ಹೊಳಲ್ಕೆರೆ : ಕೊಳಾಳು ಗ್ರಾಮದ ಪುರಾತನ ಬಯಲು ಶಿವಲಿಂಗಕ್ಕೆ ಮಂಡಲ ಪೂಜೆ ಸಂಪನ್ನ: ಉತ್ತಮ ಮಳೆಗಾಗಿ ವಿಶೇಷ ಪ್ರಾರ್ಥನೆ

ಸುದ್ದಿಒನ್, ಹೊಳಲ್ಕೆರೆ, ಸೆಪ್ಟೆಂಬರ್. 29 : ತಾಲ್ಲೂಕಿನ ಗಡಿಕೊಳಾಳು ಗ್ರಾಮದ ಕೆರೆ ಹಿಂಭಾಗದಲ್ಲಿರುವ ಅತ್ಯಂತ ಪುರಾತನ ಬಯಲು ಶಿವಲಿಂಗಕ್ಕೆ ಉತ್ತಮ ಮಳೆ-ಬೆಳೆ ಹಾಗೂ ಲೋಕಕಲ್ಯಾಣಕ್ಕಾಗಿ ಹಮ್ಮಿಕೊಳ್ಳಲಾಗಿದ್ದ 48 ದಿನಗಳ ‘ಮಂಡಲ ಪೂಜೆ’ಯು ಮಂಗಳವಾರ ತೇಕಲವಟ್ಟಿ ಶ್ರೀ ಸಂಗಮೇಶ್ವರ ಸ್ವಾಮಿಗಳ ಅಮೃತ ಹಸ್ತದಿಂದ ಭಕ್ತಿಭಾವದೊಂದಿಗೆ ಸುಸಂಪನ್ನವಾಯಿತು.

ಕಳೆದ ಆಗಸ್ಟ್ 13ರಂದು ಗುರುವಾರ ಆರಂಭಗೊಂಡಿದ್ದ ಈ ಮಂಡಲ ಮಹೋತ್ಸವದಲ್ಲಿ ನಿತ್ಯವೂ ಮುಂಜಾನೆ 4:30ರಿಂದ 6:00 ಗಂಟೆಯ ಅವಧಿಯಲ್ಲಿ ಶಿವಲಿಂಗಕ್ಕೆ ವಿಶೇಷ ಅಭಿಷೇಕ, ಬಿಲ್ವಾರ್ಚನೆ, ನೈವೇದ್ಯ ಹಾಗೂ ಫಲಾಹಾರ ಮೊದಲಾದ ಧಾರ್ಮಿಕ ವಿಧಿವಿಧಾನಗಳನ್ನು ಅತ್ಯಂತ ಶ್ರದ್ಧಾ-ಭಕ್ತಿಗಳಿಂದ ನೆರವೇರಿಸಿಕೊಂಡು ಬರಲಾಯಿತು. ಮಂಗಳವಾರ ಮುಕ್ತಾಯದ ಅಂಗವಾಗಿ ಮಹಾ ರುದ್ರಾಭಿಷೇಕ, ವಿಶೇಷ ಅಲಂಕಾರ, ಅಖಂಡ ಭಜನೆ ಹಾಗೂ ಅನ್ನದಾಸೋಹ ಕಾರ್ಯಕ್ರಮಗಳು ವಿಜೃಂಭಣೆಯಿಂದ ಜರುಗಿದವು.

ಈ ಸುದೀರ್ಘ ಮಂಡಲ ಕಾಲದ ಪೂಜಾ ಕೈಂಕರ್ಯಗಳನ್ನು ದೊಡ್ಡಮನೆ ಗದ್ದುಗೆಯ ಆರ್. ಸಿದ್ದಪ್ಪನವರು ನಿಷ್ಠೆಯಿಂದ ಮುನ್ನಡೆಸಿಕೊಟ್ಟರು. ಇವರಿಗೆ ಹೊಳೆಯಪ್ಪರ ಎಚ್. ಜಯಪ್ರಕಾಶ, ಆರ್. ಸಿದ್ಧಪ್ಪ, ಕೆ.ಎಸ್. ನಾಗರಾಜು, ಮಧುರೆ ಕೆ. ಕೆಂಚಪ್ಪ, ಗ್ರಾಮದ ಯಜಮಾನರಾದ ಮುತ್ತಜ್ಜರ ನಾಗಪ್ಪ, ಬಡಪ್ಪರ ಕೃಷ್ಣಮೂರ್ತಿ, ಜನಾರ್ದನಪ್ಪ, ಅಂಗಡಿ ಲೋಕೇಶ್, ತೇಕಲವಟ್ಟಿ ಶಿವಣ್ಣ, ಯಾದವರಹಟ್ಟಿ ನಿಂಗಪ್ಪ, ಮುಂದಲ ಮನೆ ರಾಮಣ್ಣ, ಗೋವಿಂದಪ್ಪ ಮೇಷ್ಟ್ರು, ಓಬಳೇಶಪ್ಪ ಮೇಷ್ಟ್ರು, ಪೂಜಾರಿ ಉಗ್ರಪ್ಪ, ಮಡಿವಾಳಿ ಶಿವಣ್ಣ, ಪೋಸ್ಟ್ ಕೆಂಚಪ್ಪ, ಗದ್ದಿಗೆ ಬಸವರಾಜ್ ಹಾಗೂ ಮ್ಯಾನೇಜರ್ ದಯಾನಂದ ಸೇರಿದಂತೆ ಹಲವು ಪ್ರಮುಖರು ಕಾರ್ಯಕ್ರಮದ ಯಶಸ್ಸಿಗೆ ಹೆಗಲುಕೊಟ್ಟರು. ಈ ಸಂದರ್ಭದಲ್ಲಿ 48 ದಿನಗಳ ಕಾಲ ಶ್ರಮಿಸಿದ ಎಲ್ಲ ಭಕ್ತರ ಹಾಗೂ ಸೇವಾಕರ್ತರ ಸೇವೆಯನ್ನು ಗೌರವಪೂರ್ವಕವಾಗಿ ಸ್ಮರಿಸಲಾಯಿತು.

ಕಾರ್ಯಕ್ರಮದ ಅಂಗವಾಗಿ ರಾತ್ರಿ ನಡೆದ ಅಹೋರಾತ್ರಿ ಭಜನಾ ಕಾರ್ಯಕ್ರಮದಲ್ಲಿ ಕೆನ್ನೆಡಲು ಪರಶುರಾಮಣ್ಣ, ಮಲ್ಲರಸನಹಟ್ಟಿ ಮಲ್ಲಣ್ಣ, ಕೆ.ಸಿ. ರೊಪ್ಪದ ರಂಗಸ್ವಾಮಿ, ಕೊಳಾಳು ಭಜನೆ ನಿಂಗಪ್ಪ ಮುಂತಾದ ಖ್ಯಾತ ಭಜನಾ ಕಲಾವಿದರು ಶಿವನಾಮ ಸ್ಮರಣೆ ಗೀತೆಗಳನ್ನು ಪ್ರಸ್ತುತಪಡಿಸಿ ನೆರೆದಿದ್ದ ಭಕ್ತರನ್ನು ಭಕ್ತಿ ಸಾಗರದಲ್ಲಿ ತೇಲಿಸಿದರು. ಇಂದು ಮುಂಜಾನೆ ಮಹಾಮಂಗಳಾರತಿ ಹಾಗೂ ಭವ್ಯ ಅನ್ನದಾಸೋಹದೊಂದಿಗೆ ಪೂಜಾ ಮಹೋತ್ಸವಕ್ಕೆ ತೆರೆಬಿದ್ದಿತು. ಈ ಧಾರ್ಮಿಕ ಸಂಭ್ರಮದಲ್ಲಿ ಕೊಳಾಳು ಗ್ರಾಮಸ್ಥರು, ಮಹಿಳೆಯರು, ಮಕ್ಕಳು, ಎರಡೂ ಗೊಲ್ಲರಹಟ್ಟಿಯ ನಿವಾಸಿಗಳು ಹಾಗೂ ಸುತ್ತಮುತ್ತಲಿನ ನೂರಾರು ಭಕ್ತಾದಿಗಳು ಪಾಲ್ಗೊಂಡು ದೇವರ ಕೃಪೆಗೆ ಪಾತ್ರರಾದರು.