ಕರಿಬೇವು ಬರೀ ರುಚಿಯಷ್ಟೇ ಅಲ್ಲ, ಆರೋಗ್ಯಕ್ಕೂ ಇದೆ ಸೂಪರ್ ಬೆನಿಫಿಟ್ಸ್!

ನಾವು ತಯಾರಿಸುವ ಬಹುತೇಕ ಅಡುಗೆಗಳಿಗೆ ಕರಿಬೇವು ಇಲ್ಲದಿದ್ದರೆ ಆ ಅಡುಗೆ ಪೂರ್ಣವಾಗುವುದೇ ಇಲ್ಲ. ಒಗ್ಗರಣೆಗೆ ಕರಿಬೇವು ಹಾಕಿದಾಗ ಬರುವ ಘಮವೇ ಬೇರೆ. ಆದರೆ, ಕೇವಲ ಸುವಾಸನೆ ಅಥವಾ ರುಚಿಗಾಗಿ ಮಾತ್ರ ಅಡುಗೆಯಲ್ಲಿ ಕರಿಬೇವು ಬಳಸಲಾಗುತ್ತದೆ ಎಂದು ನೀವು ಅಂದುಕೊಂಡಿದ್ದರೆ ಅದು ತಪ್ಪು. ಅಡುಗೆಯಲ್ಲಿ ಕರಿಬೇವು ಬಳಸುವುದರ ಹಿಂದೆ ಅಚ್ಚರಿ ಮೂಡಿಸುವ ಆರೋಗ್ಯ ರಹಸ್ಯ ಹಾಗೂ ವೈಜ್ಞಾನಿಕ ಕಾರಣಗಳಿವೆ. ಅವುಗಳ ವಿವರ ಇಲ್ಲಿದೆ.

1. ಅದ್ಭುತ ರುಚಿ ಮತ್ತು ಸುವಾಸನೆ
ಕರಿಬೇವನ್ನು ಅಡುಗೆಯಲ್ಲಿ ಬಳಸುವುದರಿಂದ ಆಹಾರಕ್ಕೆ ಮಧುರವಾದ ಸುವಾಸನೆ ಹಾಗೂ ವಿಶಿಷ್ಟ ರುಚಿ ಸಿಗುತ್ತದೆ. ಇದಕ್ಕೆ ಕರಿಬೇವಿನಲ್ಲಿರುವ ‘ಪಿನ್’ (Pinene) ಮತ್ತು ‘ಕ್ಯಾರಿಯೋಫಿಲಿನ್’ (Caryophyllene) ನಂತಹ ನೈಸರ್ಗಿಕ ಸಂಯುಕ್ತಗಳೇ ಕಾರಣ. ಇವು ಅಡುಗೆಯ ರುಚಿಯನ್ನು ದುಪ್ಪಟ್ಟುಗೊಳಿಸುತ್ತವೆ.

2. ಜೀರ್ಣಕ್ರಿಯೆಗೆ ರಾಮಬಾಣ
ನಾವು ಬೇಳೆ ಸಾರು, ಸಾಂಬಾರ್ ಅಥವಾ ಮಸಾಲೆ ಪದಾರ್ಥಗಳನ್ನು ತಿಂದಾಗ ಅವು ಸುಲಭವಾಗಿ ಜೀರ್ಣವಾಗಲು ಕರಿಬೇವು ನೆರವಾಗುತ್ತದೆ. ತಿಂದ ಆಹಾರವನ್ನು ಬೇಗನೆ ಜೀರ್ಣಿಸುವ ಶಕ್ತಿ ಕರಿಬೇವಿಗಿದೆ.

3. ಗ್ಯಾಸ್ ಹಾಗೂ ಅಸಿಡಿಟಿ ಸಮಸ್ಯೆಗೆ ಮುಕ್ತಿ
ಇತ್ತೀಚಿನ ದಿನಗಳಲ್ಲಿ ಅನೇಕರನ್ನು ಕಾಡುವ ಅಸಿಡಿಟಿ, ಗ್ಯಾಸ್ಟ್ರಿಕ್ ಹಾಗೂ ಮಲಬದ್ಧತೆಯಂತಹ ಹೊಟ್ಟೆಯ ಸಮಸ್ಯೆಗಳನ್ನು ದೂರ ಇಡಲು ಕರಿಬೇವು ಸಹಾಯ ಮಾಡುತ್ತದೆ. ಅಷ್ಟೇ ಅಲ್ಲದೆ, ಇದು ಲಿವರ್ (ಯಕೃತ್ತು) ಆರೋಗ್ಯವನ್ನು ಕಾಪಾಡಲು ಕೂಡ ಹಲವು ವಿಧಗಳಲ್ಲಿ ಸಹಕಾರಿಯಾಗಿದೆ ಎಂದು ಆರೋಗ್ಯ ತಜ್ಞರು ಹೇಳುತ್ತಾರೆ.

4. ಆಹಾರ ಬೇಗನೆ ಕೆಡದಂತೆ ಕಾಯುತ್ತದೆ (ನ್ಯಾಚುರಲ್ ಪ್ರಿಸರ್ವೇಟಿವ್)
ಸಾರು, ಪಲ್ಯ ಅಥವಾ ಇನ್ನಿತರ ತಿನಿಸುಗಳಿಗೆ ಕರಿಬೇವು ಸೇರಿಸುವುದರಿಂದ, ಅದರಲ್ಲಿರುವ ಆಂಟಿ-ಬ್ಯಾಕ್ಟೀರಿಯಲ್ (ಬ್ಯಾಕ್ಟೀರಿಯಾ ವಿರೋಧಿ) ಮತ್ತು ಆಂಟಿ-ಫಂಗಲ್ (ಶಿಲೀಂಧ್ರ ವಿರೋಧಿ) ಗುಣಗಳು ಆಹಾರವು ಬೇಗನೆ ಕೆಟ್ಟುಹೋಗದಂತೆ ತಡೆಯುತ್ತವೆ. ಇದು ನೈಸರ್ಗಿಕವಾಗಿ ಆಹಾರದ ತಾಜಾತನವನ್ನು ಕಾಪಾಡುತ್ತದೆ.

ಹೀಗಾಗಿ, ಇನ್ಮುಂದೆ ಅಡುಗೆಯಲ್ಲಿ ಕರಿಬೇವು ಕಂಡರೆ ಅದನ್ನು ಎತ್ತಿ ಹೊರಗೆ ಬಿಸಾಡಬೇಡಿ ಅಗಿದು ತಿನ್ನುವ ಅಭ್ಯಾಸ ಮಾಡಿಕೊಳ್ಳಿ!