ಶಿವಮೊಗ್ಗ: ಇಡೀ ಜಿಲ್ಲೆಯೇ ಬೆಚ್ಚಿಬೀಳುವಂತ ಘಟನೆ ನಡೆದಿದೆ. ಮಕ್ಕಳ ಜಗಳಗಳು ಕೊಲೆಯಲ್ಲಿ ಅಂತ್ಯವಾಗೋದು ಅಂದ್ರೆ ಏನು..? ಮಕ್ಕಳ ಮನಸ್ಥಿತಿ ಎಲ್ಲಿಗೆ ಹೋಗಿ ಮುಟ್ಟುತ್ತಾ ಇದೆ ಎಂಬ ಚಿಂತೆ ಪೋಷಕರನ್ನ ಕಾಡುವಂತೆ ಮಾಡಿದೆ. ಎಸ್ಎಸ್ಎಲ್ಸಿ ವಿದ್ಯಾರ್ಥಿಗಳ ನಡುವೆ ಶುರುವಾದ ಜಗಳ ಕೊಲೆಯಲ್ಲಿ ಅಂತ್ಯವಾಗಿರುವ ಘಟನೆ ಹೊರವಲಯದ ಸೂಳೆಬೈಲಿನಲ್ಲಿ ನಡೆದಿದೆ. ಸಂಕೇತ್ ಎಂಬ ವಿದ್ಯಾರ್ಥಿ ಕೊಲೆಯಾದ ದುರ್ದೈವಿ.
ಈ ಬಗ್ಗೆ ಶಿವಮೊಗ್ಗದ ಎಸ್ಪಿ ಮಾಹಿತಿ ನೀಡಿದ್ದಾರೆ. ಸ್ಪೆಷಲ್ ಕ್ಲಾಸ್ ಅನ್ನ ಮುಗಿಸಿಕೊಂಡು ಸಂಕೇತ್ ಮತ್ತು ಸಂಗಡಿಗರು ಬರ್ತಾ ಇದ್ದರು. ಈ ವೇಳೆ ಹುಡುಗರ ಮಧ್ಯೆಯೇ ಮಾತಿನ ಚಕಮಕಿ ಶುರುವಾಗಿದೆ. ಅದರಿಂದ ಕೈ ಕೈನಲ್ಲಿಯೇ ಮೊದಲು ಹೊಡೆದಾಡಿಕೊಂಡಿದ್ದಾರೆ. ಸಂಕೇತ್ ಇದರಿಂದ ಕುಸಿದು ಬಿದ್ದಿದ್ದಾನೆ. ಅಲ್ಲಿಯೇ ಇದ್ದಂತ ನಯಾಜ್ ಹಾಗೂ ಕುಟುಂಬಸ್ಥರು ಆಸ್ಪತ್ರೆಗೆ ಕರೆದುಕೊಂಡು ಬರ್ತಾರೆ. ಅಷ್ಟರಲ್ಲಿ ಆತನ ಪ್ರಾಣ ಹೋಗಿದೆ ಅಂತ ಅನೌನ್ಸ್ ಮಾಡ್ತಾರೆ. ಯಾರೂ ಈ ಕೃತ್ಯ ಮಾಡಿದ್ದಾರೆ ಅವರು ಅಪ್ರಾಪ್ತರು. ಈಗಾಗಲೇ ಇಬ್ಬರನ್ನು ವಶಕ್ಕೆ ಪಡೆದಿದ್ದೇವೆ ಎಂದಿದ್ದಾರೆ.
ಸಂಕೇತ್ ಮನೆ ದುಃಖದಿಂದ ಕೂಡಿದ್ದು ಸಂಕೇತ್ ತಾಯಿ ನೋವಿನಲ್ಲಿಯೇ ಮಾತನ್ನಾಡಿದ್ದಾರೆ. ಇವತ್ ಎಕ್ಸಾಂ ಇದೆ ಮಾ ಅಂತ ಎಲ್ಲರಿಗೂ ಹೇಳಿ ಹೋದ. ಟ್ಯೂಷನ್ ನವರಿಗೆ ಕರೆ ಮಾಡಿ ಕೇಳಿದ್ದಕ್ಕೆ 9 ಗಂಟೆಗೆ ಕಳುಹಿಸ್ತೀವಿ ಅಂದಿದ್ರು. ಆಸ್ಪತ್ರೆಗೆ ತಗೊಂಡ್ ಬಂದಿದ್ದರು. ನನ್ನ ತೊಡೆ ಮೇಲೆ ಹಾಕೊಂಡು ಸಂಕೇತ ಅಂದ್ರು ಮಾತಾಡ್ಲಿಲ್ಲ. ಒಳಗೆ ತಗೊಂಡ್ ಹೋದಾಗ ಡಾಕ್ಟರ್ ಹೇಳಿದ್ರು, ಇಲ್ಲಪ್ಪ ಜೀವ ಹೋಗಿದೆ ಅಂದ್ರು. ವಂಶ ಬೆಳೆಸೋ ಮಗನೇ ಇಲ್ಲ ಅಂತ ಕಣ್ಣೀರು ಹಾಕಿದರು.
