ಡೇಟಾ ಸೆಂಟರ್ ಕ್ರಾಂತಿ: 2030ರ ವೇಳೆಗೆ ಭಾರತದಲ್ಲಿ 1 ಲಕ್ಷ ಉದ್ಯೋಗ ಸೃಷ್ಟಿ ಸಾಧ್ಯತೆ!

ಸುದ್ದಿಒನ್, ನವದೆಹಲಿ, : ಭಾರತದಲ್ಲಿ ವೇಗವಾಗಿ ಬೆಳೆಯುತ್ತಿರುವ ಡೇಟಾ ಸೆಂಟರ್ (ದತ್ತಾಂಶ ಕೇಂದ್ರ) ವಲಯವು ದೇಶದ ಅತಿ ದೊಡ್ಡ ಉದ್ಯೋಗ ಸೃಷ್ಟಿಕರ್ತ ಕ್ಷೇತ್ರವಾಗಿ ಹೊರಹೊಮ್ಮುತ್ತಿದೆ. ಬರುವ 2030ರ ವೇಳೆಗೆ ಈ ವಲಯದಲ್ಲಿ ಸುಮಾರು 1 ಲಕ್ಷ ನುರಿತ ವೃತ್ತಿಪರರಿಗೆ ಭಾರಿ ಬೇಡಿಕೆ ಸೃಷ್ಟಿಯಾಗಲಿದೆ ಎಂದು ಮಂಗಳವಾರ ಬಿಡುಗಡೆಯಾದ ವರದಿಯೊಂದು ತಿಳಿಸಿದೆ.

​ಎನ್‌ಎಲ್‌ಬಿ ಸರ್ವಿಸಸ್ (NLB Services) ಸಂಗ್ರಹಿಸಿರುವ ದತ್ತಾಂಶದ ಪ್ರಕಾರ, ಪ್ರಸ್ತುತ ಭಾರತದಲ್ಲಿರುವ ಡೇಟಾ ಸೆಂಟರ್ ಸಾಮರ್ಥ್ಯವು ಸುಮಾರು 1.5 ಗಿಗಾವ್ಯಾಟ್ (GW) ಇದ್ದು, ಈ ದಶಕದ ಅಂತ್ಯದ ವೇಳೆಗೆ (2030) ಇದು ಬರೋಬ್ಬರಿ 6.5 ಗಿಗಾವ್ಯಾಟ್‌ಗೆ ಏರಿಕೆಯಾಗುವ ಅಂದಾಜಿದೆ. ಅಷ್ಟೇ ಅಲ್ಲದೆ, ಇದರ ಮಾರುಕಟ್ಟೆ ಮೌಲ್ಯವು 22 ಬಿಲಿಯನ್ ಡಾಲರ್ ದಾಟುವ ನಿರೀಕ್ಷೆಯಿದೆ.

​ಹೂಡಿಕೆಯಲ್ಲಿ ಭಾರಿ ಏರಿಕೆ : 

​ಈ ರಂಗದಲ್ಲಿ ಈಗಾಗಲೇ ಸುಮಾರು 126 ಬಿಲಿಯನ್ ಡಾಲರ್‌ಗೂ ಅಧಿಕ ಸಂಚಿತ ಹೂಡಿಕೆಯಾಗಿದ್ದು, ದೇಶದಲ್ಲೇ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಮೂಲಸೌಕರ್ಯ ವಿಭಾಗಗಳಲ್ಲಿ ಇದು ಒಂದಾಗಿದೆ. ಆದರೆ, ಉದ್ಯಮದ ತಜ್ಞರು ಒಂದು ಪ್ರಮುಖ ಎಚ್ಚರಿಕೆಯನ್ನೂ ನೀಡಿದ್ದಾರೆ. ಶಿಕ್ಷಣ ಸಂಸ್ಥೆಗಳು, ಉದ್ಯಮ ರಂಗ ಮತ್ತು ನೀತಿ ನಿರೂಪಕರು ಒಟ್ಟಾಗಿ ಭವಿಷ್ಯದ ಕಾರ್ಯಪಡೆಯನ್ನು ಸಿದ್ಧಪಡಿಸದಿದ್ದರೆ, ಉದ್ಯೋಗಿಗಳಲ್ಲಿನ ಕೌಶಲ್ಯದ ಕೊರತೆಯು ಈ ವಲಯದ ಮಹತ್ವಾಕಾಂಕ್ಷೆಯ ಬೆಳವಣಿಗೆಗೆ ಅಡ್ಡಿಯಾಗಬಹುದು ಎಂದು ಅವರು ಕಳವಳ ವ್ಯಕ್ತಪಡಿಸಿದ್ದಾರೆ.

​”ಭಾರತದ ಡೇಟಾ ಸೆಂಟರ್ ಮತ್ತು ಎಐ (AI) ಮೂಲಸೌಕರ್ಯಗಳ ವಿಸ್ತರಣೆಯು ಕೇವಲ ಒಂದು ಮೂಲಸೌಕರ್ಯದ ಕಥೆಯಲ್ಲ; ಇದು ನಮ್ಮ ಯುವ ಕಾರ್ಯಪಡೆಗೆ ರಾಷ್ಟ್ರ ನಿರ್ಮಾಣದ ದೊಡ್ಡ ಅವಕಾಶವಾಗಿದೆ ಎಂದು ಎನ್ ಎಲ್ ಬಿ ಸರ್ವಿಸಸ್ ಸಿಇಒ ಸಚಿನ್ ಅಲುಗ್ ತಿಳಿಸಿದ್ದಾರೆ.

​ಯಾವೆಲ್ಲಾ ಹುದ್ದೆಗಳಿಗೆ ಬೇಡಿಕೆ ಬರಲಿದೆ?

​ದೇಶವು ಡಿಜಿಟಲ್ ರೂಪಾಂತರವನ್ನು ವೇಗಗೊಳಿಸುತ್ತಿದ್ದಂತೆ, ಹೊಸ ತಲೆಮಾರಿನ ವೃತ್ತಿಪರರಿಗೆ ಬೇಡಿಕೆ ಹೆಚ್ಚಾಗುತ್ತಿದೆ. ಪ್ರಮುಖವಾಗಿ ಕೆಳಗಿನ ಕ್ಷೇತ್ರಗಳಲ್ಲಿ ಪರಿಣತಿ ಹೊಂದಿದವರಿಗೆ ಹೆಚ್ಚಿನ ಆದ್ಯತೆ ಸಿಗಲಿದೆ:

​ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಮೂಲಸೌಕರ್ಯ ಎಂಜಿನಿಯರಿಂಗ್

​ಕ್ಲೌಡ್ ಆಪರೇಷನ್ಸ್ (Cloud Operations)

​ಪ್ಲಾಟ್‌ಫಾರ್ಮ್ ಎಂಜಿನಿಯರಿಂಗ್ ಮತ್ತು ಡೆವ್‌ಆಪ್ಸ್ (DevOps/MLOps)

​ಡೇಟಾ ಸೆಂಟರ್ ಆಟೊಮೇಷನ್

​ಪವರ್ ಸಿಸ್ಟಮ್ಸ್ ಮತ್ತು ಕ್ರಿಟಿಕಲ್ ಫೆಸಿಲಿಟೀಸ್ ಮ್ಯಾನೇಜ್‌ಮೆಂಟ್

​ವರದಿಯ ಪ್ರಕಾರ, ಭವಿಷ್ಯದಲ್ಲಿ ಭಾರತದ ಒಟ್ಟು ಡೇಟಾ ಸೆಂಟರ್ ಸಾಮರ್ಥ್ಯದ ಶೇಕಡಾ 30 ರಷ್ಟು ಭಾಗವನ್ನು ಎಐ (AI) ಕೆಲಸಗಳೇ ಆಕ್ರಮಿಸಿಕೊಳ್ಳಲಿವೆ. ಹಾಗಾಗಿ, ಈ ಕ್ಷೇತ್ರಕ್ಕೆ ಪ್ರವೇಶಿಸುವ ಎಂಜಿನಿಯರ್‌ಗಳಿಗೆ ‘ಎಐ ಮೂಲಸೌಕರ್ಯ ಸಾಕ್ಷರತೆ’ (AI Infrastructure Literacy) ಅತ್ಯಂತ ಪ್ರಮುಖ ಅರ್ಹತೆಯಾಗಲಿದೆ.