ಚಿನ್ನ ಖರೀದಿಗೆ ಇದೆಯಾ ಸುವರ್ಣಾವಕಾಶ? ಮದುವೆ ಸೀಸನ್ ಮಧ್ಯೆ ಬಂಗಾರದ ಬೆಲೆಯಲ್ಲಿ ಇಳಿಕೆ

ಮದುವೆ ಹಾಗೂ ಶುಭ ಸಮಾರಂಭಗಳ ಸೀಸನ್ ನಡುವೆಯೇ ಚಿನ್ನದ ದರದಲ್ಲಿ ಇಳಿಕೆ ಕಂಡುಬಂದಿದ್ದು, ಗ್ರಾಹಕರಲ್ಲಿ ಖರೀದಿ ಆಸಕ್ತಿ ಹೆಚ್ಚಾಗಿದೆ. ಕಳೆದ ಕೆಲವು ದಿನಗಳಿಂದ ಏರಿಳಿತ ಕಾಣುತ್ತಿದ್ದ ಬಂಗಾರದ ಬೆಲೆ, ಮೇ ತಿಂಗಳ ಮೊದಲ ಹತ್ತು ದಿನಗಳಲ್ಲಿ ಹೆಚ್ಚಳಕ್ಕಿಂತ ಇಳಿಕೆಯನ್ನೇ ಹೆಚ್ಚು ದಾಖಲಿಸಿದೆ. ಮುಂದಿನ ವಾರದಲ್ಲೂ ಚಿನ್ನದ ದರ ಮತ್ತಷ್ಟು ಕಡಿಮೆಯಾಗುವ ಸಾಧ್ಯತೆ ಇದೆ ಎಂದು ಮಾರುಕಟ್ಟೆ ವಲಯ ಅಂದಾಜಿಸಿದೆ.

ಭಾನುವಾರ ಬೆಂಗಳೂರು ಸೇರಿದಂತೆ ದೇಶದ ಪ್ರಮುಖ ನಗರಗಳಲ್ಲಿ ಚಿನ್ನ ಮತ್ತು ಬೆಳ್ಳಿ ದರದಲ್ಲಿ ಮಿಶ್ರ ಚಿತ್ರಣ ಕಂಡುಬಂದಿದೆ. ಚಿನ್ನದ ಬೆಲೆ ಇಳಿಕೆಯತ್ತ ಸಾಗುತ್ತಿದ್ದರೆ, ಬೆಳ್ಳಿ ದರ ಏರಿಕೆಯಾಗುತ್ತಿರುವುದು ಗಮನಾರ್ಹವಾಗಿದೆ.ಒಂದು ಕೆಜಿ ಬೆಳ್ಳಿಯ ದರ ಇದೀಗ ₹2,75,000ಕ್ಕೆ ಏರಿಕೆಯಾಗಿದೆ. ಈ ಹಿಂದೆ ಗರಿಷ್ಠ ₹4.20 ಲಕ್ಷದವರೆಗೆ ಏರಿದ್ದ ಬೆಳ್ಳಿ ದರ ಬಳಿಕ ₹2.50 ಲಕ್ಷದ ಮಟ್ಟಕ್ಕೆ ಇಳಿಕೆಯಾಗಿತ್ತು. ಆದರೆ ಮೇ ಆರಂಭದಿಂದಲೇ ಬೆಳ್ಳಿ ಮತ್ತೆ ಏರಿಕೆಯ ಹಾದಿ ಹಿಡಿದಿದೆ.

ಮೇ 1ರಂದು ₹5,000 ಹಾಗೂ ಮೇ 2ರಂದು ₹10,000 ಏರಿಕೆ ಕಂಡಿದ್ದ ಬೆಳ್ಳಿ, ಕೆಲ ದಿನ ಸ್ಥಿರವಾಗಿತ್ತು. ಬಳಿಕ ಮೇ 5ರಂದು ₹10,000 ಇಳಿಕೆಯಾಗಿದ್ದರೂ, ಮೇ 6, 7 ಮತ್ತು 8ರಂದು ಮತ್ತೆ ಏರಿಕೆ ದಾಖಲಿಸಿತು.ಇನ್ನೊಂದೆಡೆ, ಚಿನ್ನದ ದರದಲ್ಲಿ ನಿರಂತರ ಏರಿಳಿತ ಮುಂದುವರಿದಿದೆ. ರಾಜಕೀಯ ಅನಿಶ್ಚಿತತೆ, ಕೊಲ್ಲಿ ರಾಷ್ಟ್ರಗಳ ಯುದ್ಧ ಪರಿಸ್ಥಿತಿ, ಡಾಲರ್ ಮೌಲ್ಯ ಕುಸಿತ ಸೇರಿದಂತೆ ಜಾಗತಿಕ ಬೆಳವಣಿಗೆಗಳು ಚಿನ್ನದ ಮಾರುಕಟ್ಟೆ ಮೇಲೆ ಪ್ರಭಾವ ಬೀರುತ್ತಿವೆ.
ಮೇ 1ರಂದು 22 ಕ್ಯಾರೆಟ್ 10 ಗ್ರಾಂ ಚಿನ್ನದ ದರ ₹195 ಇಳಿಕೆಯಾಗಿತ್ತು. ಮೇ 2ರಂದು ಸಣ್ಣ ಪ್ರಮಾಣದ ಏರಿಕೆ ಕಂಡುಬಂದರೂ, ನಂತರ ಮತ್ತೆ ಇಳಿಕೆಯ ಹಾದಿ ಮುಂದುವರಿಯಿತು. ಮೇ 8 ಮತ್ತು 9ರಂದು ತಲಾ ₹30 ಇಳಿಕೆಯಾದ ಬಳಿಕ, ಇಂದು ಮೇ 10ರಂದು ಚಿನ್ನದ ದರ ಸ್ಥಿರವಾಗಿದೆ.

ಪ್ರಸ್ತುತ 22 ಕ್ಯಾರೆಟ್ 10 ಗ್ರಾಂ ಚಿನ್ನದ ಬೆಲೆ ₹1,39,650 ಆಗಿದ್ದು, 24 ಕ್ಯಾರೆಟ್ 10 ಗ್ರಾಂ ಚಿನ್ನ ₹1,52,350ಕ್ಕೆ ಮಾರಾಟವಾಗುತ್ತಿದೆ. 18 ಕ್ಯಾರೆಟ್ ಚಿನ್ನದ ದರ ₹1,14,260 ಇದೆ.ಬೆಂಗಳೂರು, ಮುಂಬೈ, ಹೈದರಾಬಾದ್, ಕೊಲ್ಕತ್ತಾ ಸೇರಿದಂತೆ ಹಲವು ನಗರಗಳಲ್ಲಿ 22 ಕ್ಯಾರೆಟ್ ಒಂದು ಗ್ರಾಂ ಚಿನ್ನದ ದರ ₹13,965 ಇದೆ. ಚೆನ್ನೈನಲ್ಲಿ ₹14,150 ಹಾಗೂ ದೆಹಲಿಯಲ್ಲಿ ₹13,980 ದಾಖಲಾಗಿದೆ.
ಮಾರುಕಟ್ಟೆ ತಜ್ಞರ ಪ್ರಕಾರ ಮುಂದಿನ ವಾರ ಚಿನ್ನದ ದರದಲ್ಲಿ ದೊಡ್ಡ ಮಟ್ಟದ ಏರಿಕೆ ಸಂಭವಿಸುವ ಸಾಧ್ಯತೆ ಕಡಿಮೆ. ಹೀಗಾಗಿ ಮದುವೆ ಅಥವಾ ಹೂಡಿಕೆ ಉದ್ದೇಶದಿಂದ ಚಿನ್ನ ಖರೀದಿಸಲು ಇದು ಅನುಕೂಲಕರ ಸಮಯವಾಗಬಹುದು ಎಂದು ಅಭಿಪ್ರಾಯ ವ್ಯಕ್ತವಾಗಿದೆ.