ಬಣ್ಣದ ಬಟ್ಟೆಗಳು, ಜೀನ್ಸ್ ಹಾಗೂ ಟಿ-ಶರ್ಟ್‌ಗಳನ್ನು ಕೆಲವೇ ದಿನ ಬಳಸಿದ ಬಳಿಕ ಅವುಗಳ ಹೊಳಪು ಕಡಿಮೆಯಾಗಿ ಹಳೆಯದರಂತೆ ಕಾಣಲು ಆರಂಭಿಸುತ್ತವೆ. ಎಷ್ಟೇ ಜೋಪಾನವಾಗಿ ತೊಳೆದರೂ ಬಟ್ಟೆಗಳ ಬಣ್ಣ ಮಸುಕಾಗುವುದು, ಪ್ರಿಂಟ್‌ಗಳು ಹಾಳಾಗುವುದು ಸಾಮಾನ್ಯ. ಆದರೆ, ಬಟ್ಟೆ ಒಗೆಯುವ ಮುನ್ನ ಒಂದು ಸಣ್ಣ ಉಪಾಯ ಅನುಸರಿಸಿದರೆ ಅವುಗಳನ್ನು ದೀರ್ಘಕಾಲ ಹೊಸದರಂತೆ ಕಾಪಾಡಿಕೊಳ್ಳಬಹುದು. ಅದುವೇ ಬಟ್ಟೆಗಳನ್ನು ಒಳಭಾಗಕ್ಕೆ ತಿರುಗಿಸಿ, ಅಂದರೆ ಉಲ್ಟಾ ಮಾಡಿ ಒಗೆಯುವುದು.
ವಿಶೇಷವಾಗಿ ವಾಷಿಂಗ್ ಮೆಷಿನ್‌ನಲ್ಲಿ ಬಟ್ಟೆ ತೊಳೆಯುವಾಗ ಈ ವಿಧಾನ ಹೆಚ್ಚು ಪ್ರಯೋಜನಕಾರಿಯಾಗಿದೆ. ಇದರಿಂದ ಬಟ್ಟೆಯ ಹೊರಭಾಗದ ಬಣ್ಣ ಮತ್ತು ವಿನ್ಯಾಸಕ್ಕೆ ಹಾನಿಯಾಗುವುದನ್ನು ತಡೆಯಬಹುದು. ಜೊತೆಗೆ ಬೆವರು, ದೇಹದ ಜಿಡ್ಡು ಹಾಗೂ ಡಿಯೋಡರೆಂಟ್‌ನ ಕಲೆಗಳನ್ನು ಸ್ವಚ್ಛಗೊಳಿಸಲು ಸಹಾಯವಾಗುತ್ತದೆ. ಆದರೆ, ಎಲ್ಲ ಬಟ್ಟೆಗಳನ್ನೂ ಉಲ್ಟಾ ಮಾಡಿ ಒಗೆಯುವುದು ಸೂಕ್ತವಲ್ಲ.
ಹಾಗಾದರೆ ಯಾವ ಬಟ್ಟೆಗಳನ್ನು ಉಲ್ಟಾ ಮಾಡಿ ಒಗೆಯಬೇಕು? ಯಾವುದನ್ನು ನೇರವಾಗಿ ತೊಳೆಯಬೇಕು? ಇಲ್ಲಿದೆ ಮಾಹಿತಿ.
ಉಲ್ಟಾ ಮಾಡಿ ಒಗೆಯುವುದರಿಂದ ಏನೆಲ್ಲ ಲಾಭ?
ಬಟ್ಟೆಗಳನ್ನು ಉಲ್ಟಾ ಮಾಡಿ ಒಗೆಯುವುದರಿಂದ ವಾಷಿಂಗ್ ಮೆಷಿನ್‌ನಲ್ಲಿರುವ ಇತರ ಬಟ್ಟೆಗಳೊಂದಿಗೆ ಉಂಟಾಗುವ ಘರ್ಷಣೆ ನೇರವಾಗಿ ಹೊರಭಾಗದ ಮೇಲೆ ಬೀಳುವುದಿಲ್ಲ. ಇದರಿಂದ ಬಟ್ಟೆಯ ಮೇಲ್ಮೈ ಸವೆಯುವುದು, ಬಣ್ಣ ಮಸುಕಾಗುವುದು ಹಾಗೂ ವಿನ್ಯಾಸ ಹಾಳಾಗುವ ಸಾಧ್ಯತೆ ಕಡಿಮೆಯಾಗುತ್ತದೆ.ವಿಶೇಷವಾಗಿ ಕಪ್ಪು, ನೀಲಿ ಸೇರಿದಂತೆ ಗಾಢ ಬಣ್ಣದ ಬಟ್ಟೆಗಳನ್ನು ಹೀಗೆ ತೊಳೆಯುವುದರಿಂದ ಅವುಗಳ ಬಣ್ಣ ದೀರ್ಘಕಾಲ ಉಳಿಯಲು ನೆರವಾಗುತ್ತದೆ. ಟಿ-ಶರ್ಟ್‌ಗಳ ಮೇಲಿರುವ ಗ್ರಾಫಿಕ್ ಪ್ರಿಂಟ್‌ಗಳು, ಚಿತ್ರಗಳು, ಡಿಸೈನ್‌ಗಳು ಹಾಗೂ ಕಸೂತಿ ಕೆಲಸಗಳು ಬೇಗನೆ ಹಾಳಾಗುವುದನ್ನೂ ತಡೆಯಬಹುದು.
ಜೀನ್ಸ್‌ಗಳನ್ನು ಉಲ್ಟಾ ಮಾಡಿ ತೊಳೆಯುವುದರಿಂದ ಅವುಗಳ ಬಣ್ಣ ಮತ್ತು ಮೇಲ್ಮೈಯನ್ನು ಕಾಪಾಡಿಕೊಳ್ಳಬಹುದು. ಜೀನ್ಸ್‌ನಲ್ಲಿರುವ ಜಿಪ್‌ಗಳು ಹಾಗೂ ಲೋಹದ ಬಟನ್‌ಗಳು ಇತರ ಸೂಕ್ಷ್ಮ ಬಟ್ಟೆಗಳಿಗೆ ತಗುಲಿ ಹಾನಿ ಮಾಡುವ ಅಪಾಯವೂ ಕಡಿಮೆಯಾಗುತ್ತದೆ.ಇನ್ನು ವ್ಯಾಯಾಮದ ವೇಳೆ ಧರಿಸುವ ಉಡುಪುಗಳು, ಟಿ-ಶರ್ಟ್‌ಗಳು ಹಾಗೂ ಒಳ ಉಡುಪುಗಳ ಒಳಭಾಗದಲ್ಲಿ ಬೆವರು, ದೇಹದ ಜಿಡ್ಡು ಮತ್ತು ಡಿಯೋಡರೆಂಟ್‌ನ ಕಲೆಗಳು ಹೆಚ್ಚಾಗಿ ಸಂಗ್ರಹವಾಗುತ್ತವೆ. ಇಂತಹ ಬಟ್ಟೆಗಳನ್ನು ಉಲ್ಟಾ ಮಾಡಿ ತೊಳೆದರೆ ಒಳಭಾಗವನ್ನು ಪರಿಣಾಮಕಾರಿಯಾಗಿ ಸ್ವಚ್ಛಗೊಳಿಸಲು ಸಹಾಯವಾಗುತ್ತದೆ. ಇದರಿಂದ ದುರ್ವಾಸನೆ ಉಂಟುಮಾಡುವ ಕೊಳಕನ್ನು ತೆಗೆದುಹಾಕಲು ಸಹ ಅನುಕೂಲವಾಗುತ್ತದೆ.
ಯಾವ ಬಟ್ಟೆಗಳನ್ನು ನೇರವಾಗಿ ಒಗೆಯಬೇಕು?
ಬಟ್ಟೆಗಳ ಮೇಲೆ ಮಣ್ಣು, ಆಹಾರ ಪದಾರ್ಥಗಳು ಅಥವಾ ಇತರ ವಸ್ತುಗಳಿಂದ ಕಲೆಗಳಾಗಿದ್ದರೆ ಅವುಗಳನ್ನು ಉಲ್ಟಾ ಮಾಡುವ ಬದಲು ನೇರವಾಗಿ ತೊಳೆಯುವುದು ಉತ್ತಮ. ಏಕೆಂದರೆ ಕಲೆಗಳು ಬಟ್ಟೆಯ ಹೊರಭಾಗದಲ್ಲಿರುವುದರಿಂದ ಅವುಗಳನ್ನು ನೇರವಾಗಿ ಸ್ವಚ್ಛಗೊಳಿಸುವುದು ಹೆಚ್ಚು ಪರಿಣಾಮಕಾರಿ.ಕಲೆಗಳಿರುವ ಜಾಗಕ್ಕೆ ಮೊದಲು ಸ್ಟೇನ್ ರಿಮೂವರ್ ಅಥವಾ ಸ್ವಲ್ಪ ಡಿಟರ್ಜೆಂಟ್ ಹಚ್ಚಿ, ನಂತರ ತೊಳೆಯಬಹುದು. ಮಕ್ಕಳ ಬಟ್ಟೆಗಳಲ್ಲಿ ಆಹಾರ, ಮಣ್ಣು ಹಾಗೂ ಇತರ ಕೊಳಕು ಪದಾರ್ಥಗಳ ಕಲೆಗಳು ಹೆಚ್ಚಾಗಿರುವುದರಿಂದ ಅವುಗಳನ್ನು ನೇರವಾಗಿ ತೊಳೆದು ಸ್ವಚ್ಛಗೊಳಿಸುವುದು ಸೂಕ್ತ.
ಅದೇ ರೀತಿ ಫುಟ್‌ಬಾಲ್ ಸಮವಸ್ತ್ರಗಳು, ಬೇಸ್‌ಬಾಲ್ ಪ್ಯಾಂಟ್‌ಗಳು, ತೋಟಗಾರಿಕೆ ಮಾಡುವಾಗ ಧರಿಸುವ ಬಟ್ಟೆಗಳು ಹಾಗೂ ಮಣ್ಣಿನಲ್ಲಿ ಕೆಲಸ ಮಾಡುವಾಗ ಬಳಸುವ ಉಡುಪುಗಳ ಹೊರಭಾಗದಲ್ಲಿ ಧೂಳು ಮತ್ತು ಕೊಳಕು ಹೆಚ್ಚಾಗಿರುತ್ತದೆ. ಇಂತಹ ಬಟ್ಟೆಗಳನ್ನು ನೇರವಾಗಿ ತೊಳೆಯುವುದರಿಂದ ಹೊರಭಾಗದಲ್ಲಿರುವ ಮಣ್ಣಿನ ಕಲೆಗಳನ್ನು ಸುಲಭವಾಗಿ ತೆಗೆದುಹಾಕಬಹುದು.
ಬಟ್ಟೆ ಒಗೆಯುವಾಗ ಈ ವಿಷಯ ನೆನಪಿರಲಿ!
ಬಟ್ಟೆಗಳನ್ನು ಉಲ್ಟಾ ಮಾಡಿ ಒಗೆಯುವುದು ಅವುಗಳ ಬಣ್ಣ, ಹೊಳಪು ಹಾಗೂ ವಿನ್ಯಾಸವನ್ನು ದೀರ್ಘಕಾಲ ಕಾಪಾಡಿಕೊಳ್ಳಲು ಸಹಾಯ ಮಾಡುವ ಸರಳ ಉಪಾಯವಾಗಿದೆ. ವಿಶೇಷವಾಗಿ ಜೀನ್ಸ್, ಗಾಢ ಬಣ್ಣದ ಬಟ್ಟೆಗಳು, ಪ್ರಿಂಟ್ ಇರುವ ಟಿ-ಶರ್ಟ್‌ಗಳು ಮತ್ತು ವ್ಯಾಯಾಮದ ಉಡುಪುಗಳಿಗೆ ಈ ವಿಧಾನ ಹೆಚ್ಚು ಉಪಯುಕ್ತ.ಆದರೆ, ಬಟ್ಟೆಯ ಹೊರಭಾಗದಲ್ಲಿ ಮಣ್ಣು ಅಥವಾ ಗಾಢವಾದ ಕಲೆಗಳಿದ್ದರೆ ನೇರವಾಗಿ ತೊಳೆಯುವುದು ಉತ್ತಮ. ಜೊತೆಗೆ ಬಟ್ಟೆಯ ಮೇಲಿರುವ ತೊಳೆಯುವ ಸೂಚನೆಗಳನ್ನು ಗಮನಿಸುವುದು, ಬಣ್ಣದ ಬಟ್ಟೆಗಳನ್ನು ಪ್ರತ್ಯೇಕವಾಗಿ ಒಗೆಯುವುದು ಮತ್ತು ಸೂಕ್ತ ಪ್ರಮಾಣದ ಡಿಟರ್ಜೆಂಟ್ ಬಳಸುವುದೂ ಮುಖ್ಯ. ಬಟ್ಟೆಯ ಸ್ವರೂಪ ಹಾಗೂ ಕೊಳೆಯ ಪ್ರಮಾಣಕ್ಕೆ ಅನುಗುಣವಾಗಿ ತೊಳೆಯುವ ವಿಧಾನವನ್ನು ಆಯ್ಕೆ ಮಾಡಿಕೊಂಡರೆ ಬಟ್ಟೆಗಳ ಬಾಳಿಕೆಯನ್ನು ಹೆಚ್ಚಿಸಬಹುದು.
