಿಸಲು ನೆರವಾಗುತ್ತದೆ. ಇಂದಿನಿಂದಲೇ ನಿಮ್ಮ ಸಲಾಡ್, ಪಲ್ಯ ಅಥವಾ ಸೂಪ್ಗಳಲ್ಲಿ ಈರುಳ್ಳಿ ಸೊಪ್ಪನ್ನು ಸೇರಿಸಿಕೊಳ್ಳುವ ಅಭ್ಯಾಸ ಮಾಡಿಕೊಳ್ಳಿ. ರುಚಿಯ ಜೊತೆಗೆ ಆರೋಗ್ಯವನ್ನೂ ವೃದ್ಧಿಸಿಕೊಳ್ಳಿ.
