ಬೆಂಗಳೂರು.ಸೆಪ್ಟೆಂಬರ್.26 : ರಾಜ್ಯದ ಶಾಲಾ ವಿದ್ಯಾರ್ಥಿಗಳಿಗೆ (School students) ದಸರಾ ರಜೆಯ (Dasara holidays) ವೇಳಾಪಟ್ಟಿ ಅಧಿಕೃತವಾಗಿ ಹೊರಬಿದ್ದಿದೆ. 2026-27ನೇ ಶೈಕ್ಷಣಿಕ ಸಾಲಿನ ಕ್ಯಾಲೆಂಡರ್ ಪ್ರಕಾರ ಅಕ್ಟೋಬರ್ 3ರಿಂದ ಅಕ್ಟೋಬರ್ 21ರವರೆಗೆ ಸತತ 19 ದಿನಗಳ ಕಾಲ ಶಾಲೆಗಳಿಗೆ ರಜೆ ಇರಲಿದೆ. ಅಕ್ಟೋಬರ್ 22ರಿಂದ ರಾಜ್ಯಾದ್ಯಂತ ಎರಡನೇ ಅವಧಿಯ ಶೈಕ್ಷಣಿಕ ಚಟುವಟಿಕೆಗಳು ಮತ್ತು ತರಗತಿಗಳು ಪುನರಾರಂಭಗೊಳ್ಳಲಿವೆ ಎಂದು ಶಾಲಾ ಶಿಕ್ಷಣ ಇಲಾಖೆ ತಿಳಿಸಿದೆ.
ಗಾಂಧಿ ಜಯಂತಿ ಆಚರಣೆಯ ಬಳಿಕ ರಜೆ ಶುರು
ರಜೆ ಆರಂಭಕ್ಕೂ ಮುನ್ನ, ಅಕ್ಟೋಬರ್ 2ರಂದು ಗಾಂಧಿ ಜಯಂತಿ ಇರುವುದರಿಂದ ಅಂದು ಎಲ್ಲಾ ಶಾಲೆಗಳಲ್ಲೂ ಕಡ್ಡಾಯವಾಗಿ ವಿಶೇಷ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುತ್ತದೆ. ಅಂದು ಎಂದಿನಂತೆ ಸಾಮಾನ್ಯ ತರಗತಿಗಳು ನಡೆಯುವುದಿಲ್ಲವಾದರೂ, ವಿದ್ಯಾರ್ಥಿಗಳು ಮತ್ತು ಶಿಕ್ಷಕರು ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಬೇಕಾಗುತ್ತದೆ. ಈ ಆಚರಣೆ ಮುಗಿದ ಮರುದಿನದಿಂದಲೇ ಅಧಿಕೃತವಾಗಿ ದಸರಾ ರಜೆ ಶುರುವಾಗಲಿದೆ.
ಖಾಸಗಿ ಮತ್ತು ಅನುದಾನಿತ ಶಾಲೆಗಳ ನಿಯಮವೇನು?
ಶಿಕ್ಷಣ ಇಲಾಖೆ ಘೋಷಿಸಿರುವ ಈ 19 ದಿನಗಳ ರಜೆಯು ಮುಖ್ಯವಾಗಿ ಸರ್ಕಾರಿ ಹಾಗೂ ಅನುದಾನಿತ ಶಾಲೆಗಳಿಗೆ ನೇರವಾಗಿ ಅನ್ವಯವಾಗುತ್ತದೆ. ಆದರೆ ಅನುದಾನರಹಿತ ಖಾಸಗಿ ಶಾಲೆಗಳು ತಮ್ಮದೇ ಆಡಳಿತ ಮಂಡಳಿಯ ಶೈಕ್ಷಣಿಕ ವೇಳಾಪಟ್ಟಿಗೆ ಅನುಗುಣವಾಗಿ ರಜೆಯನ್ನು ನಿರ್ಧರಿಸಲಿವೆ. ಕೆಲ ಖಾಸಗಿ ಶಾಲೆಗಳು ಕೇವಲ ಒಂದು ವಾರ ರಜೆ ನೀಡಿದರೆ, ಇನ್ನು ಕೆಲವು ಶಾಲೆಗಳು 10 ದಿನಗಳವರೆಗೆ ರಜೆ ವಿಸ್ತರಿಸುವ ಸಾಧ್ಯತೆಯಿದೆ. ಹೀಗಾಗಿ ಖಾಸಗಿ ಶಾಲಾ ವಿದ್ಯಾರ್ಥಿಗಳು ತಮ್ಮ ಶಾಲೆಯ ಅಧಿಕೃತ ಪ್ರಕಟಣೆಯನ್ನು ಗಮನಿಸುವುದು ಉತ್ತಮ.
ಪ್ರಸ್ತುತ ಶೈಕ್ಷಣಿಕ ಸಾಲಿನ ಕರ್ತವ್ಯ ದಿನಗಳ ಲೆಕ್ಕಾಚಾರ
2026-27ನೇ ಸಾಲಿನ ಒಟ್ಟು 365 ದಿನಗಳಲ್ಲಿ 119 ದಿನಗಳು ವಿವಿಧ ರಜೆಗಳಿಗೆ ಮೀಸಲಾಗಿದ್ದು, ಉಳಿದ 245 ದಿನಗಳು ಪೂರ್ಣ ಪ್ರಮಾಣದ ಶಾಲಾ ಕರ್ತವ್ಯದ ದಿನಗಳಾಗಿರುತ್ತವೆ. ಈ ಪೈಕಿ 181 ದಿನಗಳನ್ನು ನಿರಂತರ ಬೋಧನೆಗೆ ಬಳಸಿಕೊಳ್ಳಲಾಗುತ್ತದೆ. ಉಳಿದಂತೆ ಪರೀಕ್ಷೆ ಮತ್ತು ಮೌಲ್ಯಾಂಕನಕ್ಕಾಗಿ 26 ದಿನಗಳು, ಪಠ್ಯೇತರ ಚಟುವಟಿಕೆಗಳಿಗೆ 24 ದಿನಗಳು, ಫಲಿತಾಂಶ ವಿಶ್ಲೇಷಣೆಗೆ 10 ದಿನಗಳು ಹಾಗೂ ಸ್ಥಳೀಯ ರಜೆಗಳಿಗಾಗಿ 4 ದಿನಗಳನ್ನು ಮೀಸಲಿಡಲಾಗಿದೆ.
