ಬೆಂಗಳೂರು: ದೇಶದ ಹೆಮ್ಮೆಯ ಸ್ವದೇಶಿ ವಾಚ್ ಬ್ರ್ಯಾಂಡ್ ಹೆಚ್ಎಂಟಿ (HMT) ಮೇಲಿನ ಕನ್ನಡಿಗರ ಹಾಗೂ ವಾಚ್ ಪ್ರಿಯರ ಅಭಿಮಾನ ಮತ್ತೊಮ್ಮೆ ಸಾಬೀತಾಗಿದೆ. ಸ್ವಾತಂತ್ರ್ಯೋತ್ಸವದ ಅಂಗವಾಗಿ HMT ಬಿಡುಗಡೆ ಮಾಡಿರುವ ಕನ್ನಡ ಅಂಕಿಗಳಿರುವ ವಿಶೇಷ ಆವೃತ್ತಿಯ ಕೈಗಡಿಯಾರಕ್ಕೆ ಭಾರೀ ಬೇಡಿಕೆ ವ್ಯಕ್ತವಾಗಿದ್ದು, ಬೆಂಗಳೂರಿನ ಜಾಲಹಳ್ಳಿ ಮಳಿಗೆ ಎದುರು ಗ್ರಾಹಕರು ಕಿಲೋಮೀಟರ್ಗಟ್ಟಲೆ ಸರತಿ ಸಾಲಿನಲ್ಲಿ ನಿಂತು ವಾಚ್ ಖರೀದಿಸಿದ್ದಾರೆ.
ಕನ್ನಡ ಅಂಕಿಗಳೊಂದಿಗೆ ‘ಗಂಡಭೇರುಂಡ’ ಎಂಬ ಕನ್ನಡ ಬರಹ ಹಾಗೂ ಭಾರತೀಯ ಸಂಸ್ಕೃತಿಯ ಛಾಪು ಹೊಂದಿರುವ ಈ ವಿಶೇಷ ವಾಚ್ ಅನ್ನು ಸ್ವಾತಂತ್ರ್ಯೋತ್ಸವದ ಸಂದರ್ಭದಲ್ಲಿ ಬಿಡುಗಡೆ ಮಾಡಲಾಗಿದೆ. ಬಿಡುಗಡೆಯಾದ ಕೆಲವೇ ಗಂಟೆಗಳಲ್ಲಿ ಭಾರೀ ಬೇಡಿಕೆ ವ್ಯಕ್ತವಾಗಿದ್ದು, ದಾಸ್ತಾನು ಬಹುತೇಕ ಖಾಲಿಯಾಗಿದೆ.ಈ ವಿಶೇಷ ಆವೃತ್ತಿಯ ವಾಚ್ ಆರಂಭದಲ್ಲಿ ₹1,925 ಬೆಲೆಗೆ ಮಾರಾಟವಾಗುತ್ತಿತ್ತು ಎನ್ನಲಾಗಿದ್ದು, ಆನ್ಲೈನ್ನಲ್ಲಿಯೂ ಸ್ಟಾಕ್ ಶೀಘ್ರದಲ್ಲೇ ಮುಗಿದಿದೆ. ಮತ್ತೆ ಮಾರುಕಟ್ಟೆಗೆ ಲಭ್ಯವಾಗುವ ನಿರೀಕ್ಷೆಯ ನಡುವೆ ಇದರ ಬೆಲೆ ₹2,500ಕ್ಕೆ ಏರಿಕೆಯಾಗಿದೆ ಎಂಬ ಮಾಹಿತಿ ಹರಿದಾಡುತ್ತಿದೆ. ಬೆಲೆ ಹೆಚ್ಚಾದರೂ ವಾಚ್ ಮೇಲಿನ ಬೇಡಿಕೆ ಮಾತ್ರ ಕಡಿಮೆಯಾಗಿಲ್ಲ.
ಬೆಂಗಳೂರಿನ ಜಾಲಹಳ್ಳಿಯಲ್ಲಿರುವ HMT ಸೇಲ್ಸ್ ಶೋರೂಂ ಮುಂದೆ ಮುಂಜಾನೆಯಿಂದಲೇ ನೂರಾರು ಗ್ರಾಹಕರು ಹಾಗೂ ವಾಚ್ ಕಲೆಕ್ಟರ್ಗಳು ಜಮಾಯಿಸಿದ್ದರು. ಸಮಯ ಕಳೆದಂತೆ ಜನರ ಸಂಖ್ಯೆ ಹೆಚ್ಚಾಗಿದ್ದು, ಸುಮಾರು ಎರಡು ಕಿಲೋಮೀಟರ್ಗೂ ಹೆಚ್ಚು ಉದ್ದದ ಸರತಿ ಸಾಲು ಕಂಡುಬಂದಿದೆ.ಯುವಕರು, ಹಿರಿಯರು ಸೇರಿದಂತೆ HMT ಅಭಿಮಾನಿಗಳು ಬಿಸಿಲನ್ನೂ ಲೆಕ್ಕಿಸದೆ ಗಂಟೆಗಟ್ಟಲೆ ಕಾದು ತಮ್ಮ ನೆಚ್ಚಿನ ವಾಚ್ ಖರೀದಿಸಲು ಮುಂದಾಗಿದ್ದಾರೆ.
ಈ ವಿಶೇಷ ಸರಣಿಯ ಪ್ರಮುಖ ಆಕರ್ಷಣೆ ಡಯಲ್ನಲ್ಲಿರುವ ಕನ್ನಡ ಅಂಕಿಗಳು. ಇದರೊಂದಿಗೆ ಗಂಡಭೇರುಂಡದ ಲಾಂಛನ ಹಾಗೂ ಭಾರತೀಯತೆಯ ಸಂಕೇತಗಳನ್ನು ವಿನ್ಯಾಸದಲ್ಲಿ ಬಳಸಲಾಗಿದೆ. ಹೀಗಾಗಿ ಇದು ಕೇವಲ ಕೈಗಡಿಯಾರವಾಗಿರದೆ, ಕನ್ನಡ ಮತ್ತು ಭಾರತೀಯ ಸಂಸ್ಕೃತಿಯ ಮೇಲಿನ ಅಭಿಮಾನದ ಸಂಕೇತವಾಗಿಯೂ ವಾಚ್ ಪ್ರಿಯರನ್ನು ಸೆಳೆಯುತ್ತಿದೆ.ಲಿಮಿಟೆಡ್ ಎಡಿಷನ್ ವಾಚ್ ಎಂಬ ಕಾರಣಕ್ಕೆ ಸ್ಟಾಕ್ ಮುಗಿಯುವ ಮುನ್ನ ಖರೀದಿಸಬೇಕೆಂಬ ಉತ್ಸಾಹ ಗ್ರಾಹಕರಲ್ಲಿತ್ತು. ಪರಿಣಾಮವಾಗಿ ಮಳಿಗೆ ಎದುರು ಭಾರೀ ಜನದಟ್ಟಣೆ ಉಂಟಾಗಿದ್ದು, ಯಾವುದೇ ನೂಕುನುಗ್ಗಲು ನಡೆಯದಂತೆ HMT ಭದ್ರತಾ ಸಿಬ್ಬಂದಿ ಹಾಗೂ ಸಿಬ್ಬಂದಿ ಜನರನ್ನು ನಿಯಂತ್ರಿಸಲು ಹರಸಾಹಸಪಟ್ಟರು.
ಇಂದು ಸ್ಮಾರ್ಟ್ವಾಚ್ಗಳು ಹಾಗೂ ಡಿಜಿಟಲ್ ಗ್ಯಾಜೆಟ್ಗಳ ಯುಗವಾಗಿದ್ದರೂ, ದಶಕಗಳ ಇತಿಹಾಸ ಹೊಂದಿರುವ HMT ಮೇಲಿನ ಜನರ ಪ್ರೀತಿ ಇನ್ನೂ ಕಡಿಮೆಯಾಗಿಲ್ಲ ಎಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದೆ. ವಿಶೇಷವಾಗಿ ಕನ್ನಡ ಅಂಕಿಗಳು ಮತ್ತು ಭಾರತೀಯ ವಿನ್ಯಾಸದೊಂದಿಗೆ ಬಂದಿರುವ ವಾಚ್ಗೆ ದೊರೆತ ಅಭೂತಪೂರ್ವ ಪ್ರತಿಕ್ರಿಯೆ, HMTಯ ಗತವೈಭವದ ಕ್ರೇಜ್ ಇಂದಿಗೂ ಜೀವಂತವಾಗಿದೆ ಎಂಬುದನ್ನು ತೋರಿಸಿದೆ.
