ಮಕ್ಕಳ ಬೆಳವಣಿಗೆಗೆ ರಾತ್ರಿ ಎಷ್ಟು ಗಂಟೆಗೆ ನಿದ್ರಿಸಬೇಕು?

ಮಕ್ಕಳ ನಿದ್ರೆ ಅವರ ದೈಹಿಕ ಮತ್ತು ಮಾನಸಿಕ ಬೆಳವಣಿಗೆಯ ಮೇಲೆ ನೇರ ಪರಿಣಾಮ ಬೀರುತ್ತದೆ. ಮಕ್ಕಳು ಕಡಿಮೆ ಸಮಯ ನಿದ್ರಿಸಿದರೆ ಅಥವಾ ತಡವಾಗಿ ಮಲಗಿದರೆ, ಅದು ಅವರ ಒಟ್ಟಾರೆ ವಿಕಾಸವನ್ನು ಕುಂಠಿತಗೊಳಿಸುತ್ತದೆ. ನಿದ್ರೆಯು ಮಗುವಿನ ಕಲಿಕಾ ಸಾಮರ್ಥ್ಯ, ರೋಗನಿರೋಧಕ ಶಕ್ತಿ, ಆತ್ಮವಿಶ್ವಾಸ ಹಾಗೂ ಮಾನಸಿಕ ಆರೋಗ್ಯದ ಮೇಲೆ ಅಪಾರ ಪ್ರಭಾವ ಬೀರುತ್ತದೆ ಎಂದು ಮಕ್ಕಳ ತಜ್ಞರು ಹೇಳಿದ್ದಾರೆ.

ಮಕ್ಕಳು ರಾತ್ರಿ 9 ರಿಂದ 10 ಗಂಟೆಯೊಳಗೆ ಮಲಗುವುದು ಅತ್ಯಂತ ಸೂಕ್ತ. ಈ ಸಮಯದಲ್ಲಿ ದೇಹದಲ್ಲಿ ‘ಗ್ರೋಥ್ ಹಾರ್ಮೋನ್’ (ಬೆಳವಣಿಗೆಯ ಹಾರ್ಮೋನ್) ಸ್ರವಿಸುವಿಕೆಯು ಗರಿಷ್ಠ ಮಟ್ಟದಲ್ಲಿ (Peak) ಇರುತ್ತದೆ. ಇದು ಮಕ್ಕಳ ಸ್ನಾಯುಗಳ ಬೆಳವಣಿಗೆ ಹಾಗೂ ಮಾನಸಿಕ ವಿಕಾಸಕ್ಕೆ ಅತ್ಯಂತ ಅಗತ್ಯವಾಗಿದೆ. ಮಗು ಗಾಢ ನಿದ್ರೆಯಲ್ಲಿದ್ದಾಗ ಮಾತ್ರ ಈ ಹಾರ್ಮೋನ್ ಹೆಚ್ಚು ಉತ್ಪತ್ತಿಯಾಗುತ್ತದೆ ಎಂದು ಅಧ್ಯಯನಗಳು ನಿರೂಪಿಸಿವೆ.

ನಿಮ್ಮ ಮಗು ರಾತ್ರಿ ತಡವಾಗಿ ಮಲಗಿ ಬೆಳಿಗ್ಗೆ ತಡವಾಗಿ ಏಳುವ ಅಭ್ಯಾಸ ಹೊಂದಿದ್ದರೆ, ತಕ್ಷಣ ಆ ಅಭ್ಯಾಸವನ್ನು ಬದಲಾಯಿಸುವುದು ಒಳಿತು.

ತಡವಾಗಿ ಮಲಗುವುದರಿಂದಾಗುವ ತೊಂದರೆಗಳು:

ಬುದ್ಧಿಮತ್ತೆ ಮತ್ತು ಏಕಾಗ್ರತೆ: ನಿದ್ರೆಯ ಕೊರತೆಯಿಂದ ಮಗುವಿಗೆ ಕಲಿಯಲು ಮತ್ತು ಏಕಾಗ್ರತೆ ವಹಿಸಲು ಕಷ್ಟವಾಗುತ್ತದೆ.

ವರ್ತನೆಯಲ್ಲಿ ಬದಲಾವಣೆ: ದಿನವಿಡೀ ಕಿರಿಕಿರಿ ಅನುಭವಿಸುವುದು ಮತ್ತು ನಡವಳಿಕೆಯಲ್ಲಿ ನಕಾರಾತ್ಮಕ ಬದಲಾವಣೆಗಳು ಕಂಡುಬರುತ್ತವೆ.

ಮಾನಸಿಕ ಆರೋಗ್ಯ: ನಿದ್ರೆಯ ಅಭಾವದಿಂದ ಮಕ್ಕಳಲ್ಲಿ ಖಿನ್ನತೆ (Depression) ಮತ್ತು ಆತಂಕದ (Anxiety) ಲಕ್ಷಣಗಳು ಗೋಚರಿಸಬಹುದು.

ಆರೋಗ್ಯದ ಮೇಲೆ ಪ್ರಭಾವ: ರೋಗನಿರೋಧಕ ಶಕ್ತಿ ಕುಂದುತ್ತದೆ.

ವಯಸ್ಸಿಗೆ ಅನುಗುಣವಾಗಿ ಮಕ್ಕಳು ಮಲಗಬೇಕಾದ ಸರಿಯಾದ ಸಮಯ:

0 ಯಿಂದ 6 ತಿಂಗಳ ಮಗು: ರಾತ್ರಿ 8:00 ಗಂಟೆಗೆ

6 ರಿಂದ 12 ತಿಂಗಳ ಮಗು: ಸಂಜೆ 6:30 ರಿಂದ 7:30 ರ ನಡುವೆ

1 ರಿಂದ 2 ವರ್ಷದ ಮಕ್ಕಳು: ಸಂಜೆ 7:00 ಗಂಟೆಗೆ

3 ರಿಂದ 5 ವರ್ಷದ ಮಕ್ಕಳು: ರಾತ್ರಿ 8:00 ಗಂಟೆಗೆ

6 ರಿಂದ 13 ವರ್ಷದ ಮಕ್ಕಳು: ರಾತ್ರಿ 9:00 ಗಂಟೆಗೆ

14 ರಿಂದ 17 ವರ್ಷದ ಹದಿಹರೆಯದವರು: ರಾತ್ರಿ 10:00 ಗಂಟೆಗೆ

ಮಕ್ಕಳು ರಾತ್ರಿ 9 ರಿಂದ 10 ಗಂಟೆಯೊಳಗೆ ಮಲಗಿದರೆ, ಬೆಳಿಗ್ಗೆ 7 ಗಂಟೆಯ ಸುಮಾರಿಗೆ ಏಳಬಹುದು. ಇದರಿಂದ ಅವರಿಗೆ ದಿನಕ್ಕೆ ಅಗತ್ಯವಿರುವ 8 ರಿಂದ 10 ಗಂಟೆಗಳ ಕಾಲ ಸುಖಕರ ನಿದ್ರೆ ದೊರೆಯುತ್ತದೆ.