ಶಿವಯೋಗದಿಂದ ಧ್ಯಾನ, ಮೌನದಿಂದ ಸಮಾಧಾನ : ಡಾ. ಬಸವಕುಮಾರ ಸ್ವಾಮೀಜಿ

ಸುದ್ದಿಒನ್, ಚಿತ್ರದುರ್ಗ, ಆಗಸ್ಟ್. 02 : ಬಸವಾದಿ ಶಿವಶರಣರ ವಚನಗಳಲ್ಲಿ ಮಾನವನನ್ನು ಮಹದೇವನನ್ನಾಗಿಸುವ ತತ್ವಾದರ್ಶ ಹಾಗೂ ಉದಾತ್ತ ಮೌಲ್ಯಗಳು ಅಡಕವಾಗಿದ್ದು, ಶಿವಯೋಗದ ಸಾಧನೆಯಿಂದ ತನು–ಮನ–ಭಾವಶುದ್ಧಿಯೊಂದಿಗೆ ಧ್ಯಾನ, ಮೌನ ಮತ್ತು ಸಮಾಧಾನ ಪ್ರಾಪ್ತಿಯಾಗುತ್ತದೆ ಎಂದು ಎಸ್.ಜೆ.ಎಂ. ವಿದ್ಯಾಪೀಠದ ಆಡಳಿತ ಮಂಡಳಿ ಸದಸ್ಯ ಡಾ. ಬಸವಕುಮಾರ ಸ್ವಾಮೀಜಿ ಹೇಳಿದರು.

ನಗರದ ಹೊರವಲಯದ ಶೀಬಾರದ ಶ್ರೀ ಗುರುಪಾದ ಮುರುಘರಾಜೇಂದ್ರರ ವನದಲ್ಲಿ ಭಾನುವಾರ ನಡೆದ ಕಾರ್ಯಕ್ರಮದಲ್ಲಿ ಶಿವಯೋಗದ ಪ್ರಾತ್ಯಕ್ಷಿಕೆ ನಡೆಸಿ ಅವರು ಮಾತನಾಡಿದರು.

ತನು–ಮನದ ಶುದ್ಧಿಗಾಗಿ ಹಲವರು ದೇವಾಲಯಗಳಿಗೆ ತೆರಳುತ್ತಾರೆ. ಆದರೆ ಶಿವಯೋಗದ ಸಾಧನೆಯಿಂದಲೂ ಮನಸ್ಸನ್ನು ಸ್ಥಿರಗೊಳಿಸಿ ಆತ್ಮಶುದ್ಧಿಯನ್ನು ಸಾಧಿಸಬಹುದು. ಜೀವನದಲ್ಲಿ ಎದುರಾಗುವ ಏರುಪೇರು, ಕಳವಳ, ಸಂದಿಗ್ಧತೆ ಹಾಗೂ ಮನೋವಿಕಲತೆಯಿಂದ ಹೊರಬರಲು ಶಿವಯೋಗ ಪರಿಣಾಮಕಾರಿ ಮಾರ್ಗವಾಗಿದೆ. ಪಂಚೇಂದ್ರಿಯಗಳ ಚಂಚಲತೆಯಿಂದ ಬಳಲುವ ಮನಸ್ಸನ್ನು ಇಷ್ಟಲಿಂಗದ ಧ್ಯಾನದ ಮೂಲಕ ಏಕಾಗ್ರಗೊಳಿಸಿದಾಗ ಧ್ಯಾನ, ಮೌನ ಮತ್ತು ಸಮಾಧಾನದ ಅನುಭವ ದೊರೆಯುತ್ತದೆ. ಬಸವಾದಿ ಶಿವಶರಣರು ಜಾತಿ, ಮತ, ಲಿಂಗಭೇದವಿಲ್ಲದೆ ಎಲ್ಲರೂ ಈ ಮಾರ್ಗವನ್ನು ಅನುಸರಿಸಬೇಕೆಂದು ಸಂದೇಶ ನೀಡಿದ್ದಾರೆ ಎಂದು ಹೇಳಿದರು.

ಖ್ಯಾತ ಹಿನ್ನೆಲೆ ಗಾಯಕಿ ಡಾ. ಎಸ್. ಜಾನಕಿ ಅವರಿಗೆ ಗಾನನಮನ ಹಾಗೂ ಹಿರಿಯ ಗಾಂಧಿವಾದಿ ಹೆಚ್. ಹನುಮಂತಪ್ಪ ಅವರಿಗೆ ನುಡಿನಮನ ಸಲ್ಲಿಸಿರುವುದು ಅರ್ಥಪೂರ್ಣವಾಗಿದೆ. ಜಾನಕಿ ಅವರು ಈ ನಾಡು ಕಂಡ ಅಪರೂಪದ ಗಾಯಕಿಯಾಗಿದ್ದು, ಅವರಿಗೆ ಅವರೇ ಸಾಟಿ. ಹಾಗೆಯೇ ಹೆಚ್. ಹನುಮಂತಪ್ಪ ಅವರು ರಾಜಕೀಯದಲ್ಲಿದ್ದು ಸಮಾಜಕ್ಕೆ ಅನುಪಮ ಸೇವೆ ಸಲ್ಲಿಸಿದ್ದಾರೆ. ಅವರ ಸ್ಮರಣೆಯೂ ಇದೇ ವೇದಿಕೆಯಲ್ಲಿ ನಡೆದಿರುವುದು ಸುದೈವ ಎಂದು ಅಭಿಪ್ರಾಯಪಟ್ಟರು.

ಈ ಸಂದರ್ಭದಲ್ಲಿ ಹೆಚ್. ಹನುಮಂತಪ್ಪ ಅವರ ಒಡನಾಡಿ ಹಾಗೂ ಎಸ್ಸೆನ್ ಸ್ಮಾರಕ ಟ್ರಸ್ಟ್‌ನ ಪದಾಧಿಕಾರಿ ಎಸ್. ಷಣ್ಮುಖಪ್ಪ ಮಾತನಾಡಿ, ಹನುಮಂತಪ್ಪ ಅವರು ಶಿಕ್ಷಕ, ವಕೀಲ ಹಾಗೂ ರಾಜಕಾರಣಿಯಾಗಿ ಜನಪರ ಸೇವೆ ಸಲ್ಲಿಸಿದ ಅಪರೂಪದ ವ್ಯಕ್ತಿತ್ವವಾಗಿದ್ದರು. ಅವರು ಸ್ಥಾಪಿಸಿದ ಸರಸ್ವತಿ ಕಾನೂನು ಕಾಲೇಜಿನಿಂದ ಅನೇಕ ಪ್ರತಿಭಾವಂತ ನ್ಯಾಯವಾದಿಗಳು ಹೊರಹೊಮ್ಮಿದ್ದಾರೆ ಎಂದು ಹೇಳಿದರು.

ಚಿತ್ರದುರ್ಗ–ರಾಯದುರ್ಗ ರೈಲು ಮಾರ್ಗ, ಡಾ. ಬಿ.ಆರ್. ಅಂಬೇಡ್ಕರ್ ಹಾಗೂ ಮದಕರಿ ನಾಯಕ ಪ್ರತಿಮೆಗಳ ಸ್ಥಾಪನೆ, ನೀರಾವರಿ ಹೋರಾಟ ಸೇರಿದಂತೆ ಹಲವು ಜನಪರ ಕಾರ್ಯಗಳಲ್ಲಿ ಅವರು ಮುಂಚೂಣಿಯಲ್ಲಿದ್ದರು. ಅನೇಕ ಬಡವರಿಗೆ ಉದ್ಯೋಗಾವಕಾಶ ಕಲ್ಪಿಸುವಲ್ಲಿಯೂ ಪಾತ್ರವಹಿಸಿದ್ದರು. ಎಸ್ಸೆನ್ ಸ್ಮಾರಕ ಟ್ರಸ್ಟ್ ಮೂಲಕ ಅವರ ಪುಣ್ಯಭೂಮಿಯನ್ನು ಐತಿಹಾಸಿಕ ಸ್ಮಾರಕವನ್ನಾಗಿ ರೂಪಿಸಲು ಶ್ರಮಿಸಿದ್ದರು. ರಾಜಕೀಯ ಪ್ರವೇಶಿಸುವ ಯುವಕರಿಗೆ ತರಬೇತಿ ನೀಡುವ ಶಾಲೆ ಸ್ಥಾಪಿಸಬೇಕೆಂಬ ಅವರ ಕನಸು ನನಸಾಗಿದ್ದರೆ ಅದೇ ಅವರಿಗೆ ಸಲ್ಲುವ ನಿಜವಾದ ನುಡಿನಮನವಾಗುತ್ತಿತ್ತು ಎಂದು ಹೇಳಿದರು.