ಅತಿಯಾಗಿ ನೀರು ಕುಡಿಯುವುದು ಒಳ್ಳೆದಲ್ಲ, ಹೆಚ್ಚಾದರೆ ಕಾದಿದೆ ಪ್ರಾಣಾಪಾಯ

ದಿನಕ್ಕೆ ಕನಿಷ್ಠ 8 ರಿಂದ 10 ಲೋಟ ನೀರು ಕುಡಿಯಬೇಕು, ಹೆಚ್ಚು ನೀರು ಕುಡಿದರೆ ಆರೋಗ್ಯಕ್ಕೆ ಒಳ್ಳೆಯದು ಎಂಬ ಮಾತುಗಳನ್ನು ನಾವು ಸದಾ ಕೇಳುತ್ತಲೇ ಇರುತ್ತೇವೆ. ಆದರೆ, ಯಾವುದೇ ವಸ್ತು ಅತಿಯಾದರೆ ಅಮೃತವೂ ವಿಷವಾಗುತ್ತದೆ ಎಂಬ ಗಾದೆ ಮಾತು ನೀರಿಗೂ ಅನ್ವಯಿಸುತ್ತದೆ. ಹೌದು, ತಜ್ಞರ ಪ್ರಕಾರ ಅಗತ್ಯಕ್ಕಿಂತ ಹೆಚ್ಚು ನೀರು ಕುಡಿಯುವುದು ನಿಮ್ಮ ಆರೋಗ್ಯಕ್ಕೆ ತೀವ್ರ ಹಾನಿ ಉಂಟುಮಾಡಬಹುದು, ಕೆಲವೊಮ್ಮೆ ಇದು ಪ್ರಾಣಕ್ಕೆ ಕಂಟಕವಾಗುವ ಸಾಧ್ಯತೆಯೂ ಇರುತ್ತದೆ.

ಅತಿಯಾಗಿ ನೀರು ಕುಡಿಯುವುದರಿಂದ ದೇಹದಲ್ಲಿ ಎದುರಾಗುವ ಪ್ರಮುಖ ಆರೋಗ್ಯ ಸಮಸ್ಯೆಗಳ ವಿವರ ಇಲ್ಲಿದೆ:

ಹೈಪೋನಾಟ್ರೀಮಿಯಾ  ಅಪಾಯ

ನಾವು ಅತಿಯಾಗಿ ನೀರು ಕುಡಿದಾಗ, ನಮ್ಮ ರಕ್ತದಲ್ಲಿನ ಸೋಡಿಯಂ ಪ್ರಮಾಣವು ತೀವ್ರವಾಗಿ ಇಳಿಕೆಯಾಗುತ್ತದೆ. ಈ ಸ್ಥಿತಿಯನ್ನು ಹೈಪೋನಾಟ್ರೀಮಿಯಾ ಎಂದು ಕರೆಯಲಾಗುತ್ತದೆ. ಸೋಡಿಯಂ ನಮ್ಮ ದೇಹದಲ್ಲಿನ ದ್ರವದ ಸಮತೋಲನವನ್ನು ಕಾಯ್ದುಕೊಳ್ಳಲು ಸಹಾಯ ಮಾಡುತ್ತದೆ. ಇದರ ಮಟ್ಟ ಕಡಿಮೆಯಾದಾಗ ಜೀವಕೋಶಗಳು ಉಬ್ಬಲು ಪ್ರಾರಂಭಿಸುತ್ತವೆ.

ಮೆದುಳಿನ ಮೇಲೆ ಗಂಭೀರ ಪರಿಣಾಮ

ದೇಹದಲ್ಲಿ ಸೋಡಿಯಂ ಪ್ರಮಾಣ ಕಡಿಮೆಯಾಗಿ ಜೀವಕೋಶಗಳು ಉಬ್ಬಿದಾಗ, ಅದು ಮೆದುಳಿನ ಮೇಲೂ ಪರಿಣಾಮ ಬೀರುತ್ತದೆ. ಇದರಿಂದಾಗಿ ತೀವ್ರ ತಲೆನೋವು ಮತ್ತು ವಾಕರಿಕೆ, ಗೊಂದಲ ಅಥವಾ ಏಕಾಗ್ರತೆಯ ಕೊರತೆ,ಪರಿಸ್ಥಿತಿ ವಿಕೋಪಕ್ಕೆ ಹೋದರೆ ಮನುಷ್ಯ ಕೋಮಾ ಸ್ಥಿತಿಗೆ ತಲುಪಬಹುದು.

ನಮ್ಮ ದೇಹದಲ್ಲಿನ ಕಲ್ಮಶಗಳನ್ನು ಮತ್ತು ಹೆಚ್ಚುವರಿ ನೀರನ್ನು ಹೊರಹಾಕುವ ಕೆಲಸವನ್ನು ಮೂತ್ರಪಿಂಡಗಳು ಮಾಡುತ್ತವೆ. ಆದರೆ, ನಾವು ಮಿತಿಮೀರಿ ನೀರು ಕುಡಿದಾಗ ಕಿಡ್ನಿಗಳು ತಮ್ಮ ಸಾಮರ್ಥ್ಯಕ್ಕೂ ಮೀರಿ ಕೆಲಸ ಮಾಡಬೇಕಾಗುತ್ತದೆ. ಇದು ಕಿಡ್ನಿಗಳ ದಕ್ಷತೆಯನ್ನು ಕುಗ್ಗಿಸಿ, ದೀರ್ಘಾವಧಿಯಲ್ಲಿ ಕಿಡ್ನಿ ಸಮಸ್ಯೆಗೆ ಕಾರಣವಾಗಬಹುದು.

ಅತಿಯಾದ ನೀರು ಕುಡಿಯುವುದರಿಂದ ಹಾರ್ಮೋನ್‌ ಗಳ ಸಮತೋಲನ ಏರುಪೇರಾಗುತ್ತದೆ. ಇದು ದೇಹದಲ್ಲಿ ನಿರಂತರ ಆಯಾಸ, ದಣಿವು ಮತ್ತು ಸ್ನಾಯುಗಳ ದೌರ್ಬಲ್ಯಕ್ಕೆ ಕಾರಣವಾಗಬಹುದು.