ಪ್ಲಂಬರ್, ಎಲೆಕ್ಟ್ರಿಷಿಯನ್ ಕೂಡ ಸೇಫ್ ಇಲ್ಲ: ಉದ್ಯೋಗಗಳ ಮೇಲೆ ಭೀತಿ ಮೂಡಿಸಿದ ಎಐ ಕುರಿತ ಹೊಸ ವರದಿ!

ಸುದ್ದಿಒನ್,ಬೆಂಗಳೂರು,ಜೂನ್.02: 2022ರಲ್ಲಿ ಓಪನ್‌ ಎಐ (OpenAI) ಸಂಸ್ಥೆಯು ಚಾಟ್‌ಜಿಪಿಟಿ (ChatGPT) ಬಿಡುಗಡೆ ಮಾಡಿದ ನಂತರ ಕೃತಕ ಬುದ್ಧಿಮತ್ತೆ (AI) ಯುಗ ಅತ್ಯಂತ ವೇಗವಾಗಿ ಬೆಳೆಯುತ್ತಿದೆ. ಈ ಹಿಂದೆ ತಜ್ಞರು ಅಂದಾಜಿಸಿದ್ದಕ್ಕಿಂತಲೂ ಹತ್ತು ಪಟ್ಟು ವೇಗವಾಗಿ ಎಐ ತಂತ್ರಜ್ಞಾನವು ಜಾಗತಿಕ ಉದ್ಯೋಗ ಮಾರುಕಟ್ಟೆಯನ್ನು ಆವರಿಸಿಕೊಳ್ಳುತ್ತಿದೆ ಎಂದು ಹೊಸ ಅಧ್ಯಯನವೊಂದು ಎಚ್ಚರಿಸಿದೆ.

2023ರ ಕಾಸ್ನಿಜೆಂಟ್ (Cognizant) ವರದಿಯೊಂದು, 2032ರ ವೇಳೆಗೆ ಶೇಕಡಾ 90 ರಷ್ಟು ಉದ್ಯೋಗಗಳ ಮೇಲೆ ಜನರೇಟಿವ್ ಎಐ ಪ್ರಭಾವ ಬೀರಬಹುದು ಎಂದು ಹೇಳಿತ್ತು. ಆದರೆ, ಈಗ ಪರಿಸ್ಥಿತಿ ಸಂಪೂರ್ಣ ಬದಲಾಗಿದೆ. ಕೇವಲ ಮೂರೇ ವರ್ಷಗಳಲ್ಲಿ, ಅಂದರೆ 2026ರ ವೇಳೆಗೆ ಶೇಕಡಾ 93 ರಷ್ಟು ಉದ್ಯೋಗಗಳು ಎಐ ಸಾಮರ್ಥ್ಯದ ವ್ಯಾಪ್ತಿಗೆ ಬಂದಿದ್ದು, ಅದರಲ್ಲಿ ಶೇಕಡಾ 30 ರಷ್ಟು ಉದ್ಯೋಗಗಳು ತಮ್ಮ ಅಸ್ತಿತ್ವದ ಭೀತಿಯನ್ನು ಎದುರಿಸುತ್ತಿವೆ ಎಂದು ಕಾಸ್ನಿಜೆಂಟ್‌ನ ಹೊಸ ವರದಿ ಬಹಿರಂಗಪಡಿಸಿದೆ.

ಯಾರೂ ಸುರಕ್ಷಿತರಲ್ಲ!
ಸಾಮಾನ್ಯವಾಗಿ ಎಐ ತಂತ್ರಜ್ಞಾನವು ಕೇವಲ ಕೋಡಿಂಗ್ ಅಥವಾ ಸೇವಾ ವಲಯದಂತಹ ಕಚೇರಿ ಕೆಲಸಗಳಿಗೆ ಮಾತ್ರ ಸೀಮಿತ ಎಂದು ಭಾವಿಸಲಾಗಿತ್ತು. ಆದರೆ, ಕಾಸ್ನಿಜೆಂಟ್‌ನ ಸಂಶೋಧನಾ ವಿಭಾಗದ ಮುಖ್ಯಸ್ಥ ಓಲಿ ಓ’ಡೊನೊಗ್ಯು (Ollie O’Donoghue) ಪ್ರಕಾರ, “ಈಗ ಯಾರೂ ಸುರಕ್ಷಿತರಲ್ಲ.” ಕೊಳಾಯಿ ದುರಸ್ತಿ ಮಾಡುವ ಪ್ಲಂಬರ್‌ಗಳು ಮತ್ತು ಎಲೆಕ್ಟ್ರಿಷಿಯನ್‌ಗಳ ಉದ್ಯೋಗಗಳು ಕೂಡ ಎಐ ಯುಗಕ್ಕೆ ತಕ್ಕಂತೆ ಬದಲಾಗಬೇಕಾಗುತ್ತದೆ ಎಂದು ಅವರು ಹೇಳಿದ್ದಾರೆ.

ಪೈಪ್ ರಿಪೇರಿ ಮಾಡಲು ಮನುಷ್ಯನೇ ಬೇಕಾಗಬಹುದು, ಆದರೆ ಅದಕ್ಕೂ ಮುನ್ನ ಮಾಡಬೇಕಾದ ತಪಾಸಣೆ, ಸಮಸ್ಯೆ ಪತ್ತೆ ಹಚ್ಚುವುದು (Diagnosis) ಮತ್ತು ಬಿಲ್ ಸಿದ್ಧಪಡಿಸುವ ಕೆಲಸಗಳನ್ನು ಎಐ ಮಾಡಲಿದೆ. ಉದಾಹರಣೆಗೆ, ಮಲ್ಟಿಮೋಡಲ್ ಎಐ ತಂತ್ರಜ್ಞಾನವು ಗೋಡೆಯ ಮೇಲಿನ ತೇವಾಂಶವನ್ನು ನೋಡಿ, ಪೈಪ್ ಎಲ್ಲಿ ಸೋರುತ್ತಿದೆ ಎಂಬುದನ್ನು ಪತ್ತೆ ಹಚ್ಚಿ, ಅದಕ್ಕೆ ತಗಲುವ ವೆಚ್ಚ ಮತ್ತು ಬಿಲ್ ಅನ್ನು ತಾನಾಗಿಯೇ ಸಿದ್ಧಪಡಿಸಬಲ್ಲದು,” ಎಂದು ವರದಿ ವಿವರಿಸಿದೆ.

ಆದಾಗ್ಯೂ, ಈ ವರ್ಷದ ಮಾರ್ಚ್‌ನಲ್ಲಿ ಆಂಥ್ರೋಪಿಕಲ್ (Anthropic) ಸಂಸ್ಥೆ ನಡೆಸಿದ ಅಧ್ಯಯನವೊಂದು, ಇನ್‌ಸ್ಟಾಲೇಶನ್ ಮತ್ತು ರಿಪೇರಿ ಕೆಲಸಗಳು ಸೇರಿದಂತೆ ಸುಮಾರು 22 ವೃತ್ತಿಗಳಿಗೆ ಎಐನಿಂದ ಯಾವುದೇ ಅಪಾಯವಿಲ್ಲ ಎಂದು ಹೇಳಿರುವುದನ್ನು ಇಲ್ಲಿ ಗಮನಿಸಬಹುದು.

ಬಿಲಿಯನ್ ಗಟ್ಟಲೆ ನಷ್ಟದ ಭೀತಿ ಮತ್ತು ಲೇ-ಆಫ್ಸ್
ವರದಿಯ ಪ್ರಕಾರ, ಉದ್ಯೋಗಗಳ ಮೇಲಿನ ಎಐ ಪ್ರಭಾವದ ತೀವ್ರತೆಯು ಈ ಹಿಂದೆ ಅಂದಾಜಿಸಿದ್ದಕ್ಕಿಂತ ಶೇಕಡಾ 30 ರಷ್ಟು ಹೆಚ್ಚಾಗಿದೆ. ಕೇವಲ ಅಮೆರಿಕ ಒಂದರಲ್ಲೇ ಸುಮಾರು 4.5 ಟ್ರಿಲಿಯನ್ ಡಾಲರ್ ಮೌಲ್ಯದ ಮಾನವ ಶ್ರಮವು ಎಐ ಪಾಲಾಗುವ ಸಾಧ್ಯತೆಯಿದೆ.

ಮತ್ತೊಂದೆಡೆ, ಜಾಗತಿಕ ತಂತ್ರಜ್ಞಾನ ಸಂಸ್ಥೆಗಳಲ್ಲಿ ಉದ್ಯೋಗ ಕಡಿತ (Layoffs) ಮುಂದುವರಿದಿದೆ. Layoffs.fyi ಮಾಹಿತಿ ಪ್ರಕಾರ, 2025 ರಲ್ಲಿ 1,24,636 ಉದ್ಯೋಗಿಗಳು ಕೆಲಸ ಕಳೆದುಕೊಂಡಿದ್ದರೆ, 2026 ರ ಈ ಅವಧಿಯಲ್ಲೇ ಮೆಟಾ, ಒರಾಕಲ್, ಅಮೆಜಾನ್ ಸೇರಿದಂತೆ ಹಲವು ಕಂಪನಿಗಳಿಂದ ಈಗಾಗಲೇ 1,15,907 ಕ್ಕೂ ಹೆಚ್ಚು ನೌಕರರನ್ನು ವಜಾಗೊಳಿಸಲಾಗಿದೆ.

ಹೊಸ ಉದ್ಯೋಗ ಸೃಷ್ಟಿಯ ಭರವಸೆ
ಒಂದೆಡೆ ಉದ್ಯೋಗ ನಷ್ಟದ ಭೀತಿ ಇದ್ದರೆ, ಮತ್ತೊಂದೆಡೆ ಎಐ ಹೊಸ ಅವಕಾಶಗಳನ್ನು ಸೃಷ್ಟಿಸಲಿದೆ ಎಂಬ ಆಶಾವಾದವೂ ಇದೆ. ಕಾಸ್ನಿಜೆಂಟ್‌ನ ಎಐ ವಿಭಾಗದ ಮುಖ್ಯ ಬಿಸಿನೆಸ್ ಅಧಿಕಾರಿ ಸುಶಾಂತ್ ವಾರಿಕೂ ಪ್ರಕಾರ, ಎಐ ತಂತ್ರಜ್ಞಾನದಿಂದ ಹೊಸ ಮೌಲ್ಯದ ವಲಯಗಳು (Value Pools) ಸೃಷ್ಟಿಯಾಗಲಿದ್ದು, ಇದು ಸಾಮಾಜಿಕ-ಆರ್ಥಿಕ ಬೆಳವಣಿಗೆಗೆ ಕಾರಣವಾಗಿ ಹೊಸ ಉದ್ಯೋಗಗಳನ್ನು ಸೃಷ್ಟಿಸಲಿದೆ. ಆದರೆ ಇದಕ್ಕೆ ಕಂಪನಿಗಳು ತಮ್ಮ ಕಾರ್ಯವೈಖರಿಯನ್ನು ಬದಲಾಯಿಸಿಕೊಳ್ಳಬೇಕಾಗುತ್ತದೆ.

ಇದೇ ವಿಷಯವಾಗಿ ಎನ್‌ವಿಡಿಯಾ (Nvidia) ಸಂಸ್ಥೆಯ ಸಿಇಒ ಜೆನ್ಸನ್ ಹುವಾಂಗ್ ಪ್ರತಿಕ್ರಿಯಿಸಿದ್ದು, “ಎಐ ತಂತ್ರಜ್ಞಾನವು ಮನುಷ್ಯರ ಉದ್ಯೋಗಗಳನ್ನು ಕಸಿದುಕೊಳ್ಳುತ್ತದೆ ಎನ್ನುವ ವಾದವು ಸಂಪೂರ್ಣ ಸುಳ್ಳು” ಎಂದು ಅಭಿಪ್ರಾಯಪಟ್ಟಿದ್ದಾರೆ.