ದೆಹಲಿ.ಜುಲೈ.30: ಆಗಸ್ಟ್ ತಿಂಗಳು ಆರಂಭವಾಗುತ್ತಿದ್ದಂತೆಯೇ ದೇಶದಲ್ಲಿ ಹಲವು ಪ್ರಮುಖ ಹಣಕಾಸು ಮತ್ತು ಆಡಳಿತಾತ್ಮಕ ನಿಯಮಗಳಲ್ಲಿ ದೊಡ್ಡ ಮಟ್ಟದ ಬದಲಾವಣೆಗಳು ಜಾರಿಗೆ ಬರಲಿವೆ. ಬ್ಯಾಂಕಿಂಗ್, ರೈಲ್ವೇ ಟಿಕೆಟ್ ಬುಕಿಂಗ್, ಶೇರು ಮಾರುಕಟ್ಟೆ ಹಾಗೂ ಚಾಲನಾ ಪರವಾನಗಿ (ಡಿಎಲ್) ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ಹೊಸ ನಿಯಮಗಳು ಜಾರಿಯಾಗಲಿದ್ದು, ಇವು ಸಾಮಾನ್ಯ ಜನರ ಜೇಬಿನ ಮೇಲೆ ನೇರ ಪರಿಣಾಮ ಬೀರಲಿವೆ.
‘ಸೆಂಟ್ರಲ್ KYC 2.0’ ಜಾರಿ – ಗ್ರಾಹಕರಿಗೆ ದೊಡ್ಡ ರಿಲೀಫ್
ಬ್ಯಾಂಕ್ಗಳು ಮತ್ತು ವಿಮಾ ಕಂಪನಿಗಳು ಜಂಟಿಯಾಗಿ ಆಗಸ್ಟ್ 1 ರಿಂದ ‘ಸೆಂಟ್ರಲ್ ಕೆವೈಸಿ 2.0’ ಎಂಬ ಹೊಸ ವ್ಯವಸ್ಥೆಯನ್ನು ಆರಂಭಿಸುತ್ತಿವೆ. ಇದರಿಂದಾಗಿ ಗ್ರಾಹಕರು ಇನ್ಮುಂದೆ ಪ್ರತಿಯೊಂದು ಬ್ಯಾಂಕ್ ಅಥವಾ ಮ್ಯೂಚುಯಲ್ ಫಂಡ್ ಕಂಪನಿಗಳಿಗೆ ಪ್ರತ್ಯೇಕವಾಗಿ ದಾಖಲೆಗಳನ್ನು ನೀಡಬೇಕಿಲ್ಲ. ಒಂದು ಬಾರಿ ಕೇಂದ್ರ ರಿಜಿಸ್ಟ್ರಿಯಲ್ಲಿ ಪರಿಶೀಲನೆಗೊಂಡ ಮಾಹಿತಿ ಜಾರಿಯಾದರೆ, ಗ್ರಾಹಕರ ಒಪ್ಪಿಗೆಯೊಂದಿಗೆ (ಒಟಿಪಿ ಮೂಲಕ) ಹೊಸ ಖಾತೆಗಳನ್ನು ಸುಲಭವಾಗಿ ತೆರೆಯಬಹುದು.
ತತ್ಕಾಲ್ ಟಿಕೆಟ್ ಬುಕಿಂಗ್ಗೆ ರೈಲ್ವೆಯ ಹೊಸ ಟೋಕನ್ ನಿಯಮ
ಪಶ್ಚಿಮ ಮಧ್ಯ ರೈಲ್ವೆಯು ತತ್ಕಾಲ್ ಟಿಕೆಟ್ ಬುಕಿಂಗ್ ಪ್ರಕ್ರಿಯೆಯಲ್ಲಿ ಬದಲಾವಣೆ ಮಾಡಿದೆ. ಹೊಸ ಟೋಕನ್ ವ್ಯವಸ್ಥೆಯ ಪ್ರಕಾರ, ಪ್ರಯಾಣಿಕರು ಕೌಂಟರ್ಗೆ ಪದೇ ಪದೇ ಅಲೆಯುವುದು ತಪ್ಪಲಿದೆ.
ಎಸಿ 1 ಕ್ಲಾಸ್ ಟೋಕನ್: ಬೆಳಿಗ್ಗೆ 8:30 ರಿಂದ 9:00 ಗಂಟೆಯವರೆಗೆ ನೀಡಲಾಗುತ್ತದೆ.
ನಾನ್-ಎಸಿ ಕ್ಲಾಸ್ ಟೋಕನ್: ಬೆಳಿಗ್ಗೆ 9:00 ರಿಂದ 9:30 ಗಂಟೆಯವರೆಗೆ ವಿತರಿಸಲಾಗುತ್ತದೆ.
ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ದರ ಏರಿಕೆ ಬಿಸಿ
ಕೊಟಕ್ ಮಹೀಂದ್ರಾ ಬ್ಯಾಂಕ್: ಡೆಬಿಟ್ ಕಾರ್ಡ್ ಮೂಲಕ ಮಾಡುವ ‘ಡೈನಾಮಿಕ್ ಕರೆನ್ಸಿ ಕನ್ವರ್ಶನ್’ (DCC) ಶುಲ್ಕವನ್ನು ಶೇ. 1 ರಿಂದ ಶೇ. 3.5 + GST ಗೆ ಹೆಚ್ಚಿಸಲಾಗಿದೆ. ಇದು ಅಂತಾರಾಷ್ಟ್ರೀಯ ವಹಿವಾಟುಗಳಿಗೂ ಅನ್ವಯಿಸಲಿದೆ.
ಪಂಜಾಬ್ ನ್ಯಾಷನಲ್ ಬ್ಯಾಂಕ್ (PNB): ಯುಪಿಐ ಮ್ಯಾಂಡೇಟ್ ನೋಂದಣಿಗೆ (UPI Mandate Registration) ₹125 ಶುಲ್ಕ ವಿಧಿಸಲಾಗುತ್ತದೆ. ಅಲ್ಲದೆ, ಆರ್ಥಿಕ ಕಾರಣಗಳಿಂದ ವಹಿವಾಟುಗಳು ವಿಫಲವಾದರೆ (ಬೌನ್ಸ್) ವಿಧಿಸುವ ಶುಲ್ಕವನ್ನು ₹250 ಗೆ ಏರಿಕೆ ಮಾಡಲಾಗಿದೆ.
ಶೇರು ಬೈಬ್ಯಾಕ್ ನಿಯಮ ಬದಲಿಸಿದ ‘ಸೆಬಿ’ (SEBI)
ಬಂಡವಾಳ ಮಾರುಕಟ್ಟೆ ನಿಯಂತ್ರಕ ‘ಸೆಬಿ’, ಮುಕ್ತ ಮಾರುಕಟ್ಟೆಯಲ್ಲಿ ಕಂಪನಿಗಳು ತಮ್ಮದೇ ಶೇರುಗಳನ್ನು ಹಿಂಪಡೆಯುವ (ಬೈಬ್ಯಾಕ್) ನಿಯಮಗಳನ್ನು ತಿದ್ದುಪಡಿ ಮಾಡಿದೆ. ಹೊಸ ನಿಯಮದಂತೆ, ಬೈಬ್ಯಾಕ್ ಪ್ರಕ್ರಿಯೆಯು ಗರಿಷ್ಠ 66 ಕೆಲಸದ ದಿನಗಳೊಳಗೆ ಪೂರ್ಣಗೊಳ್ಳಬೇಕು. ಅಲ್ಲದೆ, ಬೈಬ್ಯಾಕ್ ಮೌಲ್ಯವು ಕಂಪನಿಯ ಪಾವತಿಸಿದ ಬಂಡವಾಳ ಮತ್ತು ಉಚಿತ ಮೀಸಲುಗಳ ಶೇ. 15 ಕ್ಕಿಂತ ಕಡಿಮೆಯಿರಬೇಕು.
ಎಲ್ಪಿಜಿ (LPG) ಸಿಲಿಂಡರ್ ದರ ಪರಿಷ್ಕರಣೆ
ತೈಲ ಮಾರುಕಟ್ಟೆ ಕಂಪನಿಗಳು (OMCs) ಪ್ರತಿ ತಿಂಗಳ ಮೊದಲ ದಿನದಂತೆ ಆಗಸ್ಟ್ 1 ರಂದೂ ಅಡುಗೆ ಅನಿಲ (LPG) ದರಗಳನ್ನು ಪರಿಷ್ಕರಿಸಲಿವೆ. ಜುಲೈ 1 ರಂದು 19 ಕೆಜಿ ವಾಣಿಜ್ಯ ಸಿಲಿಂಡರ್ ಬೆಲೆ ₹183.50 ಹಾಗೂ 5 ಕೆಜಿ ಸಿಲಿಂಡರ್ ಬೆಲೆ ₹13 ಕಡಿಮೆಯಾಗಿತ್ತು. ಈ ಬಾರಿಯೂ ದರದಲ್ಲಿ ಬದಲಾವಣೆಯಾಗುವ ಸಾಧ್ಯತೆಯಿದೆ.
