ಇ.ಡಿ ಅಧಿಕಾರಿಗಳ ಮುಂದೆ ಐಶ್ವರ್ಯ ರೈ : ಅತ್ತ ರಾಜ್ಯಸಭೆಯಲ್ಲಿ‌ ಜಯಾ ಬಚ್ಚನ್ ಕೆಂಡಾಮಂಡಲ…!

ನವದೆಹಲಿ: ಪನಾಮಾ ಕೇಸ್ ವರ್ಷಗಳ ಬಳಿಕ ಮತ್ತೆ ಚಿಗುರೊಡೆದಿದೆ. ಬಚ್ಚನ್ ಸೊಸೆಗೆ ಇ.ಡಿ ಅಧಿಕಾರಿಗಳು ಸಮನ್ಸ್ ಜಾರಿ ಮಾಡಿದ್ದರು. ಈ ಹಿನ್ನೆಲೆ ಇಂದು ಐಶ್ವರ್ಯಾ ರೈ ಇ.ಡಿ ಅಧಿಕಾರಿಗಳ ಮುಂದೆ ವಿಚಾರಣೆಗೆ ಹಾಜರಾಗಿದ್ರು. ಆದ್ರೆ ಈ ವಿಚಾರ ರಾಜ್ಯಸಭೆಯಲ್ಲೂ ಕೋಲಾಹಲ ಸೃಷ್ಟಿಸಿತ್ತು.

ಇಂದು ಇ.ಡಿ ಅಧಿಕಾರಿಗಳ ಮುಂದೆ ಹಾಜರಾಗಿದ್ದ ಐಶ್ವರ್ಯ ರೈ ಬಗ್ಗೆ ರಾಜ್ಯಸಭೆಯಲ್ಲಿ ವಿಚಾರ ತೆಗೆಯಲಾಗಿತ್ತು. ಸಂಸದೆ ಜಯಾ ಬಚ್ಚನ್ ಮಾತಾಡುವಾಗ ಸಂಸದರೊಬ್ಬರು ಬಚ್ಚನ್ ಕುಟುಂಬದ ಬಗ್ಗೆ ಮಾತನಾಡಿದ್ದಾರೆ. ಇದು ಸಹಜವಾಗಿಯೇ ಜಯಾ ಬಚ್ಚನ್ ಗೆ ಕೆಂಡಾ ಮಂಡಲರಾಗುವಂತೆ ಮಾಡಿದೆ. ಕುಟುಂಬದ ಮೇಲೆ ವೈಯಕ್ತಿಕ ದಾಳಿ ಮಾಡಲಾಗ್ತಿದೆ ಎಂದ ಜಯ, ನಿಮ್ಮ ವಿನಾಶದ ಕಾಲ ಹತ್ತಿರವಾಗುತ್ತಿದೆ ಎಂದು ಶಾಪ ಹಾಕಿದ್ದಾರೆ.

2016 ರಲ್ಲಿ ಈ ಪನಾಮಾ ಕೇಸ್ ಸಾಕಷ್ಟು ಚರ್ಚೆ ಹುಟ್ಟು ಹಾಕಿತ್ತು. ಅದರಲ್ಲಿ 500 ಭಾರತೀಯರ ಹೆಸರು ಕೂಡ ಕೇಳಿಬಂದಿತ್ತು. ಭಾರತಕ್ಕೆ ತೆರಿಗೆ ವಂಚಿಸಿ ವಿದೇಶಗಳಲ್ಲಿ ಹೂಡಿಕೆ ಮಾಡುತ್ತಿದ್ದಾರೆಂಬ ಆರೋಪ ರಾಜಕಾರಣಿಗಳು, ನಟ, ನಟಿಯರು, ಕ್ರಿಕೆಟಿಗರ ಮೇಲೂ ಕೇಳಿ ಬಂದಿತ್ತು. ಈಗ ಇದೇ ಕೇಸ್ ಗೆ ಸಂಬಂಧಿಸಿದಂತೆ ಐಶ್ವರ್ಯ ರೈ ವಿಚಾರಣೆ ಎದುರಿಸಿದ್ದಾರೆ.