ಬೆಂಗಳೂರು: ಆನ್ಲೈನ್ನಲ್ಲಿ ಆಹಾರ ತರಿಸಿಕೊಳ್ಳುವ ಮುಗ್ಧ ಗ್ರಾಹಕರನ್ನು ಗುರಿಯಾಗಿಸಿಕೊಂಡು ಸೈಬರ್ ವಂಚಕರು ಹೊಸ ಮಾದರಿಯ ಯುಪಿಐ ವಂಚನೆಗಿಳಿದಿದ್ದು, ಎಚ್ಚರ ತಪ್ಪಿದರೆ ಬ್ಯಾಂಕ್ ಖಾತೆ ಖಾಲಿಯಾಗುವ ಆತಂಕ ಎದುರಾಗಿದೆ.
ಡೆಲಿವರಿ ಆ್ಯಪ್ ಅಥವಾ ರೆಸ್ಟೋರೆಂಟ್ನ ಪ್ರತಿನಿಧಿಗಳೆಂದು ನಂಬಿಸಿ ಕರೆ ಮಾಡುವ ವಂಚಕರು, ಆಹಾರ ತಲುಪಿಸುವಲ್ಲಿ ಅಥವಾ ಹಣ ಪಾವತಿಯಲ್ಲಿ ತಾಂತ್ರಿಕ ದೋಷವಾಗಿದೆ ಎಂದು ಹೇಳಿ ವಂಚನೆಯ ಜಾಲವನ್ನು ಹೆಣೆಯುತ್ತಿದ್ದಾರೆ.
ಗ್ರಾಹಕರು ಇತ್ತೀಚೆಗೆ ಮಾಡಿದ ಆರ್ಡರ್ ಅನ್ನು ಉಲ್ಲೇಖಿಸಿ ಅವರ ಹೆಸರು ಹೇಳಿಯೇ ಮಾತನಾಡುವ ಖದೀಮರು, ಆರ್ಡರ್ ರದ್ದಾಗಿದ್ದು ಹಣ ಮರುಪಾವತಿ (ರೀಫಂಡ್) ಮಾಡುವುದಾಗಿ ನಂಬಿಸುತ್ತಾರೆ. ಈ ರೀಫಂಡ್ಗಾಗಿ ಮೊಬೈಲ್ನಲ್ಲಿ ‘ಎನಿಡೆಸ್ಕ್’ ಅಥವಾ ‘ಟೀಮ್ವ್ಯೂಯರ್’ ನಂತಹ ರಿಮೋಟ್ ಆಕ್ಸೆಸ್ ಅಥವಾ ಸ್ಕ್ರೀನ್ ಶೇರಿಂಗ್ ಆ್ಯಪ್ಗಳನ್ನು ಇನ್ಸ್ಟಾಲ್ ಮಾಡುವಂತೆ ಗ್ರಾಹಕರ ಮೇಲೆ ಒತ್ತಡ ಹೇರುತ್ತಾರೆ. ಒಮ್ಮೆ ಗ್ರಾಹಕರು ಈ ಆ್ಯಪ್ಗಳನ್ನು ಅಳವಡಿಸಿಕೊಂಡರೆ, ಅವರ ಮೊಬೈಲ್ ಪರದೆಯ ಸಂಪೂರ್ಣ ನಿಯಂತ್ರಣ ವಂಚಕರ ಕೈಸೇರುತ್ತದೆ. ಗ್ರಾಹಕರು ಯುಪಿಐ ಪಿನ್ ನಮೂದಿಸುವುದನ್ನು ನೇರವಾಗಿ ನೋಡುವ ವಂಚಕರು, ನಂತರ ಮೊಬೈಲ್ ಲಾಕ್ ಮಾಡಿ ತಾವೇ ಹಣವನ್ನು ಬೇರೆ ಖಾತೆಗಳಿಗೆ ವರ್ಗಾಯಿಸಿಕೊಳ್ಳುತ್ತಿದ್ದಾರೆ.
ಇಂತಹ ವಂಚನೆಗೆ ಯಾವುದೇ ಅತ್ಯಾಧುನಿಕ ಹ್ಯಾಕಿಂಗ್ ತಂತ್ರಜ್ಞಾನ ಬಳಕೆಯಾಗುತ್ತಿಲ್ಲ; ಬದಲಿಗೆ ಗ್ರಾಹಕರ ಅರಿವಿನ ಕೊರತೆ ಮತ್ತು ತುರ್ತು ಪರಿಸ್ಥಿತಿಯನ್ನು ದುರುಪಯೋಗಪಡಿಸಿಕೊಳ್ಳಲಾಗುತ್ತಿದೆ. ಮುಖ್ಯವಾಗಿ ಯುಪಿಐ ಮೂಲಕ ಹಣ ಪಡೆಯಲು (ರೀಫಂಡ್ ಅಥವಾ ಕ್ಯಾಶ್ಬ್ಯಾಕ್) ಯಾವುದೇ ಕಾರಣಕ್ಕೂ ಯುಪಿಐ ಪಿನ್ (UPI PIN) ನಮೂದಿಸುವ ಅಗತ್ಯವಿರುವುದಿಲ್ಲ ಎಂಬುದನ್ನು ಗ್ರಾಹಕರು ನೆನಪಿಟ್ಟುಕೊಳ್ಳಬೇಕು. ಪಿನ್ ನಮೂದಿಸುವುದೆಂದರೆ ನಮ್ಮ ಖಾತೆಯಿಂದ ಹಣ ಕಡಿತಗೊಳಿಸಲು ಅನುಮತಿ ನೀಡುವುದು ಎಂದರ್ಥ. ಆದರೆ ವಂಚಕರು ‘ಕಲೆಕ್ಟ್ ರಿಕ್ವೆಸ್ಟ್’ ಕಳುಹಿಸಿ ಅಥವಾ ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಿಸಿ ಪಿನ್ ನಮೂದಿಸುವಂತೆ ನಂಬಿಸಿ ಮೋಸ ಮಾಡುತ್ತಿದ್ದಾರೆ.
ಬ್ಯಾಂಕ್ ಅಧಿಕಾರಿಗಳಾಗಲಿ ಅಥವಾ ಯಾವುದೇ ಗ್ರಾಹಕ ಸೇವಾ ಪ್ರತಿನಿಧಿಗಳಾಗಲಿ ಫೋನ್ ಕರೆ ಅಥವಾ ಸಂದೇಶಗಳ ಮೂಲಕ ಯುಪಿಐ ಪಿನ್, ಒಟಿಪಿ ಅಥವಾ ಬ್ಯಾಂಕ್ ವಿವರಗಳನ್ನು ಎಂದಿಗೂ ಕೇಳುವುದಿಲ್ಲ. ಸಾರ್ವಜನಿಕರು ಯಾವುದೇ ಕಾರಣಕ್ಕೂ ಅಪರಿಚಿತ ಆ್ಯಪ್ಗಳನ್ನು ಮೊಬೈಲ್ಗೆ ಡೌನ್ಲೋಡ್ ಮಾಡಿಕೊಳ್ಳಬಾರದು ಮತ್ತು ಹಣ ಪಡೆಯಲು ಪಿನ್ ನಮೂದಿಸಬಾರದು. ಒಂದು ವೇಳೆ ಇಂತಹ ಆನ್ಲೈನ್ ವಂಚನೆಗೆ ಒಳಗಾದರೆ ತಕ್ಷಣವೇ ಸೈಬರ್ ಸಹಾಯವಾಣಿ ಸಂಖ್ಯೆ 1930 ಗೆ ಕರೆ ಮಾಡಬಹುದು ಅಥವಾ www.cybercrime.gov.in ಜಾಲತಾಣದಲ್ಲಿ ದೂರು ದಾಖಲಿಸಬಹುದು. ಅನುಮಾನಾಸ್ಪದ ಕರೆಗಳು ಮತ್ತು ಸಂದೇಶಗಳ ಬಗ್ಗೆ ‘ಸಂಚಾರ್ ಸಾಥಿ’ (www.sancharsaathi.gov.in) ಪೋರ್ಟಲ್ನಲ್ಲಿಯೂ ಮಾಹಿತಿ ನೀಡಲು ಸಾರ್ವಜನಿಕರಿಗೆ ಸೂಚಿಸಲಾಗಿದೆ.
