ಆಚಾರ್ಯ ಚಾಣಕ್ಯರ ನೀತಿಶಾಸ್ತ್ರದ ಪ್ರಕಾರ, ವ್ಯಕ್ತಿಯು ಜೀವನದಲ್ಲಿ ಯಾರೊಂದಿಗೂ ಅನಗತ್ಯ ವಾದ-ವಿವಾದಗಳಲ್ಲಿ ತೊಡಗಿಸಿಕೊಳ್ಳಬಾರದು. ಅನೇಕರು ತಮ್ಮ ಅಭಿಪ್ರಾಯವೇ ಸರಿ ಎಂದು ಸಾಬೀತುಪಡಿಸಲು ಅಥವಾ ಇತರರನ್ನು ಒಪ್ಪಿಸಲು ಪ್ರಯತ್ನಿಸಿ ತಮ್ಮ ಅಮೂಲ್ಯ ಸಮಯ ಹಾಗೂ ಮಾನಸಿಕ ಶಾಂತಿಯನ್ನು ಕಳೆದುಕೊಳ್ಳುತ್ತಾರೆ. ಚಾಣಕ್ಯರ ಪ್ರಕಾರ, ಈ ಕೆಳಗಿನ ಮೂರು ರೀತಿಯ ವ್ಯಕ್ತಿಗಳನ್ನು ಒಪ್ಪಿಸಲು ಅಥವಾ ಅವರೊಂದಿಗೆ ವಾದಿಸಲು ಹೋದರೆ ತೊಂದರೆಗಳು ಕಟ್ಟಿಟ್ಟ ಬುತ್ತಿ.
ಮೊಂಡು ಸ್ವಭಾವದ ಮತ್ತು ಮೂರ್ಖ ವ್ಯಕ್ತಿಗಳು
ಬುದ್ಧಿಹೀನ ಹಾಗೂ ವಿಪರೀತ ಹಠಮಾರಿ ಸ್ವಭಾವದ ವ್ಯಕ್ತಿಗಳಿಗೆ ಯಾವುದೇ ವಿಷಯವನ್ನು ವಿವರಿಸಿ ಹೇಳಲು ಪ್ರಯತ್ನಿಸುವುದು ಮೂರ್ಖತನ. ಇಂತಹವರನ್ನು ಬದಲಾಯಿಸಲು ಅಥವಾ ಒಪ್ಪಿಸಲು ಯತ್ನಿಸಿದರೆ ಅವರು ಎಂದಿಗೂ ಅರ್ಥಮಾಡಿಕೊಳ್ಳುವುದಿಲ್ಲ. ಇದು ನಿಮ್ಮ ಅಮೂಲ್ಯ ಸಮಯವನ್ನು ವ್ಯರ್ಥ ಮಾಡುವುದರ ಜೊತೆಗೆ ನಿಮ್ಮ ಮನಸ್ಸಿನ ನೆಮ್ಮದಿಯನ್ನು ಹಾಳುಮಾಡುತ್ತದೆ. ಹಾಗಾಗಿ ಇಂತಹವರಿಂದ ಅಂತರ ಕಾಯ್ದುಕೊಳ್ಳುವುದೇ ಲೇಸು.
ನಕಾರಾತ್ಮಕ (ನೆಗೆಟಿವ್) ಮನಸ್ಥಿತಿಯ ಜನರು
ಪ್ರತಿಯೊಂದು ಸಣ್ಣ ವಿಷಯಕ್ಕೂ ದೂರುವ, ಕಣ್ಣೀರಿಡುವ ಅಥವಾ ಸದಾ ನಕಾರಾತ್ಮಕವಾಗಿ ಯೋಚಿಸುವ ಜನರಿಂದ ಸದಾ ದೂರವಿರಬೇಕು. ಇವರೊಂದಿಗೆ ಚರ್ಚೆ ಅಥವಾ ವಾದ ಮಾಡುವುದರಿಂದ ನಿಮ್ಮ ಮನಸ್ಸಿನಲ್ಲೂ ನಕಾರಾತ್ಮಕ ಭಾವನೆಗಳು ಮೂಡುತ್ತವೆ. ಇವರು ಇತರರ ಯಾವುದೇ ಸರಿಯಾದ ಅಭಿಪ್ರಾಯವನ್ನು ಒಪ್ಪಿಕೊಳ್ಳುವುದಿಲ್ಲ; ತಮ್ಮ ವಾದದಲ್ಲಿ ಹುರುಳಿಲ್ಲದಿದ್ದರೂ ತಾವೇ ಸರಿ ಎಂಬ ಭ್ರಮೆಯಲ್ಲಿರುತ್ತಾರೆ. ಇವರ ಸಹವಾಸವು ನಿಮ್ಮ ಬದುಕಿನಲ್ಲಿ ಹೊಸ ಸಮಸ್ಯೆಗಳಿಗೆ ನಾಂದಿ ಹಾಡಬಹುದು.
ವಂಚಕರು ಮತ್ತು ಸ್ವಾರ್ಥಿಗಳು
ಸ್ನೇಹ ಅಥವಾ ಸಂಬಂಧದ ಮುಖವಾಡ ಧರಿಸಿ ಸುತ್ತಲೂ ತಿರುಗುವ ಕುತಂತ್ರಿ ಹಾಗೂ ಸ್ವಾರ್ಥಿ ವ್ಯಕ್ತಿಗಳನ್ನು ಗುರುತಿಸುವುದು ಅತ್ಯಂತ ಮುಖ್ಯ. ಇಂತಹವರೊಂದಿಗೆ ಎಂದಿಗೂ ವಾದಕ್ಕಿಳಿಯಬಾರದು. ಸದಾ ತಮ್ಮ ಸ್ವಹಿತಾಸಕ್ತಿಯನ್ನೇ ಬಯಸುವ ಇವರಿಗೆ ಯಾವುದೇ ಸಲಹೆ ನೀಡಲು ಅಥವಾ ಪರಿಸ್ಥಿತಿ ವಿವರಿಸಲು ಹೋದರೆ, ಅದನ್ನು ಅರ್ಥಮಾಡಿಕೊಳ್ಳುವ ಬದಲು ನಿಮ್ಮನ್ನೇ ಶತ್ರುವನ್ನಾಗಿ ಪರಿಗಣಿಸಲು ಶುರುಮಾಡುತ್ತಾರೆ.
