ಮಾವನ ಹೆಸರಲ್ಲಿ ಇನ್ಶುರೆನ್ಸ್ ಮಾಡಿಸಿ, ಅಳಿಯನೇ ಕೊಂದು ಬಿಟ್ಟ : ದಾವಣಗೆರೆಯಲ್ಲೊಂದು ಭಯಾನಕ ಘಟನೆ..!

ಸುದ್ದಿಒನ್, ದಾವಣಗೆರೆ : ಹಣಕ್ಕಾಗಿ ಅದೆಷ್ಟೋ ಕೊಲೆಗಳು ನಡೆದು ಹೋಗಿವೆ. ಅದರಲ್ಲೂ ಇನ್ಶುರೆನ್ಸ್ ಹಣಕ್ಕಾಗಿ ಎಷ್ಟೋ ಜನ ಬದುಕಿದ್ದವರನ್ನು ಸಾಯಿಸಿದ್ದಾರೆ. ಈಗ ದಾವಣಗೆರೆಯಲ್ಲೂ ಅಂಥದ್ದೇ ಘಟನೆ ನಡೆದಿದೆ. ಮಾವನ ಹೆಸರಲ್ಲಿದ್ದ 40 ಲಕ್ಷ ಹಣ ಪಡೆಯಲು ಅಳಿಮಯ್ಯ ಕೊಲೆ ಮಾಡಿದ್ದಾನೆ. ಈಗ ಪೊಲೀಸರ ಅತಿಥಿಯಾಗಿ ಹಣವೂ ಇಲ್ಲ, ಜೀವನವೂ ಇಲ್ಲ ಎಂಬಂತೆ ಬದುಕನ್ನು ಮೂರಾಬಟ್ಟೆ ಮಾಡಿಕೊಂಡಿದೆ ಗ್ಯಾಂಗ್.

ಆಗಿದ್ದು ಇಷ್ಟು: ದುಗ್ಗೇಶ್ ದಾವಣಗೆರೆಯ ನಿವಾಸಿ. ಈತನಿಗೆ ಈಗ 32 ವರ್ಷ. ಹಣ್ಣಿನ ವ್ಯಪಾರ ಮಾಡಿಕೊಂಡಿದ್ದ. ಈತನ ಅಳಿಯ ಗಣೇಶ್, ಆಟೋ ಚಾಲಕನಾಗಿದ್ದ. ದುಗ್ಗೇಶ್ ಸಹೋದರ ಗೋಪಿ ಎಂಬಾತ ಗಣೇಶನ ಬಳಿ ಬಡ್ಡಿಗಾಗಿ ಒಂದು ಲಕ್ಷ ರೂಪಾಯಿ ಸಾಲ ಮಾಡಿದ್ದ. ಆದರೆ ಆ ಸಾಲ ತಿರೀಸಲಾಗದೆ ಓಡಿ ಹೋಗಿದ್ದ. ಆದರೂ ಗೋಪಿ ಹಾಗೂ ದುಗ್ಗೇಶ್ ಇಬ್ಬರು ಆತ್ಮೀಯರಾಗಿದ್ದರು ಎಂಬುದು ಗಣೇಶನಿಗೆ ಗೊತ್ತಿತ್ತು. ಹಣ ವಾಪಾಸ್ ನೀಡಲು ಹೇಳಿ ಎಂದು ಮಾವನಿಗೆ ಗಣೇಶ ಸಾಕಷ್ಟು ಸಲ ಹೇಳಿದ್ದ. ಆದರೆ ಹಣ ವಾಪಾಸ್ ಬಾರದೆ ಇದ್ದಾಗ ಗಣೇಶ್ ಬೇರೆಯದ್ದೇ ಪ್ಲ್ಯಾನ್ ಮಾಡಿದ್ದ.

ದುಗ್ಗೇಶ್ ದೊಡ್ಡ ಕುಡುಕನಾಗಿದ್ದ. ಈತನ ಹೆಸರಲ್ಲಿ ಲೈಫ್ ಇನ್ಶುರೆನ್ಸ್‌ ಮಾಡಿಸಿ, ಆಮೇಲೆ ಸಾಯಿಸಿ ಹಣವನ್ನು ತಮ್ಮದಾಗಿಸಿಕೊಳ್ಳುವ ಪ್ಲ್ಯಾನ್‌. ಅದರಂತೆ ಇನ್ಶುರೆನ್ಸ್ ಕೂಡ ತಾನೇ ಮಾಡಿಸಿದ. ನಾಮಿನಿ ತನ್ನ ಹೆಸರನ್ನು ನೀಡಿದ. ಬ್ಯಾಂಕ್ ಬುಕ್, ಚೆಕ್ ಎಲ್ಲವನ್ನು ತನ್ನ ಬಳಿ ಇಟ್ಟುಕೊಂಡ. ತನ್ನ ಸ್ನೇಹಿತರಾದ ಅನಿಲ್, ಶಿವಕುಮಾರ್, ಮಾರುತಿ ಜೊತೆಗೆ ಸೇರಿ ಕೊಲೆ ಮಾಡಿ, ಮನೆಗೆ ತಂದು ಹಾಕಿದ. ಇದೀಗ ಇನ್ಶುರೆನ್ಸ್ ಹಣ ಪಡೆಯುವುದಕ್ಕೂ ಮುನ್ನವೇ ಅಜಾದ್ ನಗರ ಪೊಲೀಸರಿಗೆ ನಾಲ್ಕು ಜನ ಅತಿಥಿಗಳಾಗಿದ್ದಾರೆ.

ಈ ಬಗ್ಗೆ ಮಾತನಾಡಿರುವ ಅಜಾದ್ ನಗರ ಠಾಣೆಯ ಪಿಐ ಅಶ್ವಿನ್ ಕುಮಾರ್ ಅವರು, ಆರೋಪಿ ಗಣೇಶ್ ಇನ್ಶುರೆನ್ಸ್ ಬಾಂಡ್ ಮಾಡಿಸಿ 40 ಲಕ್ಷ ರೂಪಾಯಿ ಹಣದ ಆಸೆಗಾಗಿ ಕೊಲೆ ಮಾಡಿರುವುದಾಗಿ ಒಪ್ಪಿಕೊಂಡಿದ್ದಾರೆ. ಈಗಾಗಲೇ ಎಫ್ಐಆರ್ ದಾಖಲು ಮಾಡಿ ನಾಲ್ವರನ್ನು ಬಂಧಿಸಲಾಗಿದೆ ಎಂದಿದ್ದಾರೆ.