ದೆಹಲಿ.ಆಗಸ್ಟ್.23: ವಿದೇಶಕ್ಕೆ ತೆರಳುವ ಭಾರತೀಯ ವಿಮಾನ ಪ್ರಯಾಣಿಕರಿಗೆ ಕೇಂದ್ರ ಸರ್ಕಾರ ಮಹತ್ವದ ಬದಲಾವಣೆ ತಂದಿದೆ. ಸೆಪ್ಟೆಂಬರ್ 1, 2026ರಿಂದ ದೇಶದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗಳಲ್ಲಿ ಬೋರ್ಡಿಂಗ್ ಪಾಸ್ ಮೇಲೆ ಇಮಿಗ್ರೇಷನ್ ಸ್ಟಾಂಪ್ ಹಾಕುವ ಪ್ರಕ್ರಿಯೆ ರದ್ದಾಗಲಿದೆ. ಇದರಿಂದ ವಿದೇಶ ಪ್ರಯಾಣದ ವೇಳೆ ಇಮಿಗ್ರೇಷನ್ ಪ್ರಕ್ರಿಯೆ ಮತ್ತಷ್ಟು ಸರಳವಾಗಲಿದೆ.
ಬೋರ್ಡಿಂಗ್ ಪಾಸ್ಗೆ ಇನ್ಮುಂದೆ ಸ್ಟಾಂಪ್ ಅಗತ್ಯವಿಲ್ಲ
ಸದ್ಯ ಅಂತಾರಾಷ್ಟ್ರೀಯ ವಿಮಾನದಲ್ಲಿ ಪ್ರಯಾಣಿಸುವವರು ಇಮಿಗ್ರೇಷನ್ ಕೌಂಟರ್ನಲ್ಲಿ ಬೋರ್ಡಿಂಗ್ ಪಾಸ್ ತೋರಿಸಬೇಕು. ಈ ವೇಳೆ ಅಧಿಕಾರಿಗಳು ಬೋರ್ಡಿಂಗ್ ಪಾಸ್ ಮೇಲೆ ಇಮಿಗ್ರೇಷನ್ ಸ್ಟಾಂಪ್ ಹಾಕುವ ಪದ್ಧತಿ ಇದೆ. ಆದರೆ ಸೆಪ್ಟೆಂಬರ್ 1ರಿಂದ ಈ ಸ್ಟಾಂಪಿಂಗ್ ಕಡ್ಡಾಯ ಇರುವುದಿಲ್ಲ.
ಬೋರ್ಡಿಂಗ್ ಪಾಸ್ನಲ್ಲಿರುವ ಸ್ಟಾಂಪ್ ಸ್ಪಷ್ಟವಾಗಿ ಕಾಣದಿರುವುದು ಅಥವಾ ನಂತರ ಪರಿಶೀಲನೆ ನಡೆಸುವಾಗ ಓದಲು ಕಷ್ಟವಾಗುವಂತಹ ಸಮಸ್ಯೆಗಳನ್ನು ತಪ್ಪಿಸಲು ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಮೊಬೈಲ್ನಲ್ಲಿರುವ ಇ-ಬೋರ್ಡಿಂಗ್ ಪಾಸ್ ಬಳಸಬಹುದು
ಹೊಸ ನಿಯಮ ಜಾರಿಗೆ ಬಂದ ಬಳಿಕ ಪ್ರಯಾಣಿಕರು ಮೊಬೈಲ್ ಫೋನ್ನಲ್ಲಿರುವ ಇ-ಬೋರ್ಡಿಂಗ್ ಪಾಸ್ನ್ನು ಇಮಿಗ್ರೇಷನ್ ಕೌಂಟರ್ನಲ್ಲಿ ತೋರಿಸಬಹುದು. ಮುದ್ರಿತ ಬೋರ್ಡಿಂಗ್ ಪಾಸ್ ಬಳಸಲು ಇಚ್ಛಿಸುವವರಿಗೂ ಯಾವುದೇ ನಿರ್ಬಂಧವಿಲ್ಲ.
ಅಂದರೆ ಪ್ರಯಾಣಿಕರು ತಮ್ಮ ಅನುಕೂಲಕ್ಕೆ ತಕ್ಕಂತೆ ಡಿಜಿಟಲ್ ಅಥವಾ ಮುದ್ರಿತ ಬೋರ್ಡಿಂಗ್ ಪಾಸ್ ಬಳಸಬಹುದು. ಆದರೆ ಮುದ್ರಿತ ಬೋರ್ಡಿಂಗ್ ಪಾಸ್ಗೆ ಇಮಿಗ್ರೇಷನ್ ಸ್ಟಾಂಪ್ ಹಾಕಲಾಗುವುದಿಲ್ಲ.
ವಿಮಾನ ನಿಲ್ದಾಣಗಳಿಗೂ ಸೂಚನೆ
ಈ ಹೊಸ ಪ್ರಕ್ರಿಯೆ ಕುರಿತು ಬ್ಯೂರೋ ಆಫ್ ಇಮಿಗ್ರೇಷನ್, ವಿಮಾನ ನಿಲ್ದಾಣ ನಿರ್ವಹಣಾ ಸಂಸ್ಥೆಗಳು, ಕೇಂದ್ರ ಕೈಗಾರಿಕಾ ಭದ್ರತಾ ಪಡೆ (CISF) ಸೇರಿದಂತೆ ಸಂಬಂಧಪಟ್ಟ ಏಜೆನ್ಸಿಗಳಿಗೆ ಮಾಹಿತಿ ನೀಡಿದೆ. ಹೊಸ ನಿಯಮ ಜಾರಿಗೆ ಬರುವ ಮುನ್ನ ಪ್ರಯಾಣಿಕರಿಗೆ ಈ ಕುರಿತು ಮಾಹಿತಿ ನೀಡುವಂತೆ ವಿಮಾನ ನಿಲ್ದಾಣ ಮತ್ತು ಏರ್ಲೈನ್ ಸಿಬ್ಬಂದಿಗೂ ಸೂಚಿಸಲಾಗಿದೆ.
ಸೆಪ್ಟೆಂಬರ್ 1ರಿಂದ ಜಾರಿಗೆ ಬರಲಿರುವ ಈ ಬದಲಾವಣೆಯಿಂದ ಇಮಿಗ್ರೇಷನ್ ಕೌಂಟರ್ನಲ್ಲಿ ನಡೆಯುವ ಹೆಚ್ಚುವರಿ ಭೌತಿಕ ಪ್ರಕ್ರಿಯೆಯೊಂದು ಕಡಿಮೆಯಾಗಲಿದ್ದು, ಅಂತಾರಾಷ್ಟ್ರೀಯ ಪ್ರಯಾಣಿಕರಿಗೆ ನಿರ್ಗಮನ ಪ್ರಕ್ರಿಯೆ ಮತ್ತಷ್ಟು ವೇಗವಾಗಿ ಮತ್ತು ಸುಗಮವಾಗಿ ನಡೆಯುವ ನಿರೀಕ್ಷೆಯಿದೆ.
